Egaununo 25

Kuvhura owo ava rugana yoyidona va litjindje ndi?

KAPI nayi wapa nsene nkenye gumwe a rugana yoyiwa ndi?— Nye kwato ogu a rugana nkenye apa yininke yoyiwa. Ono yi diva asi morwasinke natuvenye atu ruganene yoyidona poyiruwo yimwe, nampili tuna hara kurugana yoyiwa ndi?— Morwa natuvenye kwa pinga nzo. Nye vantu vamwe kurugana unene yininke yoyidona. Awo kwa nyenga vantu vakwawo ntani nokuvakoresa mowina. Omu ono kugazara, kuvhura va litjindje nokulironga kurugana yoyiwa ndi?—

Tara mumatigara ogu ana kutakamesa yikoverero yava vana kutoona Sitefanesa nomamanya. Edina lyendi lyoRuhebeli Sauru, nye lyoRuroma Paurusa. Age kwa hefe asi Sitefanesa, murongwa goMurongi goMunene, kuna kumudipaga. Tu ze tu tare tanko eyi Sauru ga ruganenene yininke yoyidona.

Sauru kwa hamenene kombunga zoukerelikarunga woVajuda ezi ngava tumbura asi Vafalisayi. Vafalisayi va kere noNonkango daKarunga, nye awo kwa kweme unene marongo govampitisili vawo vamwe womaukerelikarunga. Eyi yiyo ya ninkisire Sauru a rugane yininke yoyidona.

Sauru yipo ga kere apa va kwete Sitefanesa moJerusarema. Sitefanesa kwa mu twere kompanguro, oku kwa kere vapanguli vamwe woVafalisayi. Nampili ngomu Sitefanesa va mu uyungire momudona, age kapi ga kere nowoma. Age kwa uyungire nouradi nokugava umbangi wene-wene kovapanguli kuhamena Jehova Karunga ntani naJesus.

Nye vapanguli owo kapi va here eyi ga uyungire. Awo va zuvhire nare yoyinzi kuhamena Jesus. Ano karuwogona tupu ka pitire po kutunda apa va dipagere Jesus! Nye, Jehova ga vhumbwire Jesus keparu lyemeguru. Mevango lyokutjindja nonkedi dawo, vapanguli kwa rwanesere varongwa vaJesus.

Vapanguli kwa kwete Sitefanesa nokumukokera ponze zositata. Awo kwa mu ganderere pevhu nokumuzuguma mamanya. Ngomu ono kuyimona pefano, Sauru kwa sikeme a tarere. Age kwa gazarere asi ya wapa mokudipaga Sitefanesa.

Ono yi diva asi morwasinke Sauru ga gazarerere ngoso ndi?— Sauru kwa kere Mufalisayi, ntani age ga pulire asi marongo goVafalisayi mouhunga ga kere. Ntani age kwa tere Vafalisayi asi ngosihonena na vhura kutemwinina.—Yirugana 7:54-60.

Konyima zokudipaga Sitefanesa, yinke ga rugene Sauru?— Age kwa hetekerere ko mokuhanagura po varongwa vaJesus ava va hupire po! Age nga zi momambo gawo nokupurututa vagara novakadi, makura ta va tura modorongo. Sinzi sovarongwa va hepere kutunda mo moJerusarema, nye kapi va hagekere kuzuvhisa kuhamena Jesus.—Yirugana 8:1-4.

Eyi yiyo ya ninkisire Sauru a nyenge unene varongwa vaJesus. Yipo ga zire koMupristeli goMunene Kayifasa nokukagwana epulisiro mokukakwata Vakriste mositata saDamasikusi. Sauru kwa here kukavareta ngovanadorongo moJerusarema makura va ya va tengeke. Nye monzira zendi zokuza koDamasikusi, tapa horoka sininke sokutetukisa.

Uzera wokutunda meguru tau mu temene, makura ezwi tali tanta asi: “Sauru, Sauru, yinke ono kuhepekera nge?” Alyo kwa kere ezwi lyaJesus! Uzera kwa temene unene yipo wa ninkisire Sauru a dire kumona, ano ava ga gendere nawo yiwo va mu kwete kokuwoko, va mu tware koDamasikusi.

Konyima zomazuva gatatu, Jesus ta monekere memoneko murongwa gwendi gumwe gomoDamasikusi gedina Ananiyasa. Jesus kwa tanterere Ananiyasa mokukadingura Sauru nokukauyunga nendi ntani nokukamuninka a ka mone hena. Apa Ananiyasa ga mu uyungisire, Sauru ta tambura usili kuhamena Jesus. Makura ta tameke kumona hena. Eparu lyendi nalinye kwa li tjindjire, ano ta ya kara mukareli gomulimburukwi gwaKarunga.—Yirugana 9:1-22.

Ono yi kwata egano nye asi morwasinke Sauru nga ruganene yoyidona ndi?— Morwa age kwa mu rongere yininke yepuko. Age kwa kweme vantu ava ngava dili kulimburukwa kwaKarunga. Ntani age kwa heme kombunga zovantu ezi za tulire komeho magano govantu kupitakana Nonkango daKarunga. Nampili ngomu ya kere asi Vafalisayi vakwawo kwa twikilire kurwanesa Karunga, morwasinke Sauru ga tjindjilire eparu lyendi nokutameka kurugana yoyiwa?— Morwa Sauru kapi ga nyengere nawa-nawa usili. Apa ga lirongere yininke youhunga age ga liwapaikilire mokuyirugana.

Ono yi diva asi konyima Sauru muntu musinke ga ya kere ndi?— Yimo, age kwa ya divikwire asi mupositoli Paurusa, mupositoli gwaJesus. Ntani diworoka asi Paurusa kwa tjenge nobuke dononzi moBibeli kupitakana vatjangi vapeke.

Pwa kara vantu wovanzi ngwendi Sauru ava nava vhura kulitjindja. Nye ayo kapi ya kara ureru morwa pweli gumwe ogu a rugana unene mokuninka vantu va rugane yininke yoyidona. Ono diva asi yige yilye ndi?— Jesus ga uyungire kumuhamena apa ga monekerere Sauru monzira zokuza koDamasikusi. Jesus kwa uyungire naSauru kutundilira meguru nokutanta asi: ‘Ame kuna kukutuma ngo ka mahure meho govantu, ngava sige mundema va wize kouzera, ngava tunde mononkondo daSatana, ngava hame kwaKarunga.’—Yirugana 26:17, 18.

Yimo, age kuna kara Satana Muzonaguli ogu ana kuhetekera ko mokuninka nkenye ogu a rugane yininke yoyidona. Ove kukudigopera poyiruwo yimwe mokurugana eyi ya hungama ndi?— Natuvenye kutudigopera. Satana yige a yi digopesa. Nye pwa kara konda zimwe hena eyi ayi dilire kuturerupira nkenye apa mokurugana yininke youhunga. Wa diva asi konda musinke ozo?— Morwa kwa tu reta mononzo.

Morwa nzo, ureru kurugana yoyidona kupitakana kurugana yoyiwa. Makura yinke nye natu vhura kurugana?— Yimo, twa hepa kukondja mokurugana yoyiwa. Nsene tu rugana ngoso, ose kuvhura tu kare nehuguvaro asi Jesus, ogu ga tu hara, nga tu vatera.

Apa Jesus ga kere pevhu, ga likidire eharo kovantu ava ngava rugana yininke yoyidona nye konyima va ya litjindjire. Ga yi divire omu ya kere noudigu kwawo mokulitjindja. Pasihonena, pwa kere vakadi ava ngava rara novagara wovanzi. Eyi kwa kere yininke yoyidona. Bibeli kutumbura vakadi owo asi nohondedi.

Apa mukadi gumwe gohondedi ga zuvhire kuhamena Jesus, ta wiza membo lyoMufalisayi omu ga kere Jesus. Age kwa tjilire magadi konompadi daJesus. Makura ta kokota mahodi gendi konompadi daJesus nonohuki dendi dokomutwe. Age kwa liverere unene nonzo dendi, yipo Jesus ga di mu dongwenenene po. Nye Vafalisayi kapi va yi gazarere asi age ngano kuvhura va mu dongwenene po.—Rukasa 7:36-50.

Ono yi diva asi posiruwo simwe, yisinke ga tanterere Jesus Vafalisayi vamwe?— Age kwa va tanterere asi: ‘Nohondedi yido ngadi ka mu lihovera kuza moUntungi waKarunga.’ (Mateusa 21:31) Jesus kwa uyungilire eyi morwa nohondedi kwa pulire mwendi ntani ado da tjindjire nkareso zado zondona. Nye Vafalisayi awo ngava twikire kurugana yininke yoyidona kovarongwa vaJesus.

Yipo nye, nsene Bibeli tazi likida asi eyi tuna kurugana yidona, twa hepa kukara neharo lyokulitjindja. Ntani apa atu lirongo eyi ana hara Jehova tu rugane, twa hepa kukara neharo lyokuyirugana. Makura Jehova nga tu hafera ntani nga tu pa mwenyo gwanarunye.

Mokutuvatera tu nyokere po kurugana yininke yoyidona, tu ze tu rese kumwe Episarome 119:9-11; Yisewe 3:5-7; ntani 12:15.

[Efano pepenuno 133]

Morwasinke ga gazarere Sauru asi ya wapa kudipaga Sitefanesa?

[Efano pepenuno 135]

Yilye ogu ga uyungire naSauru, ntani yinke ga tumine Sauru a ka rugane?

[Efano pepenuno 136]

Morwasinke ga dongwenenene po Jesus mukadi ogu nga rugana yininke yoyidona?