Egaununo 71

Kudira kupura mowina koVafalisayi

VAKURONA womugara ogu ga kere nare mutwiku apa va va zigidire Vafalisayi kwa tjilire. Morwa va divire asi, ntene va mona ogu ana kulikida epuro mwaJesus, makura tava mu tjida mo mosinagoge. Mokukugusa mo mosinagoge o dire kulikwatakana nava wopeke momukunda kuvhura kudigopa, unene po nsene epata lyoge ruhepo. Vakurona vendi kwa kere vana rungarara.

Vafalisayi kwa va pulire asi: “Ogu munweni ogu muna kutanta asi kwa mu reta age mutwiku? Ngapi nye omu ana kumona-mona ntaantani?”

Vakurona vendi tava limburura asi: “Tuna yi diva asi ogu munwetu, nye kwa mu reta age mutwiku. Nye kapi tuna diva omu ana mahuka nogu ana mu mahura, nokumudiva si.” Yosili munwawo ga va tanterere nayinye eyi ya horokere, nye awo kwa limbwilire nonondunge asi: “Mu pureni mwene, amesi mukurona, a uyunge mwene.”

Vafalisayi makura tava zigida rwauvali mugara ogu ga kere mutwiku. Awo kwa hetekere kumutjilisa asi vana gwana maumbangi gokurundira Jesus. Tava mu tantere asi: “PwaKarunga, eyi ono kuuyunga yosili ndi? Ose twa diva asi, mugara ogo munzoni.”

Mugara ogu ga kere nare mutwiku kapi ga patanene eyi va uyungire, age kwa tente asi: “A kare munzoni walye nye, ame nokuyidiva si.” Ta gwederere ko asi: “Simwe tupu na diva ko sesi asi, ame mutwiku na kere, nye ntaantani kuna kumona.”

Mokuhetekera ko kugwana usima mweyi ga uyungire, Vafalisayi kwa mu pulire hena asi: “Ngapi omu ana ku rugana? Meho goge ngapi omu ana ga mahura?”

Mugara ta sivana asi: “Amesi nare na yi mu sansekere, nye one mwa hana kupurakena. Yinke muna kuharera kuyizuvha hena?” Age ta va pura mokuvahadagura asi: “Nani none kuna hara, mu kare varongwa vendi ndi?”

Elimbururo tali handukisa Vafalisayi. Awo makura tava mu swaura asi: “Ntudi nyove murongwa gwendi, ose varongwa vaMosesa. Tuna yi diva asi, Karunga nga uyunga naMosesa. Nye ogo kapi tuna diva asi kupi ana kutunda.”

Mugara kwa tetukire, makura ta limburura nelinunupiko asi: “Sitetu madu sokudira kudiva asi kupi ana kutunda, nye ana mahura meho gange.” Ehuliso musinke va hepere kugwana mo? Mugara ta tumbura egano lyewa asi: “Twa yi diva asi Karunga kapi a zuvhu vanzoni, nye ogu a tjira Karunga oku ta sikisa mo mpango zendi, yige a zuvhu Karunga. Narumwe si kapi ya zuvhika asi muntu ga mahura meho gogu va reta age mutwiku.” Va hepere kuhulisa asi: “Mugara ogu ngano kapi ga tunda mwaKarunga, ngano neisi a vhuru kurugana.”

Vafalisayi kapi va kere neyi yokuuyunga kegano lyangoso lyokuvyukilira. Kapi va vhulire kutambura usili, makura tava swaura mugara asi: “Ove mudima va ku retera monzo, nye yiyo ono hara kuturonga!” Awo makura tava mu tjidire ponze, kutanta asi va mu tjidire mo mosinagoge.

Jesus apa ga zuvhire eyi ya horokere, ta ka gwana mugara gwina, ta mu pura asi: “Ono pura MunwaMuntu ndi?”

Mugara gwina ga kere nare mutwiku ta pura asi: “Yige yilye, Tate, ogu nani vhura kupura?”

Jesus ta limburura asi: “Gogu ana kuuyunga noge, yige.”

Makura ta tu nongoro kosipara sendi ta tanta asi: “Hompa, nina pura.”

Jesus makura ta faturura asi: “Ame epanguro na wizire mouzuni ou, asi vatwiku va mone, ano vanameho va twike.”

Makura Vafalisayi ava va purakenene tava pura asi: “Nani nose tu vatwiku?” Awo ngano va yi tambwire asi awo sili vatwiku, ngano va kere nokonda zokulipopera vene pokurwanesa Jesus. Jesus ta va tantere asi: “Ngano mu vatwiku, ngano one nzo kutupu.” Nye, awo va nyokere kuyitambura asi awo vatwiku ntani asi awo kapi va hepere uzera wopampepo. Jesus ta tanta asi: “Nye yeeyi muna kutanta asi, ‘Ose kumona,’ yiyo nye nazi mu karera nzo.” Johanesa 9:19-41.

▪ Morwasinke vakurona womugara ogu ga kere nare mutwiku va kere nowoma apa va va zigidire Vafalisayi, ntani ngapi omu va limbwilire nonondunge?

▪ Ngapi omu Vafalisayi va hetekerere ko kutjilisa mugara ogu ga kere nare mutwiku?

▪ Egano musinke lyomugara gwina eli lya handukisilire Vafalisayi?

▪ Morwasinke Vafalisayi va dilire kukara nokonda zokulipoperesa pokurwanesa Jesus?