Egaununo 74

Jesus ta vyukisa Malita ntani ta rongo kuhamena makanderero

APA ga zuvhisilire Jesus moJudeya, age kwa zire komukunda gwaBetani. Amo kwa tungire mo oMalita naMariya nampanzawo Rasarusa. Nampo Jesus kwa ligwene nawo apa ga tamekere kuzuvhisa, makura tava ya kara vakaume vendi wovanene. Jesus ta zi kembo lyaMalita age makura ta mu tambura.

Malita ga liwapaikilire mokupa Jesus yoyiwa po eyi ga kere nayo. Azo kwa kere mfumwa zokuyamudingura Mesiyasa getumbwidiro! Makura Malita tali tura mo mokuwapaikira Jesus nondya dononzi dokulisiga-siga ntani noyininke hena yoyinzi yokumuhafesa.

Nye Maria mumbyaMalita kwa hingilire konompadi daJesus a purakene nonkango dendi. Konyima zosiruwo Malita ta wiza, ta tanta asi: “Hompa, nani nokuyifira si mbili, eyi ana sigi nge ogo mumbyange, ni rugane nyamelike? Mu tantera nye a ya kwafe nge!”

Jesus ga nyokere kutantera Mariya. Nye ta vyukisa Malita mokulipakera sinka unene noyininke yopanyama asi: “Malita, Malita, yinzi ono lipakere sinka, ove hena ono piyagana. Nye sininke simwe po yiso sohepero.” Jesus kwa tembe asi kapi ya kere hepero mokuruganesa siruwo sosire mokuwapayika nondya dononzi dokulisiga-siga. Nampili rudi rumwe ronondya tupu ngano da gwanenene po.

Malita ga kere nositambo sosiwa; age kwa here kukara mutambuli vagenda gomuwa. Nye, kupakera kwendi sinka yininke yopanyama, ya mu ninkisire a hupe ko mokugwana marongo gokutunda kwaMunwaKarunga! Jesus makura ta hulisa asi: “Mariya kuna horowora po age ruha roruwa, oru ngava dira kumugusa.”

Posihorokwa sapeke, murongwa kwa pulire Jesus asi: “Hompa, tu ronga ko nose kukanderera, moomu ga ronga Johanesa varongwa vendi.” Murongwa ogu nampo kapi ga kere po apa Jesus ga geve sihonena sokukanderera pEudiso lyendi lyopoNdundu. Jesus makura kwa rugurukire mapukururo gena ntani kwa geve sifanekeso esi sa didilika hepero zokutwikira kukanderera.

Jesus ta tameke asi: “Opo muna kara, mpamwe gumwe ta zi kembo lyamukwawo masiku, a ka mu tantere asi, ‘Hewa, kwafa nge ko nomboroto ntatu. Mukwetu ana tundu ure, ana gwana nge, mweli membo, nye apa na kara tumbu-tumbu, nayimwe si nani mu pa.’ Mpamwe mukweni ta limburura, age monzugo asi, ‘Wa ha zogerera nge. Mupito nare tuna gu zedire, vana vange nanyamwange kuna rara. Ame nokuvhura si hena kupinduka asi ni ku pe yuma.’ Ngapi nye omu nayi kara? Tani mu tantere asi, nsene a dira kupinduka a ku pe nomboroto morwa age mukweni, ta pindukire a ku pe nayinye eyi ono hara, morwa kapi ono kutuda kumuhundira.”

Jesus kapi ga tembe asi Jehova Karunga kuyiruganena wina pokudira kulimburura makanderero, ngwendi gwina muntu mosifanekeso. Jesus kwa fanekesere asi kaume koge googu nsene ta gava morwa kapi ono kutuda kumuhundira, Guhyetu gemeguru geharo age kupitakana nye opo! Makura Jesus ta twikire asi: “Yiyo nye nina kumutantera asi: omu hundire ngava mu pe, omu papare ngomu gwane, omu ngongore ngava mu zegurure. Yeeyi asi nkenye ogu a hundire, kumupa, nogu a papara kugwana, ano ogu a ngongora kumuzegurura.”

Makura Jesus ta hetakanesa kumwe novaguhya wokudira kusikilira mo tanta asi: “One oguhya vanona, kuvhura gumwe a pe munwendi ezoka, age mfi ana mu hundire. Ndi kuvhura kumupa nge, age nye euta ana hundire? Kumwe nyone wovadona mwa diva kupa vana veni yininke yoyiwa, ngaGuhyeni gemeguru yihuna nye pokugava Mpepo zoKupongoka kwava vana kumuhundira!” Jesus kwa geve ekorangedo lyenene lyokudira kuhageka kukanderera. Rukasa 10:38–11:13.

▪ Morwasinke ga litulilire mo Malita unene mokuwapaikira Jesus nondya?

▪ Yinke ga rugene Mariya, ntani morwasinke Jesus ga pandadekere Mariya kupitakana Malita?

▪ Yinke ya tumangedere Jesus mokuruguruka mapukururo gendi gokuhamena makanderero?

▪ Ngapi omu ga fanekesere Jesus hepero zokudira kuhageka kukanderera?