Egaununo 114

Murarero gediworoko

KONYIMA apa Jesus ga mene kukuhwa nompadi dovapositoli vendi, age kwa temwininine etjangwa lyEpisarome 41:9, asi: “Ogu ani li nendi nondya, yige a tu nge murungu.” Makura, ta kara nomalimbiliro momwenyo gwendi, ta dukura asi: “Mukweneni gumwe na horora nge.”

Vapositoli tava tameke kuguva nokumupuragera gumwe-nagumwe asi: “Nani panga kapisi nyame?” Nampili Judasa Isikalyoto nage ga pulire. Johanesa, ogu ga hingilire pepi naJesus kosiliro, ta zegamene Jesus nokupura asi: “Hompa, mwene ogo yilye?”

Jesus ta limburura asi: “Gumwe pone navavali, ogu nani vereda nendi posiyaha. MunwaMuntu ngadi mu gwana nomfa moomu va di mu tjangera. Nye nane vakwetu ehudi lyomuntu ogu ana kuhorora MunwaMuntu mutupu omu! Muntu ogo ngano kapi va mu hampuruka, ngano hasa yiwa!” Konyima zoyo, Satana makura ta hwilire momutjima gwaJudasa, ogu gwa donapere. Masiku googo, Jesus ta vyukilire kutumbura Judasa asi “munwezumbano.”

Jesus makura ta tantere Judasa asi: “Eyi ono hara kurugana, yi rugana usimbu.” Vapositoli vakwawo kapi va yi kwete egano eyi ga tembe Jesus. Vamwe kwa gazarere asi morwa Judasa kwa kere nondjato zoyimaliwa, nampo Jesus kuna mu tantere asi: “Ka rande yininke eyi tuna hepere sipito,” ndi ga hepa kuza nokukagava yuma konohepwe.

Apa ga pwege mo Judasa, Jesus ta tulisa po murarero ndi ediworoko lyepe kumwe novapositoli vendi wovalimburukwi. Age ta gusa mboroto, ta pandura Guhwe, ta zi bamagura, a zi va pe, ta tanta asi: “Guseni mu lye.” Age ta faturura asi: “Oru yiro rutu rwange nina kumupa. Omu yi rugane tomu diworokere nge po.”

Apa navenye va mene kulya ko komboroto, Jesus ta gusa nkinda zaune zovhinyu ezi ngava ruganesa mokudana Paska. Ta pandura hena Guhwe, ta zi pe varongwa vendi, ta va tantere va nwaanwe mo, oku ta uyunga asi: “Nkinda ezi egwanekero lyepe lyomohonde zange, ezi ngava mu tjisangera.”

Yosili, eli kwa kere ediworoko lyonomfa daJesus. Ngamoomu ga yi uyungire Jesus, nkenye mvhura mezuva 14 lyaNisani va hepere kuyirugana, mokumudiworokera po. Ava ava kara momurarero kuvadiworokesa kweyi va rugana oJesus noGuhwe vemeguru pokugava ezoworo kovantu kompanguro zonomfa. KoVajuda ava va ya kere vasikuli vaKristusa, murarero ogu kwa pinganena mo Paska.

Egwanekero lyepe kwa li tulisa po etjikango lyohonde zaJesus mokupinganena mo egwanekero lyanare lyoVeta zaMosesa. Jesus Kristusa yige mureti gegwanekero lyepe pokatji konombunga mbali: Jehova Karunga noVakriste ava va gwaveka nompepo zokupongoka wokusika po-144 000. Kugusa ko mokugava edongwenenopo lyononzo, egwanekero lyepe kwa pulisira ewapaiko lyomuhoko gwemeguru govapristeli novahompa. Mateusa 26:21-29; Marukusa 14:18-25; Rukasa 22:19-23; Johanesa 13:18-30; 17:12; 1 Vakolinte 5:7.

▪ Uporofete musinke womoBibeli ga temwininine Jesus kuhamena gumwe govarongwa vendi, ntani sitambo musinke ga yi ruganenene eyi?

▪ Morwasinke va guvililire vapositoli unene, ntani yisinke ga pulire nkenye gumwe gwawo?

▪ Yinke ga tantere Jesus Judasa na rugana, nye ngapi omu vapositoli wokuhupa ko va kwete egano mavyukiso aga?

▪ Sipito musinke ga tamekere Jesus apa ga pwege mo Judasa, ntani sitambo saso musinke sa kere?

▪ Nombunga musinke mbali da kara megwanekero lyepe, ntani yinke ali sikisa mo egwanekero lyepe?