Egaununo 113

Elinunupiko poPaska zokuhulilira

OPETURUSA naJohanesa va ka sikire moJerusarema mokukawapaika Paska, ngamoomu ga va pangerere Jesus. Jesus kumwe novapositoli murongo, awo kwa ka sikire kositenguko. Apa lya gombokere ezuva Jesus novarongwa vendi tava humburuka koNdundu zoMauzwe. Eli kwa kere ezuva lyaJesus lyokuhulilira mokutarurura sitata kutundilira kondundu ezi dogoro konyima zevhumbuko lyendi.

Jesus novarongwa vendi tava ka sika mositata ntani nokuvyuka kembo oku va ka danenene Paska. Awo kwa rondere konzugo zekeguru, oku va ka gwene nayinye vana yi wapaikire kedano lyawo lyoPaska. Jesus kwa ndindilire nononkondo silika esi, ngomu ga uyungire asi: “Ame kwa hara unene kulya Paska ezi kumwe none, ame simpe na hana kumona kanyando.”

Azo kwa kere mpo asi valihamekimo woPaska va hepa kunwa nonkinda ne dovhinyu. Konyima zokutambura nkinda zautatu, Jesus ta pandura Guhwe nokutanta asi: “Guseni mu zi litambagure. Ame tani mu tantere asi, kapi ngani nwa yoyiyimwa yosindjembere nampili nakauke, awo Untungi waKarunga wa hana kuwiza.”

Hava za mokulya, Jesus ta katuka po pompanda, ta hutura sikoverero sendi sokontunda, ta gusa ekehe, nokutjira mema porupasa rokulikuhwira. Azo kwa kere mpo asi, ogu ana kutambura vagenda ga hepere kudivilisa asi nompadi dovagenda va di kuhwe. Nye mokumona asi posilika oso kapi pwa kere mutambuli vagenda, Jesus kwa rugene sirugana esi mwene. Ngano gumwe gomovapositoli ga ruganesere mpito ozo mokuyirugana; nye kwato ogu ga yi rugene, morwa mwa kere simpe malitatano mokatji kawo. Awo kwa lifire nomuga apa Jesus ga tamekere kukuhwa nompadi dawo.

Apa ga ya sikire Jesus pwaPeturusa, age ta mu tantere asi: “Ove nampili kuna ku manga asi o kuhwe nompadi dange!”

Jesus ta mu limburura asi: “Nsene ni dira kukukuhwa, ngano kapi ngo hamena nge.”

Peturusa ta mu limburura asi: “Hompa, kapisi nompadi dange delike no kuhwa, ntudi nomawoko nomutwe nago.”

Jesus ta mu tantere asi: “Ogu a pu kukuhwa neisi hena a hepa, ntudi kooko kumukuhwa nompadi kwelike, makura ta kuhuka namunye. Ano one muna kuhuka, nye kapisi namuvenye.” Age kwa yi uyungilire eyi morwa ga divire asi Judasa Isikalyoto kwa liwapaikilire mokukamuhorora.

Ano apa Jesus ga mene kukuhwa nompadi dawo navenye 12, kukwatera mo nedi domuhoroli gwendi Judasa, ta dwara hena sikoverero sendi sokontunda makura ta hingire hena kosiliro. Makura ta va pura asi: “Muna zuvhu tupu eyi nina mu rugana? One kutumbura nge asi Murongi, Hompa. Uhunga omu tanta, yeeyi sili nyame. Nsenesi ame ni Hompa, Murongi, nina kuhu nompadi deni, none omu lilkuhwa-kuhwe nompadi deni. Moomu nina mu pe sihonena, none omu rugane moomu nina mu rugana. Yosili nina kumutantera asi, mupika kapi a piti hekurwendi, ano zi kare ntumi kapi azi piti ogu a zi tumu. One vanerago ntene mu diva yininke eyi, nye mu yi rugane.”

Eh, sirongwa musi sosiwa selinunupiko! Vapositoli ngano kapi va hepere kulizerura, pokuligazara asi awo mulyo unene yipo asi vapeke va va kerere nkenye apa. Awo va hepere kukwama sihonena esi ga tulisire po Jesus. Kapi ga tulire po mpo zokukuhwa nompadi. Nye kwa tulire po sihonena sokuligava mokukarera wa hana mpongo, mokurugana nkenye karugana. Mateusa 26:20, 21; Marukusa 14:17, 18; Rukasa 22:14-18; 7:44; Johanesa 13:1-17.

▪ Etarururo lyaJesus lyaJerusarema, yisinke lya karera lyokulikarera ngomu ga hwililire mositata mokukadana Paska?

▪ Posiruwo soPaska, nkinda musinke ga pere Jesus vapositoli 12 konyima zokupandura Guhwe?

▪ Sirugana musinke sopampo ngava ruganene vagenda apa ga kere Jesus pevhu, ntani morwasinke va dilire kusirugana apa oJesus novapositoli vendi va dene Paska?

▪ Sitambo musinke ga kere naso Jesus apa ga rugene sirugana sokudira mulyo sokukuhwa nompadi dovapositoli vendi?