Egaununo 89

Sirugana sonkenda moJudeya

POSIPITO sEpongoro moJerusarema Vajuda va hetekerere ko kudipaga Jesus. Yipo nye Jesus ga zire yivike yongandi korwaMuzogo, komukunda ogu gwa kere pepi nEkurudiva lyaGalireya.

Kutunda opo, ta vareke hena norugendo rokuza korwaMbindakano kuvyuka koJerusarema, nokuzuvhisira monomukunda daPereya, korwaUpumezuva womukuro gwaJorodana. Konyima zokusimwitira sifanekeso sokuhamena mugara gongawo naRasarusa, ta twikire ko kuronga varongwa vendi yininke eyi ga va rongere nare apa va kere moGalireya.

Pasihonena, age ta uyunga asi muntu hasa kumumangerera “emumanya monsingo zendi, makura va mu zugumine mefuta” kupitakana yokuninkisa “kanona” kamwe kaKarunga ka puke. Age hena kwa nkondopekere hepero zokudongwenena po, pokufaturura asi: “Ano nsene [mukweni] a ku zona rutano-naruvali mezuva, nye a wize koge rutano-naruvali a tante asi, ‘Tani livere,’ omu mu dongwenene po.”

Apa varongwa va hundilire Jesus asi: “Tu gwederera ko kepuro lyetu,” age ta va limburura asi: “One ngano si kwa kara nepuro lyokuhura nampili pohuma zomositareta, ngano kuvhura tupu kutantera sitji esi sounyandi asi, ‘Damuka po apa o ka ndjikame mefuta,’ makura ngano naso tasi mu zuvhu.” Usili, nampili epuro lyenunu kuvhura kusikisa mo yininke yoyinene.

Konyima, Jesus ta simwitire sihorokwa esi sa likidire nkareso zokuwapera zomukareli gwaKarunga Munankondo. Jesus ta tanta asi: “Opo muna kara, pweli ogu ga kara nomukareli ogu a purura ndi kulisa yimuna, makura ntene ana wiza membo, a mu tantere asi, ‘Genderera oku yo lye,’ ndi? Amesi na mu tantera asi, ‘Tulira nge po murarero o limange nawa, makura o yete nge. Nange nani mana kulya nokunwa, nove ntani nye no lya oku to nu!’ Ndi na pandura tupu mukareli ogo asi, morwa ana rugana eyi vana mu tantere? Ame kapi nani yi pura oyo. None si yimo, nsene muna mana kurugana nayinye, eyi vana mu tantere, tanteni asi, ‘Ose tu vakareli wovahesi, yeeyi ose kuna rugana yeeyi vana tu pangere asi tu yi rugane makura.’” Yipo nye vakareli vaKarunga narumwe si va lizuvhe asi awo kuna kuruganena uwa Karunga pokumukarera. Nye awo va hepa kudiworoka asi kwa kara situmbukira sosinene sokukarera Karunga ngovantu wokuhuguvara membo lyendi.

Konyima tupu zokugava Jesus sifanekeso esi ntumi tazi ya siki. Malita naMariya va zi tumine, vampanza vaRasarusa, ava va tungire moBetani zomoJudeya. Ntumi tazi tanta asi: “Hompa, ko tara si, ogu wa hara ta vere.”

Jesus ta limburura asi: “Uvera ou kapi nau mu lya, nye asi u fumadekese ko Karunga, hena asi MunwaKarunga nage a fumanene mo.” Konyima zokukara kooko mazuva gavali, Jesus ta tantere varongwa vendi asi: “Tu zeni hena koJudeya.” Nye, awo tava mu diworokesa asi: “Murongi, apa ntaantani kava here kukudipaga Vajuda nomamanya, makura asi o ze ko hena!”

Melimbururo Jesus ta va pura asi: “Nani notundi domutenya kapisi murongo nambali ndi? Ogu a gendi mutenya nokupunduka si, yeeyi a mono uzera wouzuni ou. Nye ogu a gendi masiku kupunduka yeeyi uzera mutupu mwendi.”

“Notundi domutenya,” kwa tembe siruwo esi ga tokwere Karunga kosirugana saJesus pevhu, ano morwa simpe kapi sa sikire mo, kwato ga vhulire kumukoresa. Ga hepere kuruganesa nawa siruwo sosisupi ‘somutenya’ esi sa mu hupilire ko, morwa konyima zoyo ga wizire “masiku” apa nonkore dendi da ya mu dipagere.

Jesus ta gwederere ko asi: “Rasarusa mukwetetu kuna ponyoka, nye tani zi ni ka mu pindure.”

Varongwa awo kwa gazarere asi Rasarusa kuna ponyoka ntani asi na veruka, makura tava limburura asi: “Hompa, nsene kuna ponyoka, na ka veruka.”

Nye Jesus ta va dukwire asi: “Rasarusa ana fu, ano ame nina hafa mwarweni, yeeyi na pilire po, ntani mu pura. Nye tu zeni kwendi.”

Tomasa ga yi nongwenene asi Jesus kuvhura va ka mu dipage moJudeya, nye morwa eharo lyokumukwatesa ko, ta korangeda varongwa vakwawo asi: “Nose tu zeni tu ka fe nendi.” Pokutura maparu gawo mosiponga, varongwa tava zi kumwe naJesus mosirugana esi sonkenda moJudeya. Rukasa 13:22; 17:1-10; Johanesa 10:22, 31, 40-42; 11:1-16.

▪ Kupi oku ga zuvhisililire Jesus siruwo esi?

▪ Marongo musinke ga rugurukire Jesus, sihorokwa musinke ga singwenene, ntani sitwa musinke ga likidire?

▪ Mbudi musinke ga gwene Jesus, ntani yinke ga tembe pokuuyunga kuhamena ‘mutenya’ ntani “masiku”?

▪ Yinke ga tembe Tomasa pokutanta asi: “Nose tu zeni tu ka fe nendi”?