Egaununo 92

Jesus ta verura vanayingondwe murongo morugendo rwendi rokuhulilira koJerusarema

JESUS kwa tundire mo moJerusarema mokulimbikisa ekondjeso lyomasimbi lyokumudipaga. Age kwa zire kositata saEfurayimi, esi sa kere konyara nokilometa 24 korwaMuzogo-pumezuva waJerusarema. Oko yiko ga ka kere kumwe novarongwa vendi, a likare ure nononkore dendi.

Nye nomfa dendi dopoPaska zomo-33 S.N. ado kwa hederere pepi, yipo nye Jesus ga zire sikando sokuhulilira koGalireya mokukwama nzira ezi za pita moSamaliya. Kutundilira moGalireya, age novarongwa vendi kwa lipakerere navamwe mokuza kumwe nawo koJerusarema kosipito soPaska. Awo kwa gendere nzira zokupita momukunda gwaPereya, korwaUpumezuva womukuro gwaJorodana.

Morugendo rwawo, eyi ga hwilira Jesus momukunda gumwe, nampo moSamaliya ndi moGalireya, ta ligwanekere novagara murongo ava va kere noyingondwe. Uvera ou woudona kuzonagura maruha gorutu, ngwendi nonyara dokomawoko nedi dokonompadi nomatwi nezuru nonomurungu. Mokugamena vapeke va pire kukagura uvera ou, Veta zaKarunga kwa uyunga kuhamena munayingondwe asi: “A kudumike sipapa sendi kutunda komurungu gekeguru, a zigire asi: ‘Na nyata, na nyata!’ Ogo ta kara ana nyata siruwo esi ana kara nowo uvera. A likerere gelike.”

Vanayingondwe ava murongo va divire masiliko goVeta kuhamena vanayingondwe yipo va kere ure naJesus. Makura tava zigire unene asi: “Jesus, murongi, tu fira nkenda!”

Jesus eyi ga va mona koure, ta va pangere asi: “Zendeni mu ka limonekese kovapristeli.” Jesus kwa yi uyungire eyi morwa kuliza noVeta zaKarunga vapristeli yiwo ngava tokora nsene asi munayingondwe ana veruka kouvera wendi. Monkedi ezi vantu vangoso kuvapulisira hena va tunge kumwe novantu wovakangure.

Vanayingondwe kwa kere nehuguvaro mononkondo daJesus dokurugana yitetu. Yipo va gendererere mokuza kovapristeli, nampili ngomu va kere asi awo simpe kapi vana veruka. Hava za mokugenda, tava gwana mo uwa morwa kutura epuro lyawo mwaJesus. Awo kwa tamekere kulimona nokulizuvha asi vana veruka.

Vanayingondwe ava va verukire vatano-navane kwa twikilire nzira zawo, nye munayingondwe gumwe, age hena Musamaliya, ta tengura a ka papare Jesus. Morwasinke? Morwa age kwa kere norupandu kweyi ya mu horokerere. Age kwa fumadekere Karunga nezwi lyenene, ntani apa ga gwene Jesus, ta gwire konompandi dendi a mu pandure.

Makura Jesus ta pura asi: “Nani kapisi murongo vana veruka? Ava vatano-navane kupi? Nagumwe si ogu ana tengura ko a ya hamberere Karunga, googu munayirongo gelike?”

Age makura ta tantere mugara goMusamaliya asi: “Katuka o ze, epuro lyoge lina ku parura.”

Nsene tatu resa kuhamena everuro lyaJesus lyovanayingondwe murongo, twa hepa kukwata egano sirongwa seyi lya tembe epuro lyendi eli asi: “Ava vatano-navane kupi?” Rupandu oru va dilire kulikida vatano-navane kwa kere nzo zonene. Ose ngano tu kare ngwendi Musamaliya, pokulikida rupandu koyininke eyi atu gwana kwaKarunga, kukwatera mo etumbwidiro lyomwenyo gwanarunye mouzuni wouhungami woupe waKarunga! Johanesa 11:54, 55; Rukasa 17:11-19; Levitikus 13:16, 17, 45, 46; Ehororo 21:3, 4.

▪ Ngapi omu ga limbikisire Jesus ekondjeso lyokumudipaga?

▪ Kupi oku ga zire Jesus, ntani nositambo musinke?

▪ Morwasinke va sikamenene vanayingondwe ure, ntani morwasinke ga va tantererere Jesus va ze kovapristeli?

▪ Sirongwa musinke natu lirongera ko kosihorokwa esi?