Egaununo 98

Varongwa tava litatagana ngomu da hederere nomfa daJesus pepi

JESUS novarongwa vendi kwa rutire mukuro gwaJorodana kutundilira momukunda gwaPereya va ze moJudeya. Wovanzi kwa gendere nawo va ze koPaska zomo-33 S.N., ezi za ka kere ko konyima zosivike simwe.

Jesus kwa pitire komeho zovarongwa vendi ntani awo kwa tetukire ketokomeno lyendi lyoupampi. Yivike yongandi komeho zeyi, apa ga here Jesus kutunda moPereya a ze moJudeya morwa nomfa daRasarusa, Tomasa kwa korangedere varongwa vakwawo asi: “Nose tu zeni tu ka fe nendi.” Hena diworoka asi, konyima apa Jesus ga vhumbwire Rasarusa, masimbi kwa here kudipaga Jesus. Yiyo va karerere varongwa vendi noutjirwe apa va zire hena moJudeya.

Mokuvawapaikira kweyi ya kere komeho, Jesus ta twara ava 12 kompengi makura ta va tantere asi: “Tareni, ose koJerusarema tuna kuzeni, nye MunwaMuntu ngava mu gava kovapristeli wovanene nokovalirongi womatjangwa. Awo yiyo ngava mu pangwira konomfa oku hena ngava mu gava kovapagani. Awo hena ngava mu zora oku tava mu fizire nokumugeragura nongora, ntani ngava mu dipaga, nye nga vhumbuka mezuva lyautatu.”

Esi kwa kere sikando sautatu ga tanterere Jesus varongwa vendi kuhamena nomfa nevhumbuko lyendi. Nampili ngomu va mu purakenene, awo kapi va yi kwete egano. Nampo morwa awo kwa pulire asi ngava tura po hena uhompa waIsraeli pevhu, ntani awo kwa ndindilire mokuhafera uyerere nomfumwa mokupangera kumwe naKristusa pevhu.

Gumwe gwava va zire koPaska kwa kere Salome zinya govapositoli Jakopo naJohanesa. Jesus kwa tumbwire vagara ava asi: “Vana wosindundumo somvhura,” nampo morwa upampi ndi unyanyuki wawo. Awo kwa here kukara noyipundi yokuzeruka moUhompa waKristusa, ntani awo va yi tanterere zinyawo. Makura zinyawo ta hedere Jesus a va uyungire po, ta mu linyongamene makura ta mu hundire.

Jesus ta pura asi: “Yisinke ono hara?”

Gwina ta limburura asi: “Ninka asi vana vange ava vavali ngava ka hingire moUntungi woge, gumwe korulyo roge, ano ogu mukwawo korumoho roge.”

Mokunongonona ntundiliro zehundiro, Jesus ta tantere Jakopo naJohanesa asi: “One kuhundira eyi mwa dira kudiva. Nkinda ezi ngani nwa none kuvhura kuzinwa ndi?”

Awo tava limburura asi: “Nhi, kuvhura.” Nampili ngomu Jesus ga va tanterere asi nga ka ligwanekera nomahapeko gomadona ntani moruhura ngava ka mu dipaga, awo kapi va yi kwete egano asi eyi yiyo ga tembe pokutumbura “nkinda” ezi nga ka nwa.

Nampili ngoso, Jesus ta va tantere asi: “Nhi, nkinda zange ngomu zi nwa, nye oko kuhingira korulyo nokorumoho ame nokuvhura si kukugava nyamwange, ako kwa wapera tupu vaava ga ku wapaikira Tate.”

Apa vapositoli murongo va divire eyi va hundilire oJakopo naJohanesa, makura tava va handukire. Nampo oJakopo naJohanesa kwa lizerwire monompata dina va kere nado pomuhowo kumwe novapositoli vakwawo kuhamena yilye munene po mokatji kawo. Ehundiro lyawo eli kwa likidire asi awo kapi va tambwire epukururo eli ga va pere Jesus. Awo simpe kwa kere neharo lyokulizerura.

Mokukohonona po nompata ntani noudigu ou ya retere po, Jesus ta zigida vapositoli navenye 12 kumwe. Ta va pukurura neharo asi: “Mwa diva asi, ohompa wonomuhoko kupangera nomuhoko dawo, ano vanene kudiruganesa nononkondo dawo. Nye kweni one ya ha kara ngoso. Ogu ga hara kukara munene pokatji keni, a kare mukareli gweni, ano ogu ga hara upitameho, a kare mupika gweni.”

Jesus kwa tulire po sihonena esi va vhulire kutemwinina, ngomu ga tente asi: “NaMunwaMuntu nage si kapi ga wizira asi va ya mu kerere, age kwa wizira a ya kerere, a ya gave mwenyo gwendi, gu kare sizoweseso sovanzi.” Jesus kapi tupu ga kerere vapeke nye ga ya yi rugene momunene apa ga ya fililire vantu! Varongwa nawo va hepere kukara nonkareso zangoso zaKristusa zokuhara kukerera vapeke mevango lyokuvakerera ntani zokuhara kukara gomununu po mevango lyokulizerura. Mateusa 20:17-28; Marukusa 3:17; 9:33-37; 10:32-45; Rukasa 18:31-34; Johanesa 11:16.

▪ Morwasinke va karerere varongwa noutjirwe?

▪ Ngapi omu ga wapaikilire Jesus varongwa vendi eyi ya kere komeho?

▪ Yinke va mu hundilire Jesus, ntani ngapi omu ya kundamene vapositoli vapeke?

▪ Ngapi omu ga kohwenene po Jesus udigu ou wa kere movapositoli vendi?