Egaununo 118

Jesus tava mu gombeke nokumukwata

POKATJI komasiku, Judasa kwa pitisilire mbunga zonene zovakwayita novapristeli wovanene noVafalisayi ntani navamwe va ze mosikunino saGesemani. Vapristeli kwa lizuvhire naJudasa mokumufuta yimaliwa 30 yosisiliveli mokuhorora Jesus.

Apa Judasa ga tundire pomurarero goPaska, age kwa vyukililire kuza kovapristeli wovanene. Awo kwa pongaikire usimbu-simbu vakareli vawo kumwe nombunga zovakwayita. Nampo Judasa pomuhowo kwa va twere oku Jesus novapositoli vendi va danenene Paska. Apa va yi dimbwilire asi vana tundu ko, mbunga zonene ezi za simbire yikwata nonoramba nonomini tazi kwama Judasa zi pwage moJerusarema nokupita momuramba gwaKedironi.

Ngomu Judasa ga pitisilire mbunga koNdundu zoMauzwe, age ga divire asi kupi oku nava vhura kugwana Jesus. Morwa apa Jesus novapositoli ngava gendi pokatji kaBetani naJerusarema, awo narunye ngava piti mosikunino saGesemani mokupwizumuka ntani nokusimwitira. Nye morwa kwa kere masiku, ano nampo vakwayita kapi va mu mwene rumwe, ngapi omu ngano va vhulire kumudimburura? Judasa kwa va pere sidiviso asi: “Googu tupu nani ka ncumita, yige googo. Mu kwateni, mu mu tware oku tomu mu nomene nawa-nawa.”

Judasa kwa pitisilire mbunga zonene mosikunino saGesemani, ta mono Jesus kumwe novapositoli vendi, ta vyukilire kwaJesus. Ta uyunga asi: “Moro, Murongi!” Makura ta mu ncumita.

Jesus ta mu tantere asi: “Hewa, rugana eyi ono wizire!” Makura Jesus ta tanta hena asi: “Judasa, MunwaMuntu yige ono kugombekesa kencumito ove?” Jesus makura ta hedere konomini nokonoramba ntani ta pura asi: “Yilye muna kupapara?”

Awo tava limburura asi: “Jesus, Munasareta.”

Ngomu ga sikeme noupenda komeho zawo, Jesus ta va tantere asi: “Nyame ogu.” Vantu kwa tetukire morwa kapi va ndindilire Jesus a kare noupenda wangoso, yipo va tengwire sinderenyima, tava liganda pevhu.

Jesus ta twikire ko hena asi: “Nare na mu tantere asi, nyame ogu. Nsene asi nyame muna kupapara, sigeni ava va ze.” Apa va kere monzugo zekeguru, Jesus ga tanterere oGuhwe mekanderero asi age ga kungire vapositoli vendi wovalimburukwi, kapi pwa zumbanene nampili gumwe “ntudi googu munwezumbano.” Yipo nye, mokuninka asi nonkango dendi di sikilire mo, age kwa pulire asi va sige vasikuli vendi va ze.

Apa vakwayita va litulire, tava sikama, makura tava tameka kumanga Jesus. Ano apa vapositoli va mwene eyi yina kuhara kuhoroka, tava pura asi: “Hompa, tu kamagure nonomfuro ndi?” Komeho Jesus a limburure, Peturusa ta pweza rufuro rumwe ronomfuro mbali edi va simbire vapositoli, ta homokere Malikusa, mukareli gomupristeli gomunene. Peturusa ta sekuna mutwe gomukareli, nye ta kamuna ko kutwi kwendi korulyo.

Jesus ta mu tanterere asi: “Hageka, makura!” Ta gumu kutwi kwaMalikusa, ta verura sironda. Age makura ta va rongo sirongwa somulyo pokupangera Peturusa asi: “Zweka mo rufuro roge mosiraro saro, yeeyi nkenye ogu a kwata rufuro, yiro ngaru mu lya rooro. Nsenesi ni hundira Tate, ove asi a dire kutumina nge mamumbunga gokupita murongo nagavali govaengeli?”

Jesus ga ligeve mokumukwata, morwa ga fatwilire asi: “Ngapi nye ngano omu ngaga sika mo matjangwa, aga aga tanta asi, ngesi yimo ngayi horoka?” Ntani ta gwederere ko asi: “Ove asi ni dire kunwa nkinda ezi ga pa nge Tate ndi?” Age kwa here kurugana mpango zaKarunga.

Makura Jesus ta tantere mbunga asi: “One kuna wiza ngwendi moomu ava wizire munamahaka nonomfuro nonomuramu, mu ya kwate nge. Amesi nkenye ezuva kumwe ngatu hingireni, ame tani rongo montembeli, nye one nokukwata nge si. Nye nayinye eyi kuna kuhorokera asi matjangwa govaporofete ga sike mo.”

Makura mbunga zovakwayita nomupitisili gwawo ntani novakareli woVajuda tava kwata Jesus nokumumanga. Apa va yi mona eyi, vapositoli tava zumbu Jesus. Nampili ngoso, mumatigara gumwe, nampo murongwa Marukusa, kapi ga dukire. Nampo yimo ga kere membo omu ga ka danenene Jesus Paska, apa za zire ko mbunga mokupapara Jesus, ta zi kwama. Konyima, mbunga tazi ya mu dimburura, makura tava hetekere ko asi va mu kwate. Nye age ta va sigire sikoverero sendi makura ta ka duka. Mateusa 26:47-56; Marukusa 14:43-52; Rukasa 22:47-53; Johanesa 17:12; 18:3-12.

▪ Morwasinke ga divilire Judasa asi nava ka gwana Jesus mosikunino saGesemani?

▪ Ngapi omu ga likidire Jesus sinka kovapositoli vendi?

▪ Yinke ga rugene Peturusa mokupopera Jesus, nye yinke ga tanterere Jesus Peturusa?

▪ Ngapi omu ga yi likidire Jesus asi age kwa here kurugana mpango zaKarunga?

▪ Apa vapositoli va zumbire Jesus, yilye ogu ga kere, ntani yinke ya mu horokerere?