Egaununo 90

Ehuguvaro lyevhumbuko

MORUHURA Jesus ta ya siki pepi naBetani, mukunda ogu gwa kere konyara nokilometa 3 kutundilira koJerusarema. Mazuva gongandi tupu ga pitire po kutunda apa ga dogorokere Rasarusa nokumuvhumbika. Vampanza vendi oMalita naMariya kwa kere simpe moruguwo, ntani wovanzi kwa wizire va ya va kwate ko mawoko.

Awo simpe moruguwo, gumwe ta tantere Malita asi Jesus monzira ana kara. Ga hana kutantera ko mukurwendi Mariya, Malita ta tundu membo nokugenderera kusimbagwira Jesus. Apa ga ya sikire kwaJesus, Malita ta rugurura eyi va uyungire age namukurwendi yikando yoyinzi pomazuva gane aga ga pitire asi: “Hompa, ngano yipo ko kere, ngano mpanzange kapi ka fire.”

Nampili ngoso, Malita kwa likidire ehuguvaro, pokutumbura asi Jesus kuvhura kurugana ko yuma kwampanzawo. Age kwa tente asi: “Nantaantani si na diva asi, nkenye eyi no hundira Karunga, Karunga na yi ku pa.”

Jesus ta tumbwidire asi: “Mpanzoge na vhumbuka.”

Malita ga gazarere asi eyi ana kuuyunga Jesus kuna kara evhumbuko lyokomeho lyepevhu, eli vana kundindira oAbirahamu kumwe novakareli vaKarunga nawopeke. Makura ta limburura asi: “Na yi diva asi, nga vhumbuka pevhumbuko lyezuva lyouhura.”

Nye, Jesus kwa geve ehuguvaro pokulimburura asi: “Nyame evhumbuko nomwenyo.” Ta diworokesa Malita asi Karunga kwa mu pa nonkondo dokufunda nomfa, ta tanta asi: “Ogu ana kupura nge ta kara nomwenyo, nampili a kare asi kuna fu. Ano nye nkenye ogu ga kara nomwenyo oku ga pura nge narumwe si nga fa.”

Jesus kapi ga tembe asi vantu wovalimburukwi ava va parukire posiruwo sina kapi ngava fa. Nye sitambo sendi sa kere asi pokulikida epuro mwendi kuvhura kutwaredesa komwenyo gwanarunye. Eparu lyangoso ngava ka li hafera sinzi sovantu ngomu ngava ka va vhumbura mezuva lyouhura. Nye vamwe wovalimburukwi ngava ka paruka uhura wouzuni ou, ano nonkango daJesus ngadi ka sika mo mwawo. Narumwe si ngava fe! Konyima zetumburo eli lyokutetukisa, Jesus ta pura Malita asi: “Ono yi pura eyi ndi?”

Age ta limburura asi: “Nhi, Hompa, na pura asi nyove Kristusa, MunwaKarunga, ogu va tanta asi nga wiza mouzuni.”

Makura Malita ta genderere kutengura kembo a ka zigide mukurwendi Mariya, ta mu tantere mokahore-hore asi: “Murongi pweli opo, nyove ana kuzigida.” Mariya ta tundu mo usimbu membo. Apa vapeke va mu mwene age ta zi, awo tava mu kwama, nokugazara asi kontoko ana kuza.

Apa ga ya sikire kwaJesus, Mariya ta lingandere konompadi dendi nokulira. Age ta tanta asi: “Hompa, ngano yipo ko kere, ngano mpanzange kapi ka fire.” Jesus tazi mu gwire nkenda apa ga mu mwene ntani nombunga zovantu ezi za wizire nendi kuna kulira. Age ta va pura asi: “Kupi komu mu horekere?”

Awo tava mu limburura asi: “Hompa, wiza o ya tare.”

Jesus makura ta lili, kwa ninkisire Vajuda va uyunge asi: “Tara omu ga mu here.”

Vamwe tava diworoka asi Jesus, poSipito soYikorogo konyima tupu zomakwedi gongandi, kwa verwire mumati ogu va hampuruka age mutwiku, makura tava pura asi: “Amesi yige ogu ga mahwire meho gomutwiku. Eyi yokuninka asi ogu ga ha fa yiyo nye ya mu vhulire po ndi?” Johanesa 5:21; 6:40; 9:1-7; 11:17-37.

▪ Siruwo musinke ga ya sikire Jesus pepi naBetani, ntani yisinke ya horokere mo?

▪ Konda musinke ga kere nazo Malita zokupura mevhumbuko?

▪ Ngapi omu da mu kundamene Jesus nomfa daRasarusa?