Egaununo 18

Ove kudiworoka mokugava mpandu ndi?

NAINA ono li nondya ndi?— Ono diva asi yilye ogu ana di wapaike ndi?— Nampo onane woge ndi muntu gwapeke ana di tereke, nye morwasinke natu pandwira Karunga konondya?— Morwa Karunga yige a kulisa yimeno noyitji, tu gwane ko nondya. Nampili ngoso, twa hepa hena kupandura ogu ana wapaike nondya ndi ogu ana di tu pe.

Poyiruwo yimwe, ose kulidivara kugava rupandu apa vapeke ava tu ruganene yininke yoyiwa, ndi ngapi? Apa ga kere Murongi goMunene pevhu, pwa kere vanayingondwe vamwe ava va divarere kugava rupandu.

Ono diva asi yisinke yingondwe?— Awo kuna kara uvera ou au vhuru kuzonagura maruha gamwe gorutu. Apa ga kere Jesus pevhu, vanayingondwe va hepere kukara ure novantu vapeke. Ano nsene munayingondwe a mona muntu gwapeke kuna kuwiza, ga hepa kuzigira mokumurondora a kare ure nage. Eyi ngava yi ruganene yipo asi vantu vapeke va dire kuvahedera nokukagura uvera woyingondwe.

Jesus kwa fililire unene nkenda vanayingondwe. Ezuva limwe apa ga zire koJerusarema, Jesus ga hepere kupita mokadoropagona. Apa ga sikire pepi nodoropa ozo, vanayingondwe murongo tava mu wizire. Awo kwa zuvhire asi Jesus ga kara nononkondo dokutunda kwaKarunga mokuverura nkenye uvera.

Vanayingondwe kapi va hederere Jesus pepi. Awo kwa sikamene koure. Nye awo va kere nepuro asi Jesus kuvhura kuverura yingondwe yawo. Apa vanayingondwe va mwene Murongi goMunene, awo kwa zigilire asi: ‘Jesus, Murongi, tu vatera!’

Ove kufira nkenda vantu wokuvera ndi?— Jesus ga va fililire nkenda. Age ga yi divire omu ayi guvisa yokukara noyingondwe. Age makura ta va limburura asi: “Zendeni mu ka limonekese kovapristeli.”—Rukasa 17:11-14.

Morwasinke ga va tantererere Jesus mokurugana eyi? Morwa azo kwa kere veta ezi ga geve Jehova kovantu vendi kuhamena vanayingondwe. Veta ezi kwa tente asi mupristeli gwaKarunga ga hepere kukonakona sipapa somunayingondwe. Mupristeli ngano ta tantere munayingondwe nsene uvera wendi naunye una mu tundu. Nsene ana veruka, age kuvhura kukakara hena kumwe novantu wovakangure.—Levitikus 13:16, 17.

Nye vanayingondwe ava simpe va kere nouvera wawo. Awo va zire komupristeli ngomu ga va tanterere Jesus ndi?— Nhi, awo va zire poopo. Vagara ava va pulire asi Jesus kuvhura kuverura uvera wawo. Yisinke ya horokere?

Hava za mokugenda va ze komupristeli, uvera wawo tau va tundu. Yipapa yawo kwa verukire! Kupura kwawo mononkondo daJesus kwa retere mauwa. Ee, ruhafo musi va lizuvhire! Apa ngesi, yisinke va hepere kurugana mokulikida rupandu rwawo? Ngano nyove, yisinke ngano wa rugene?—

Gumwe govagara ava va verukire kwa ka tengwire kwaJesus. Age ga tamekere kuhamberera Jehova, pokuuyunga yininke yoyiwa kuhamena Karunga. Ayo kwa kere yininke youhunga kurugana, morwa nonkondo edi da mu verwire kwa tundire kwaKarunga. Mugara ga twire hena nongoro komeho zoMurongi goMunene nokumupandura. Age kwa pandwire unene kweyi ga mu rugene Jesus.

Nye ngapi kuhamena vagara ava vatano-navane? Jesus ga pulire asi: ‘Nani kapisi murongo vana veruka? Ava vatano-navane kupi? Gumwe tupu ana ka tengura mokuyahamberera Karunga ndi?’

Yimo, gumwe tupu ga hambererere Karunga ntani ga ya geve rupandu kwaJesus. Ano mugara ogu kwa kere Musamaliya, mugara ogu ga tundire kosirongo nasopeke. Vagara ava vatano-navane kapi va pandwire Karunga ntani kapi va pandwire Jesus.—Rukasa 17:15-19.

Gupi po povagara owo ogu wa fana? Ose tuna hara kukara ngwendi mugara gwina goMusamaliya, ndi kapisi yimo?— Yipo nye, apa muntu a tu ruganene sininke sosiwa, yisinke twa hepa kudiworoka kurugana?— Twa hepa kugava rupandu. Sinzi sovantu kudivara kugava rupandu. Nye kugava rupandu kuna kara sininke souhunga kurugana. Nsene tu yi rugana, ose kuhafesa Jehova Karunga naMunwendi, Jesus.

Nsene o gazadara ko, no diworoka asi vantu kwa ku ruganena yininke yoyinzi. Pasihonena, wa vera rumwe ndi?— Nampo kapi wa verere unene ngwendi vanayingondwe vena murongo, nye walye kwa verere tupu esakisa ndi kukora mezimo. Kweli gumwe ga kupakerere mbili ndi?— Awo nampo kwa ku pere nomutji dimwe ndi kwa ku ruganenene yininke yimwe. Wa hefe apa va ku vaterere o veruke ndi?—

Mugara goMusamaliya kwa pandwire Jesus kweyi ga mu verwire, ntani eyi ya hafesere Jesus. Omu ono kugazara, kuvhura onane ndi otate woge va hafe nsene o va pandura koyininke eyi vana ku ruganene ndi?— Yimo, ngava yi hafera.

Vantu vamwe kukuruganena yininke nkenye ezuva ndi nkenye sivike. Ayo kuvhura yi kare asi yiyo yirugana yawo. Awo nampo kuyihafera mokuyirugana. Nye kuvhura o lidivare mokugava rupandu. Mitili goge kuvhura kurugana unene mokukuvatera o lironge. Aso kuna kara sirugana sendi. Nye ayo kuvhura ngayi mu hafese nsene o mu pandura kweyi ana kukuvatera.

Poyiruwo yimwe, vantu kuvhura va ku ruganene tupu yininke yoyinunu. Pweli gumwe ga ku vaterere mokusimba sininke soudigu ndi? Ndi pweli gumwe ogu ga ku taperere nondya porupasa roge? Ayo ya wapa mokugava rupandu nampili koyininke eyi yoyinunu.

Nsene tu diworoka kugava rupandu kovantu vepevhu, ose ngatu diworoka mokugava rupandu kwaGuhyetu gemeguru. Ntani pwa kara yininke yoyinzi eyi natu pandwira Jehova! Age kwa tu pa mwenyo ntani noyininke yoyiwa eyi ayi tu hafesa. Yipo nye twa karera nokonda zokuhamberera Karunga pokuuyunga nkenye ezuva yininke yoyiwa yokumuhamena.

Kuhamena kugava rupandu, resa Episarome 92:1; Vaefeso 5:20; Vakorosi 3:17; ntani 1 Vatesaronika 5:18.

[Efano pepenuno 98, 99]

Yisinke ga tanterere Jesus vanayingondwe ava?

[Efano pepenuno 99]

Yisinke ga diworokere kurugana munayingondwe ogu?

[Efano pepenuno 100]

Ngapi omu no vhura kuhonena munayingondwe ogu ga ka tengwire kwaJesus?

[Mafano pepenuno 101]

Morwasinke ya karera nomulyo mokudiworoka kugava rupandu?