Egaununo 109

Jesus ta nyokere varwanesi vendi

JESUS kwa piyaganekere varwanesi vendi womaukarelikarunga yipo va kere nowoma wokumupuragera hena. Makura ta horora kudira kupura kwawo. Ta va pura asi: “Ngapi omu omu gazara one Kristusa, asi munwalye?”

Vafalisayi tava limburura asi: “MunwaNdafita sa.”

Nampili ngomu Jesus kapi ga patanene asi Kristusa ndi Mesiyasa kwa tundilire moruvharo rwaNdafita, ta pura asi: “Ndafita ngapi nye za mu tumbwisisire Mpepo zaKarunga [mEpisarome 110] asi ‘Hompa’? Yeeyi Ndafita ga tente asi: ‘[Jehova, NW] kwa tanterere Hompa gwange asi: Hingira korulyo rwange dogoro noku ngani ninka nonkore doge, di kare ulyatero wonompadi doge.’ ‘Ano nye nsenesi Ndafita kumutumbura asi “Hompa”, ngapi nye omu na kara-kara Mesiyasa hena munwendi?’”

Vafalisayi tava mwena teete, morwa kapi va divire usili kuhamena Kristusa ndi mugwavekwa. Mesiyasa kapi ga kere tupu muntu ogu ga tundilire moruvharo rwaNdafita, ngamoomu va yi pulire Vafalisayi, nye age kwa parukire meguru ntani age kwa kere Hompa gwaNdafita.

Makura Jesus ta pirukire kombunga novarongwa vendi, ta va rondora kuhamena valirongi womatjangwa noVafalisayi. Mokumona asi vantu ava ngava rongo Veta zaKarunga, pokuhingira “posipundi saMosesa,” Jesus ta tumangeda asi: “Omu rugane oku tomu sikisa mo nayinye eyi ava mu tantere.” Ta gwederere ko asi: “Nye walye omu honene yirugana yawo, yeeyi awo kapi ava rugana eyi ava tanta.”

Awo kwa kere vayilipaki, ntani Jesus kwa va nyokerere monkedi zokulifana nomu ga yi rugene pena ga ka lire membo lyoMufalisayi. Age ta tanta asi: “Awo kuyininkira asi yirugana yawo yi moneke kovantu.” Makura ta gava yihonena asi:

“Tareni omu ava dwara maliva gomanene gokupungwira nontanto doVeta zaMosesa.” Pomaliva gawo ngava manga po tupako nokuyidwara poyipara ndi komawoko. Motupako mwa kere mo maruha gane goVeta: Exodus 13:1-10, 11-16; ntani Deuteronomium 6:4-9; 11:13-21. Nye Vafalisayi ngava nenepeke tupako otu mokulikida kovantu asi awo va litura mo moVeta.

Jesus ta twikire asi awo “nonyerera doyikoverero yawo yiwo sa unene womu.” MwaNumeri 15:38-40 Vaisareli kwa va pangerere mokutura nonyerera koyikoverereo yawo, nye Vafalisayi awo kwa nenepekere dawo kupita vapeke. Nayinye ngava yi ruganene mokulimonekesa! Jesus ta tanta hena asi: “Awo kwa hara mavega gomawa.”

Varongwa vaJesus nawo lya va kundamene edowo lyokulinenepeka. Makura Jesus ta va pukurura asi: “Nye one walye omu va tarerere, va mu tumbure asi ‘Varongi,’ yeeyi murongi gweni gumwe tupu, one hena namuvenye vezimo limwe tupu. Nye one hena nagumwe si ngomu tumbura apa pevhu asi ‘Guhyeni,’ yeeyi Guhyeni gumwe tupu, nye age meguru ga kara. One walye hena ava mu tumbura asi ‘Vapitisili,’ yeeyi mupitisili gweni gumwe tupu, Kristusa.” Varongwa va hepere kugusa mo monomutjima dawo edowo lyokuhara kukara gomunene po! Jesus ta tumangeda asi: “Nye gomunene po pokatji keni a kare mukareli gweni.”

Makura ta gava manyokero gomanzi kovalirongi womatjangwa noVafalisayi, pokuruguruka kuvatumbura asi vayilipaki. Ta tanta asi: “One vantu kuvazedilira Untungi weguru, va ha hwilira mo.” “One kulya po nonzugo dovadike nu, ntani nomu lininkisa mu kanderere makanderero gomare.”

Jesus ta uyunga asi: “Vatwiku one!” Ediro lyoVafalisayi lyokufumadeka yininke yopampepo kwa monekere monompango dawo edi va tulire po, ano Jesus ga yi nyokerere. Pasihonena awo kwa tente asi: ‘Muntu nsenesi a gana sizambero, oyo nayimwe si, nye nsenesi a gana ngorodo zomontembeli, yige ana lipe sirugana sokusikisa mo mugano.’ Mokudidilika unene ngorodo zomontembeli kupitakana mulyo gevango lyoukareli, awo kwa likidire asi awo vatwiku pampepo.

Ngamoomu ga yi rugene nare, morwa kuncenuna kwawo Veta, Jesus makura ta nyokere Vafalisayi asi “eyi ya nenepa po moVeta zaKarunga one nombili si nayo: uhungami noufenkenda noulimburukwi.” Awo kwa litulire mo unene mokugava yiumurongo yehidi lyokutovesesa, eyi ya kere ya hana mulyo.

Jesus makura ta tumbura Vafalisayi asi: “One vapitisili wovatwiku, one kudinda ko ndi, nye ngameru tomu minine.” Awo ngava dindi ndi mokinda zawo zovhinyu, kapisi morwa aso simbumburu tupu, nye morwa asi kwa nyete pampo. Nye, kudira kwawo kufumadeka eyi ya nenepa po moVeta kwa yi hetakanesere kokumina ngameru, naso kwa kere sikorama sa nyete pampo. Mateusa 22:41–23:24; Marukusa 12:35-40; Rukasa 20:41-47; Levitikus 11:4, 21-24.

▪ Morwasinke va mwenenene Vafalisayi apa ga va pulire Jesus kuhamena eyi ga uyungire Ndafita mEpisarome 110?

▪ Morwasinke ngava nenepekere Vafalisayi tupako tokupungwira Veta ntani nononyerera doyikoverero yawo?

▪ Mapukururo musinke ga geve Jesus kovarongwa vendi?

▪ Nompango musinke va tulire po Vafalisayi, ntani ngapi omu ga va nyokerere Jesus morwa kuncenuna kwawo eyi ya nenepa po moVeta?