Egaununo 21

Kuvhura tu likangangere yininke ndi?

YINKE ayi tanta kulikanganga? Wa yi diva ndi?— Pana kara sihonena. Wa hetekera ko kurugana sininke simwe esi wa dira kudiva nawa ndi? Nampo wa hetekere kusanga mbara ndi kuvatuka runkundangera. Kweli gumwe ga ku swawire pokukuzora ntani nokutanta asi: “Ame kuvhura ni yi rugane nawa kukupitakana” ndi?— Muntu gwangoso kwa likangangere.

Ngapi omu o lizuvhu nsene vapeke va rugana yininke yangoso? Ove kuyihafera ndi?— Omu ono kugazara ngapi omu vapeke nava lizuvha nsene o likanganga?— Ayo ya wapa mokutantera gumwe asi: “Ame hansa kukupitakana” ndi?— Jehova ga hara vantu owo ava rugana ngoso ndi?—

Murongi goMunene ga divire vantu ava va ligazarere asi awo mulyo kupitakana vapeke. Awo kwa likangangere vene ntani nokusensa vantu vapeke. Yipo nye ezuva limwe Jesus kwa va simwitilire esimwititi mokuvalikida omu ya kara epuko mokulikanganga vene. Tu ze tu li purakene.

Esimwititi kuna kara lyokuhamena Mufalisayi nomufutisi gomutero. Vafalisayi kwa kere varongi womaukerelikarunga ava narunye ngava moneka asi awo kwa hungama ndi kwa pongoka kupitakana vantu vapeke. Mufalisayi gemesimwititi lyaJesus kwa zire kontembeli zaKarunga moJerusarema a ka kanderere.

Jesus kwa tente hena asi mufutisi gomutero nage kwa zire kontembeli a ka kanderere. Sinzi sovantu kapi va here vafutisi womutero. Awo ngava lizuvhu asi vafutisi womutero ngava va kumbagere. Yosili sinzi sovafutisi womutero kapi ngava hungike nkenye apa.

Pontembeli, Mufalisayi kwa kandererere kwaKarunga monkedi ezi asi: ‘Karunga, tani ku pandura yeeyi ame kapisi munanzo ngwendi vantu vapeke. Ame kapi ani kumbagere vantu ndi ni rugane yininke yoyidona. Ame hena kapi na fana ngwendi gogu mufutisi gomutero. Ame mugara gomuhungami. Ame kudilira nondya ruvali mosivike yipo ni gwane siruwo sokukugazadara. Ame hena kugava kontembeli yiumurongo yeyi ani gwana nayinye.’ Mufalisayi kwa gazarere sili asi age ga pitakana vapeke, ndi ngapi?— Ntani ga yi tanterere Karunga.

Nye mufutisi gomutero kapi ga kere ngoso. Age kapi ga here kutara nampili keguru apa ga kandererere. Age kwa sikamene ure nokunyongeka mutwe gwendi. Mufutisi gomutero kwa liverere unene kuhamena nonzo dendi, makura ta litoona ponturo. Age kapi ga tanterere Karunga asi age muntu gomuwa. Nye age kwa kandererere asi: ‘Karunga, fira nge nkenda, ame munanzo!’

Omu ono kugazara, powo vagara vavali, yilye ogu ga haferere po Karunga? Mufalisayi ogu ga gazarere asi age muntu gomuwa, ndi mufutisi gomutero ogu ga liverere kuhamena nonzo dendi?—

Jesus kwa tente asi mufutisi gomutero yige ga haferere po Karunga. Morwasinke? Jesus kwa tente asi: ‘Yeeyi ogu a linenepeke mwene a kare ngwendi asi age kwa pitakana vantu vapeke, kumununupika, ano ogu a linunupike mwene, kumunenepeka.’—Rukasa 18:9-14.

Sirongwa musinke ga rongere Jesus mesimwititi lyendi?— Age kwa rongere asi epuko mokugazara asi ose kwa pitakana vapeke. Pamwe kapi tatu yi uyunga, nye moyirugana yetu kuvhura tu yi likide asi ose kugazara asi twa pitakana vapeke. Nove wa yi rugana rumwe ndi?— Koneka sihonena somupositoli Peturusa.

Apa Jesus ga tanterere vapositoli vendi asi navenye ngava mu siga apa ngava mu kwata, Peturusa kwa likangangere asi: ‘Nampili navenye ngava ku sige ame kapi ngani ku siga!’ Nye Peturusa mepuko ga kere. Age kwa lihuguvarere mwene unene. Ga ya sigire Jesus. Nampili ngoso, ga litezwilire, ngomu natu ka yi lironga mEgaununo 30 mobuke ezi.—Mateusa 26:31-33.

Tu ze tu tare sihonena santaantani. Nampo nove namukweni tava mu pura mapuro gamwe kosure. Yinke no rugana nsene ove kulimburura usimbu, nye mukweni kuliwora? Yimo, no hafa nsene ono diva malimbururo. Nye kuvhura yi wape mokulihetakanesa namukweni ogu a dili kulimburura usimbu ndi?— Ayo ya wapa nye mokulizerura nyamoge pokuswaura mukweni ndi?—

Eyi yiyo ga rugene Mufalisayi. Age kwa likangangere asi ga pitakana mufutisi gomutero. Nye Murongi goMunene kwa tente asi Mufalisayi mepuko ga kere. Ayo usili asi muntu gumwe kuvhura a rugane yininke yongandi kupitakana mukwawo. Nye eyi kapi yina kutanta asi age sili muwa kupitakana mukwawo.

Yipo nye, nsene twa diva yoyinzi kupitakana muntu gwapeke, kuvhura zi kare nye konda zokulikangangera ndi?— Gazadara ko. Nyamwetu twa rugana mauruvi getu ndi?— Hawe, Karunga yige ga pa nkenye gumwe gwetu uruvi. Ntani sinzi soyininke eyi twa diva, ose kwa yi lirongera kwagumwe gwapeke. Nampo ose kwa yi resa mobuke ndi muntu gumwe ga yi tu tantera. Nampili nsene kuna kohonona po udigu wongandi pwanyamwetu, ngapi omu tuna yi rugana?— Yimo, pokuruganesa uruvi ou ga tu pa Karunga.

Apa muntu a litura mo unene paapa ga hulira, sininke sosiwa koge sokuuyunga eyi nayi mu ninkisa a lizuvhe nawa. Mu tantera asi ono hafere eyi ana rugana. Nampo kuvhura o mu vatere yipo a yi rugane nawa. Eyi yiyo ono hara vantu va ku ruganene, ndi kapisi yimo?—

Vantu vamwe kwa kara nononkondo kupita vakwawo. Ngapi nsene ove kwa kara nononkondo kupitakana mumbyoge ndi mukuroge? Kuvhura zi kare nye konda zokulikangangera ndi?— Hawe. Ado kuna kara nondya edi atu li yido adi tu vatere tu kare nononkondo. Ntani Karunga yige a temesa ezuva nokurokesa mvhura yipo yimeno yi kure, tu gwane ko nondya, ndi kapisi yimo?— Yipo nye natu pandwira Karunga nsene tuna kara nononkondo.—Yirugana 14:16, 17.

Kwato gumwe gwetu ga hara kuzuvha muntu ana kulikanganga mwene,ndi ngapi?— Tu ze tu diworoke nonkango daJesus: “Eyi wa hara asi yiyo nava ku ruganena vantu, nove o yi va ruganene.” Nsene tu rugana ngoso, ose kapi ngatu kara ngwendi Mufalisayi ogu ga likangangere mwene mesimwititi eli ga simwitilire Murongi goMunene.—Rukasa 6:31.

Sikando simwe muntu gumwe kwa tumbwire Jesus asi muwa. Nye Murongi goMunene ga uyungire asi: ‘Nhi, ame ni muwa’ ndi?— Hawe, kapi ga yi uyungire. Nye age kwa tente asi: “Patupu ogu ga wapa, ntudi gumwe tupu, Karunga.” (Marukusa 10:18) Nampili ngomu Murongi goMunene ga kere gokusikilira mo, age kapi ga likangangere mwene. Nye age kwa geve efumano nalinye kwaGuhwe Jehova.

Pweli gumwe ogu natu vhura kulikangangera ndi?— Nhi, pweli. Ose kuvhura kulikangangera Musiti gwetu, Jehova Karunga. Apa atu mono omu lina kukatoka ezuva ndi yisitwa yapeke yokutetukisa, ose kuvhura kutantera muntu asi ‘Karunga gwetu Jehova gokutetukisa yige ga yi sita eyi!’ Tu kare tuna liwapaikire nkenye apa mokuuyunga kuhamena yininke yoyinene eyi ga rugana Jehova ntani neyi nga ka rugana komeho.

Resa eyi ga uyunga Matjangwa kuhamena kulikanganga ntani nokulironga omu natu vhura kunyokera po kulikanganga nyamwetu: Yisewe 16:5, 18; Jeremiya 9:23, 24; 1 Vakolinte 4:7; ntani 13:4.

[Efano pepenuno 113]

Morwasinke ga haferere Karunga mufutisi gomutero kupitakana Mufalisayi?

[Efano pepenuno 115]

Kudiva yoyinzi kupitakana mukweni kukuninkisa o kare muntu gomuwa kumupitakana age ndi?

[Efano pepenuno 115]

Morwasinke ya karera epuko kulikanganga nsene ose nonkondo kupitakana muntu gwapeke?

[Efano pepenuno 116]

Yisinke ana kulikangangera mumati ogu?