Egaununo 112

Paska zokuhulilira zaJesus tazi hedere pepi

NGOMU ezuva 11 lyaNisani moUvali lya ya sikire kehagero, Jesus ta manesa kuronga vapositoli poNdundu zoMauzwe. Alyo kwa kere ezuva lyoyiviyauka! Nampo apa va zire koBetani va ka rare, Jesus ta tantere vapositoli vendi asi: “Muna diva asi mazuva gavali tupu gana hupu ko, makura ngatu dane sipito saPaska. MunwaMuntu yipo ngava mu gava, ngava ka mu pampare [kositji sokukoresa, NW].”

MoUtatu ezuva 12 lyaNisani, Jesus kwa pwizumukire kumwe novapositoli vendi. MoUvali age kwa nyokerere vampitisili womaukarelikarunga moyitarameho, ntani age ga yi nongwenene asi awo kwa here kumudipaga. MoUtatu kapi ga monekere moyitarameho, morwa kapi ga here nkenye aka ka mu donganese mokudira kudana Paska kumwe novapositoli vendi.

Siruwo oso vapristeli wovanene nomasimbi goVajuda taga pongo mosinyanga somupristeli gomunene, gedina Kayifasa. Morwa kuhanduka kweyi ga va uyungilire Jesus, awo kwa tulire po mawapaiko mokumukwata megombeko asi va mu dipage. Nye tava ruguruka kuuyunga asi: “Nye kapisi posipito, neisi napa kara ndjorongani movantu.” Awo kwa tjilire vantu, ava va here Jesus.

Hava za vapitisili womaukarelikarunga mokuliyonga momudona va dipage Jesus, tapa wiza mugenda. Awo kwa tetukire, morwa age kwa kere mupositoli gumwe gwaJesus, Judasa Isikaliyoto, ogu Satana ga hwilire mokutura egano mwendi lyokugombeka Hekurwendi! Awo kwa hefe pokuzuvha Judasa ta pura asi: “Yinke ngomu pa nge, nsenesi ni mu horwera Jesus?” Awo tava lizuvhu mokumufuta yimaliwa 30 yosisiliveli, mfuto ezi ngava randesa mupika kuliza noVeta zaMosesa zomagwanekero. Kutunda opo Judasa makura ta papara nye mpito zongwa zokumuhorora azo mbunga za hana kuyimona.

Ezuva 13 lyaNisani kwa tamekere apa lya ka tokere ezuva moUtatu. Jesus kwa ka tundire koJeliko moUtano, esi kwa kere sikando sautano nasimwe ntani masiku gokuhulilira aga ga kere moBetani. MoUne, ezuva lyokukwama ko, mawapaiko gokuhulilira goPaska ezi za tamekere pokukatoka ezuva, kwa hepere kugarugana. Alyo kwa kere ezuva eli va dipagere nzwi nokuzivava nazinye. Kupi oku ngano va ka danenene sipito, ntani yilye ngano ga wapaikire yininke?

Jesus kapi ga geve simpe nombudi odo, nampo kwa tjilisire asi Judasa a dire ku ka yi tantera vapristeli wovanene yipo va vhure kukwata Jesus posiruwo sedano lyoPaska. Nampo kwa kere moUne kositenguko, Jesus makura ta tumu Peturusa naJohanesa koBetani, nokutanta asi: “Zendeni mu ka tu wapaikire nondya daPaska, tu ka zi lye.”

Makura tava pura asi: “Oku ono hara asi yiko natu ka zi ku wapaikira kupi?”

Jesus ta faturura asi: “Apa nomu ka sika mositata, nomu ka gwanekera nomugara ana simbi kavaza komema. Tomu ka mu kwama dogoro nemembo eli na ka hwilira. Tomu ka tantera nturagumbo asi: ‘Murongi kuna tanta asi: Nzugo ezi nani ya lira Paska kumwe novarongwa vange zipi zo?’ Age na ka mu likida nzugo zonene zekeguru vana wapeke, omo yimo nye nomu ka zi wapaikira.”

Nturangumbo ogu kwa kere murongwa gwaJesus ogu nampo ga ndindililire Jesus mokumuhundira a ruganese embo lyendi kosilika esi sokulikarera. Apa oPeturusa naJohanesa va ka sikire tava ka yi gwana moomu ga va tanterere Jesus. Makura awo tava divilisisa asi nzwi vana zi wapaike ntani nomawapaiko nagenye vana ga tura po kovantu 13 ava va ya dene Paska, Jesus novapositoli vendi 12. Mateusa 26:1-5, 14-19; Marukusa 14:1, 2, 10-16; Rukasa 22:1-13; Exodus 21:32.

▪ Yinke ga rugene Jesus moUtatu ntani morwasinke?

▪ Epongo musinke lya kere pembo lyomupristeli gomunene, ntani sitambo musinke ga zililire Judasa kovapitisili womaukarelikarunga?

▪ Wolye ga tumine Jesus moJerusarema moUne, ntani nositambo musinke?

▪ Yinke va ka gwene ava ga tumine eyi ya likidire hena nonkondo daJesus doyitetu?