Egaununo 64
Sirongwa sedongwenenopo
JESUS kwa kere simpe membo moKaperenaumu kumwe novarongwa vendi. Age kwa zogerere kumwe nawo omu nava vhura kukohonona po maudigu mokatji kovanavazinyawo, makura Peturusa ta pura asi: “Hompa, rungapi nani dongwenena po mukwetu ogu ga zona nge, nzo zendi?” Mokumona asi varongi womakarelikarunga goVajuda kwa pulisilire edongwenenopo lyokusika po yikando yitatu tupu, Peturusa kwa gazarere asi ya wapa mokugusira po “dogoro nokorutano-naruvali.”
Nye nampili kukara negano lyangoso lyokudiworoka mapuko kapisi uhunga. Jesus kwa vyukisire Peturusa asi: “Ame tani ku tantere asi, kapisi dogoro pwarutano-naruvali tupu, dogoro rokonomurongo ntano-nambali rutano-naruvali.” Age kwa likidire asi kapi pwa hepere eyereko yipo Peturusa a dongwenene po mukwawo.
Mokunkondopeka situmbukira sovarongwa sokudongwenena po, Jesus ta va tanterere sifanekeso. Aso kwa kere sahompa ogu ga here kudivilisa makongo aga va lire vakareli vendi. Ta va mu retere ko mukareli gwendi gumwe, ogu ga mu lililire makongo gomanene gokusika ponoranda 60 000 000. Kapi ga vhulire kugafuta. Ngomu ga yi fatwilire Jesus, hompa ga pangerere asi va mu randese po namukandendi novana vendi a fute makongo.
Makura mukareli ogu ta tu nongoro pevhu komeho zendi oku ta mu likwata mepindi asi: “Lididimika tupu, ngani ku futira nayinye.”
Ano hompa tazi mu gwire nkenda, ta gusire po mukareli makongo gendi gomanene. Jesus ta twikire ko asi, tupu ya pwa oyo, mukareli ta pwaga nokukagwana mukareli mukwawo gumwe, ogu ga mu lililire makongo gonoranda dokusika tupu pefere. Mugara makura ta kwata mukareli mukwawo pomuliu, ta mu sini oku ta tanta asi: “Futira nge yininke yange eyi wa lya.”
Nye mukareli mukwawo kapi ga kere noyimaliwa. Makura ta tu nongoro pevhu komeho zomukareli ogu ga lililire makongo, ta mu likwambere asi: “Lididimika tupu, ngani ku futira nayinye.” Mukareli kapi ga likidire nkenda ngwendi moomu ga zi likidire hompa gwendi, makura ta ka pakesa mukareli mukwawo modorongo.
Jesus ta twikire ko hena asi, vakareli vakwawo eyi va mwene sihoroka sangoso tava zi nokukayisimwitira hompa gwawo. Makura hompa ta handuka ta mu zigida. Ta uyunga asi: “Ove nani o mukareli gomudona. Muntu, kani gusilire po makongo goge morwa ko likwamberere nge. Nani nove nokuvhura si kufira nkenda mukareli mukweni, moomu kani ku fililire ame nkenda?” Morwa ehandu, hompa ta gava mukareli gokupira nkenda kovahepeki, dogoro noku nga mana kufuta nzo zendi mudima.
Jesus makura ta hulisa asi: “NaTate gemeguru nage yimo nga mu ninka nkenye ogu a dili kudongwenena po mukwawo nzo zendi nomutjima nagunye.”
Aso kuna kara sirongwa sosiwa sedongwenenopo! Pokuyihetakanesa nomakongo gomanene gononzo edi ga tu dongwenena po Karunga, yi kare asi nzo musinke ga tu zona mupuli mukwetu yosili azo nunu. Mokugwederera ko, Jehova Karunga kwa tu dongwenena po yikando yomayovi. Rorunzi ose kapi atu nongonona nonzo edi atu mu zonene. Yiyo nye, twa hepera kudongwenena po vanavazinyetu, nampili ose mouhunga tuna kara. Ngomu ga yi rongere Jesus pEudiso lyendi lyopoNdundu, diworoka asi Karunga nga tu ‘dongwenena po nonzo detu, moomu atu dongwenene po nose wononzo detu.’ Mateusa 18:21-35; 6:12; Vakorosi 3:13.
▪ Yinke ya retesere po epuro lyaPeturusa kuhamena kudongwenena po vakwawo, ntani morwasinke ga gazarere asi egano lyendi lyokudongwenena po muntu pwarutano-naruvali asi ewa?
▪ Ngapi omu lya lisigire elimbururo lyahompa kelikwambero lyomukareli gwendi kweli lyomukareli ogu ga likwamberere mukareli mukwawo?
▪ Yinke tuna lirongere ko kosifanekeso saJesus?