Egaununo 131

Jesus ta va monekere yikando yokuhulilira, ntani poPentekoste zomo-33 S.N.

JESUS kwa tulire po mawapaiko yipo vapositoli vendi 11 va ka gwanekere nendi kondundu moGalireya. Varongwa vapeke nawo kwa va tanterere kuhamena epongo eli, ano sivaro sovantu ava va ka pongere kwa pitakanene po-500. Eh, sigongi musi soruhafo sa kere apa ga monekere Jesus nokuvaronga!

Jesus kwa fatwililire emukurumbunga asi Karunga ga mu pa nonkondo nadinye demeguru nedi depevhu. Ta va pamperekeda asi: “Yipo nye nomu zira konomuhoko nadinye, mu ka di ninke di kare varongwa vange, mu ka di kuhwire medina lyaGuhwe neli lyoMuna neli lyoMpepo zoKupongoka. Ka di rongeni, di ka limburukwire nayinye eyi na mu rekera.”

Gazadara ko tupu kweyi! Vagara novakadi novanona, navenye kwa gwene situmbukira esi sokulifana mokulihameka mosirugana sokutura po varongwa. Varwanesi ngava heteka kuhagekesa po ezuvhiso nerongo lyawo, nye Jesus ta va hengagwida asi: “Tareni, ame neni ngani kara dogoro nokouhura wouzuni.” Jesus nga kara novasikuli vendi kupitira mompepo zokupongoka, mokuvavatera va sikise mo sirugana sawo.

Jesus kwa monekerere varongwa vendi mazuva gokusika po-40 kutunda kevhumbuko lyendi. Apa nga va monaikire age nga va rongo kuhamena Uhompa waKarunga, ntani nokunkondopeka yitumbukira yawo ngovarongwa vendi. Posikando simwe ga monekerere hena mumbyendi Jakopo ogu ga dilire kumupura pomuhowo ntani nokumuninka a pure asi age sili Kristusa.

Apa vapositoli va kere simpe moGalireya, Jesus ta va tantere va tengure koJerusarema. Apa ga pongere nawo moJerusarema, ta va tantere asi: “Mwa ha tunda mo moJerusarema, ndindireni eyi ga tumbwidira Tate, eyi na mu tantera. Yeeyi Johanesa nga kuhu nomema, nye one ngava mu kuhwa noMpepo zoKupongoka, kapi napa pita mazuva gomanzi.”

Konyima Jesus ta ligwanekere hena novapositoli vendi makura ta va pwagesa moJerusarema va ze koBetani, mukunda ogu gwa kere posikunkumuko korwaUpumezuva woNdundu zoMauzwe. Kutetukisa, nampili ngomu ga va tanterere nayinye kuhamena etenguro lyendi meguru, awo simpe kwa pulire asi Uhompa wendi ngava u tulisa pevhu. Tava mu pura asi: “Hompa, ntaantani tupu ngesi o tengwidire Vaisraeli nonkondo dokupangera vene sirongo sawo ndi?”

Mevango lyokuhetekera hena kuvyukisa magano gawo gepuko, Jesus ta va limburura tupu asi: “Eyi kapisi yeni yokudiva yiruwo noyinema eyi ga panga Tate mononkondo damwene.” Makura ta tumbura hena sirugana esi ngava rugana pokutanta asi: “One ngava mu zwida nonkondo, apa ngazi wiza Mpepo zoKupongoka pweni, makura ngomu kare nombangi dange moJerusarema nomoJudeya nazinye nomoSamaliya, dogoro nokooku wa ka twa uzuni.”

Hava hokwa mokutara, Jesus ta tameke kuronda meguru, makura eremo tali mu gusa po pwawo. Konyima zokupirura rutu rwendi, makura ta rondo meguru ngomuntu gopampepo. Vapositoli hava za mokuziuka va tare keguru, vagara vavali woyikoverero yoyizera tava moneka pwawo. Vaengeli ava tava tanta asi: “Vagara one woVagalireya, eyi muna sikamene neyi muna kutara keguru hena yinke? Jesus ogu vana mu gusa a ze meguru, yimo ngorooro nga wiza moomu muna mu mono ta zi meguru.”

Monkedi omu Jesus ga zire meguru va hana kuyidiva navenye ntudi vasikuli vendi tupu wokulimburukwa, yimo hena nga ka tengura, ntudi vasikuli vendi wovalimburukwi tupu ngava dimburura ekaropo lyendi mononkondo doUhompa.

Vapositoli makura tava tundu koNdundu zoMauzwe tava piti momuramba gwaKidironi va ze hena moJerusarema. Awo kwa ka kere moomo, mokulimburukwa kompangera zaJesus. Konyima zomazuva murongo, poSipito soVajuda soPentekoste mo-33 S.N., varongwa wokusika pe-120 kwa pongere monzugo zekeguru moJerusarema. Makura sipupiro somuhagaro ngwendi ekundungu tasi zwida nzugo nazinye ezi va hingilire. Tava mono ngwendi maraka gomundiro, aga gana kulihangura, nkenye ogu tali mu tembere limwe, navenye tava tameke kuuyunga maraka peke-peke. Eli kwa kere epowomweno lyompepo zokupongoka ezi ga va tumbwidilire Jesus! Mateusa 28:16-20; Rukasa 24:49-52; 1 Vakolinte 15:5-7; Yirugana 1:3-15; 2:1-4.

▪ Wolye ga pukwilire Jesus pondundu moGalireya, ntani yinke ga va pukwilire?

▪ Ehengagwido musinke ga pere Jesus varongwa vendi, ntani ngapi omu nga kara nawo?

▪ Mazuva gokusika kupi ga monekerere Jesus varongwa vendi ntani yinke ga va rongere?

▪ Muntu musinke ga ka monekerere Jesus, ogu ga dilire muhowo kukara murongwa gwendi komeho zonomfa dendi?

▪ Mapongo musinke gavali ga kere nago Jesus novapositoli vendi, ntani yinke ya horokere poyilika eyi?

▪ Ngapi omu nga ka tengura Jesus monkedi zokulifana ngamoomu ga rondere meguru?

▪ Yinke ya horokere poPentekoste mo-33 S.N.?