Egaununo 94
Hepero zokukanderera ntani nezi zokulinunupika
APA ga kere Jesus moJudeya, kwa simwitilire sifanekeso sokuhamena mulyo gokutwikira kukanderera. Ano morugendo rwendi lyokuhulilira rokoJerusarema, age ta nkondopeke hena hepero zokudira kudwapa mokukanderera. Nampo Jesus kwa kere simpe moSamaliya ndi moGalireya apa ga tanterere varongwa vendi sifanekeso hena esi asi:
‘Mositata simwe mwa kere mupanguli ogu nga dili kutjira Karunga, age hena kapi nga fu nse vantu. Mositata oso mwa kere hena mufisayendi ogu nga wiza nkenye apa komupanguli ogo, ta mu tantere asi, “Tu pangura nava twa lizona nawo.” Siruwo sosinene mupanguli kapi ga here, makura ga ninka ta lipura asi, “Nampili moomu ani dili kutjira Karunga, kapi ani fu nse vantu, tani yi rugana, morwa mufisayendi ogu ta sipangeda nge. Tani mu pangwire, neisi nga ninka a ya twe nge nomomeho.”’
Makura Jesus ta tura mosirugana esimwititi lyendi, pokutanta asi: “Purakeneni ogu mupanguli gomudona omu ana kutanta! Makura Karunga a dire nye kupangwira vahoroworwa vendi ava ava mu likwambere mutenya nomasiku, ndi a lirange kuvakwafa ndi?”
Jesus kapi ga tembe asi Jehova Karunga kwa fana ngwendi mupanguli gomudona. Nye, nsene mupanguli gomudona nga limbwilira kelikwambero lyokutwikira, yosili Karunga gomuhungami gomuwa, nga limburura nsene vantu vendi va dira kudwapa mokukanderera. Jesus ta twikire ko asi: “Ame tani mu tantera asi, age [Karunga] ta va pangwire usimbu-simbu.”
Wokulinunupika novanaruhepo kapi ava va pangura narunye mouhunga, nye vanankondo nonongawo kuvarugana monaruwa. Nampili ngoso, Karunga nga pangura mouhunga, vadona nga va tengeka, ano asi vakareli nga va pa mwenyo gwanarunye. Nye vantu vangapi va pura nononkondo asi Karunga ta va pangwire usimbu-simbu?
Pokutamba kepuro eli lya likwatakana nononkondo dekanderero, Jesus ta pura asi: “MunwaMuntu ntene nga wiza, nye nga ya gwana ko tupu epuro mouzuni ndi?” Nampili ngomu Jesus ga dilire kulimburura epuro, alyo kwa likidire asi apa nga wiza moUhompa wendi kapi ngapa kara vantu wovanzi vepuro lyenene.
Mowo va purakenene kwaJesus mwa kere vamwe va ligazarere asi awo vepuro lyenene. Awo kwa lihuguvarere vene asi awo vahungami, ntani kwa tere vakwawo asi kwato mulyo. Nampo kwa kere varongwa vaJesus nawo va yi gazarere. Yipo ga tambesere sifanekeso esi sina kukwama ko kovantu vangoso asi:
“Vagara vavali kwa kandukire kontembeli va ka kanderere, gumwe Mufalisayi, ano mukwawo mufutisi gomutero. Mufalisayi ta sikama a likerere, makura ta kanderere yokuhamena kwamwene asi, ‘Karunga, tani ku pandura, yeeyi ame kapi na fana vantu peke—vamahaka novanayimpempa novahondedi, ndi ngwendi gogu mufutisi gomutero ogu. Ame kudilira nondya ruvali mosivike, ame hena kugava yiumurongo yeyi ani gwana nayinye.’”
Vafalisayi kwa va divilire kouhungami wawo wokulimonekesa mokukomaukisa vapeke. Awo kwa tulire po veta zavene zokudilira moMandaha nomoUne ntani awo ngava gava siumurongo soyihaperera yoyinunu yomomapya. Apo kwa pitire po makwedi gongandi tupu kutunda opo va sensere vantu ava va ya kere poSipito soYikorogo pokutanta asi: “Nye vantu ava va dira kudiva Veta [kutanta asi, omu ngava rongo Vafalisayi Veta], kwa va fingilira.”
Pokutwikira nosifanekeso sendi, Jesus kwa uyungire kuhamena muntu gwangoso ogu va “fingilira” asi: “Muteresi age kwa sikeme ure nakauke, nekeguru si kapi ga here kutara ko, nye ta litoona ponturo, ta tanta asi, ‘Karunga, fira nge nkenda, ame munanzo!’” Morwa mufutisi gomutero nelinunupiko kwa dimbwilire mapuko gendi, Jesus ta tanta asi: “Ame tani mu tantere asi, ogu gokuhulilira kwa zire kembo lyendi age ana hungama, kupita gwina gomuhowo. Yeeyi ogu a linenepeke mwene, kumununupika, ano ogu a linunupike mwene, kumunenepeka.”
Jesus yipo ga nkondopekere hena hepero zokukara nelinunupiko. Varongwa vaJesus kwa kulilire monkarapamwe omu Vafalisayi wokuyilipaka va kere nononkondo ntani omu yipundi yokuzeruka va yi tere asi mulyo. Morwa eyi, varongwa vendi nawo kwa va kundamene egano eli lyepuko. Yipo nye, Jesus ga va rongerere yirongwa yoyiwa yokuhamena elinunupiko. Rukasa 18:1-14; Johanesa 7:49.
▪ Morwasinke mupanguli gomudona ga tambwilire ehundiro lyomufisayendi, ntani sirongwa musinke tuna lirongere ko kosifanekeso saJesus?
▪ Epuro lyokuhura kupi nga ya papara Jesus apa nga wiza?
▪ Kolye ga tambesere Jesus sifanekeso sendi sokuhamena Mufalisayi nomufutisi gomutero?
▪ Nkareso musinke zoVafalisayi natu nyokera?