Egaununo 132

Jesus korulyo rwaKarunga

EPOWOMWENO lyompepo zokupongoka poPentekoste kwa likidire asi Jesus ga ka sikire meguru. Emoneko eli ga mwene murongwa Sitefanesa nalyo kwa likidire hena asi Jesus ga ka sikire. Komeho tupu zokumudipaga nomamanya morwa ezuvhiso lyendi lyoulimburukwi, Sitefanesa kwa uyungire asi: “Tareni, ame kuna kumona eguru lina zeguruka, ano MunwaMuntu age kuna sikama korulyo rwaKarunga.”

Korulyo rwaKarunga, age kwa ndindilire mpangera koGuhwe asi: “Pangera [mokatji, NW] kononkore doge.” Nye siruwo oso ga ndindilire dogoro noku nga rwanesa nonkore dendi, yinke ga rugene Jesus? Age kwa pangerere varongwa vendi wovagwavekwa, mokuvapitisira mosirugana sawo sokuzuvhisa, nokuvawapaika va ka kare vahompa kumwe nendi moUhompa woGuhwe.

Pasihonena, Jesus kwa horowere Sauru (konyima kwa ya mu divire kedina lyendi lyoRuroma asi Paurusa) mokutwara komeho sirugana sokutura po varongwa moyirongo yapeke. Nampili ngomu ga kere Sauru noupampi noVeta zaKarunga, nye kwa mu pukisire vampitisili woukarelikarunga woVajuda. Ngoyitundwamo, age kwa pende edipago lyaSitefanesa, ntani hena nepulisiro lyomupristeli gomunene Kayifasa kwa zire koDamasikusi asi a ka kwate vasikuli vaJesus wovagara nava wovakadi, a ka va rete koJerusarema. Nampili ngoso, age simpe kuna kugenda monzira, ga liharuka ko, uzera wokutunda meguru tau mu temene, makura ta ligandere pevhu.

Makura ezwi tali tanta asi: “Sauru, Sauru, yinke ono kuhepekera nge?” Age ta pura asi: “Nyove yilye, Hompa?”

Hompa ta limburura asi: “Nyame Jesus ogu ono kuhepeka.”

Sauru ogu ga dilire kuvhura kumona morwa uzera wositetu, kwa mu tanterere Jesus a ze moDamasikusi nokundindira eyi nava ka mu tantera. Makura Jesus ta monekere murongwa gwendi gumwe, Ananiyasa. Jesus ta tantere Ananiyasa kuhamena Sauru asi: “Zende, yeeyi age siruganeso sange na horowora, a divise edina lyange kovapagani nokohompa nokomuhoko gwaIsraeli.”

Nevatero lyaJesus, Paurusa novazuvhisi vapeke ya va tompokere unene mosirugana sawo sokuzuvhisa nokuronga. Konyara nomvhura 25 konyima apa ga mu monekerere Jesus monzira zokuza koDamasikusi, Paurusa kwa tjenge asi: “Mbudi ezi kwa zi udisira nkenye sisitwa somouzuni.”

Konyima zonomvhura dononzi, Jesus kwa geve mamoneko komupositoli Johanesa ogu ga here. Kupitira momamoneko aga ga singonona Johanesa mobuke zEhororo, age ga mwene etenguro lyaJesus mononkondo doUhompa. Johanesa kwa tente asi kupitira “moMpepo” age kwa mu twere “mezuva lyaHompa.” ‘Ezuva’ musinke eli?

Pokukonakona nawa mauporofete goBibeli, kukwatera mo uporofete waJesus mwene kuhamena mazuva gopouhura, ayo kulikida asi ‘ezuva lyaHompa’ kwa tamekere momvhura 1914! Momvhura 1914 yipo ga ka tengwire Jesus awo vantu va hana kuyimona, ntudi vakareli vendi wovalimburukwi tupu yiwo va yi divire. Momvhura ozo Jehova ga pere Jesus mpangera zokupangera mokatji kononkore dendi!

Pokulimburukwa mpangera zoGuhwe, Jesus ta tjida mo meguru Satana nonompepo dendi donondona, pokuvazugimina pevhu. Konyima zokumona yininke eyi memoneko, Johanesa ta zuvhu ezwi meguru tali divisa asi: “Ntaantani eparu nononkondo noUntungi yaKarunga gwetu, nepangero lyaKristusa gwendi.” Yimo, mo-1914 yipo ga tamekere Kristusa kupangera ngoHompa!

Azo kwa kere mbudi zongwa kovakareli vaJehova vemeguru! Awo kwa va tumangedere asi: “Hafa ove eguru nava va kara mo!” Nye ukaro musinke wa kere pevhu? Ezwi meguru tali twikire asi: “Nye nane vakwetu ava mwa kara pevhu nemefuta, yeeyi Muzonaguli ana hegumukire kweni nehandu lyenene, morwa ana diva asi siruwo sendi esi sina hupu ko, sisupi!”

Ose ngesi kuna kuparuka mosiruwo oso sosisupi. Ngesi vantu kuna kulikida nsene asi va wapera kuza mouzuni woupe waKarunga ndi kezonauko. Usili kuna kara asi, meho zoge kuna kuzitokora ngesi kupitira omu o tambura mbudi zongwa zoUhompa waKaunga ezi vana kuzuvhisira uzuni mudima mepitisiro lyaKristusa.

Jesus Kristusa makura nga kara mutumwa gwaKarunga mokugusa po uzuni waSatana ntani nowo ava u kwatesa ko. Jesus nga ka yi sikisa mo eyi yokugusa po vadinikarunga poyita eyi ava tumbura moBibeli asi Harumagedoni. Konyima zoyo, Jesus nga ka kwata Satana nonompepo dendi donondona nokukadimanga “monomango” nomumvho eyovi limwe. Mokukwama kwaJehova, Jesus yige muntu gwauvali gomulyo po koyisitwa nayinye! Yirugana 7:55-60; 8:1-3; 9:1-19; 16:6-10; Episarome 110:1, 2; Vahebeli 10:12, 13; 1 Peturusa 3:22; Rukasa 22:28-30; Vakorosi 1:13, 23; Ehororo 1:1, 10; 12:7-12; 16:14-16; 20:1-3; Mateusa 24:14.

▪ Konyima apa ga tengwire Jesus meguru, kupi oku ga ka kere ntani yinke ga ka ndindilire?

▪ Wolye ga pangerere Jesus konyima apa ga tengwire meguru, ntani ngapi omu ga u likidire upangeli wendi?

▪ Siruwoke lya tamekere ‘ezuva lyaHompa,’ ntani yinke ya horokere apa lya tamekere?

▪ Ngapi omu sirugana sokuzuvhisa sina kukundama nkenye gumwe gwetu?

▪ Apa ngasi pwa sirugana esi sokuzuvhisa, yihorokwa musinke ngayi kwama ko?