Egaununo 1
Ove kuvhura kukara nomeho zerago!
1, 2. Yisinke ana hara Musiti goge koge?
ELIDINGILIRO lyomutjima nagunye lyokutunda kogu wa hara. Yizoresa yoruhafo posiruwo sokulya youtovara kumwe novakaume woge wokuhara. Ruhafo pokumona vana woge vana kudana awo vana hafa. Yiruwo ngwendi yeeyi ayo kureta ruhafo meparu. Nye kwavamwe wovanzi kumoneka asi eparu ngwendi udigu wounene wokutwaredesa koukwawo. Nsene nove yimo ono kuyilimonena, kwata mutjima.
2 Eli eharo lyaKarunga asi o hafere erago lyokupukura momukunda gokutetura moukaro wouwa. Ezi kapisi nzodi tupu, hawe, morwa Karunga kuna hara kukupa nsapi zokutwaredera dogoro komeho zerago. Nsapi zina yilyo ediwo.
3. Ediwo musinke eli lya kara nsapi zokutwara kerago, ntani morwasinke natu karera mousili asi Karunga kuvhura kugava ediwo lina?
3 Ose kuna kuuyunga kediwo lyokulikarera lyanenepa kupita unongo wovantu. Alyo “ediwo lyaKarunga.” (Yisewe 2:5, NW) Konyara nomvhura 2 000 dina ka pita, mutjangi goBibeli kwa tente asi: “Nkenye embo muntu a li tungu, nye mutungi gwanayinye, yige Karunga.” (Vahebeli 3:4) Gazara tupu asi ediwo musinke ga kara nalyo Murugani goyininke nayinye! Bibeli kutanta asi Karunga kuvara nombungururu nadinye nokudipa madina. Egano musinke lyositetu mokumona asi mayovi gomamiliyona gonombungururu kulikwama mononzira dado, ano valirongi wonombungururu kutanta asi kwa kara po mayovi gomamiliyona mononzira peke! (Episarome 147:4) Karunga ga diva hena nayinye yokuhamena kwetu; yilye nagepeke nampo gokuvhura kugava malimbururo gomawa komapuro aga gomulyo kuhamena eparu?—Mateusa 10:30.
4. Morwasinke natu ndindilira asi Karunga nga tu pa mapukururo mokutupitisira, ntani buke musinke azi gava mosihepwa esi?
4 Fanekesa vagara vavali vana kukambadara kuwapeka matuwa gawo. Mokunyanyena, gumwe ta zuguma yiruganeso yendi. Gumwe ta wapeke udigu wina nawa nelituromo, ta pirura nsapi zokuhwamekesa nokumenyamenya nsene indjina tazi kwata nokuvareka kugenda. Kapi nayi kudigopera mokudimburura asi yilye po gumwe pwava vavali ga kere nobuke zomapukururo zomupangeli. Kapi yina kutanta yuma asi Karunga kwa gava mapukururo mokutupitisira meparu lyetu ndi? Moomu tupu wa yi diva, yimo nawa-nawa za tanta Bibeli—buke zomapukururo nepitisiro ezi za tunda koMusiti gwetu, oyo kwa tamba kukara nediwo lyaKarunga.—2 Timoteusa 3:16.
5. Ngapi omu lya kara nomulyo ediwo eli lya kara moBibeli?
5 Gazara tupu asi emona musinke lyediwo lya kara moBibeli nsene asi ntambo zina usili! MoYisewe 2:1-5 kwa kutukorangeda asi tu papare unongo, mokusima eyi ngwendi nyose ava tuna kulisimina emona lyokuhoreka—kapisi mevhu lyomagazaro govantu hawe, nye nani moNonkango damwene Karunga. Nsene tatu u papara mwina, tatu ka gwana ‘ediwo lyaKarunga.’ Mokumona asi Karunga kukwata egano mayereko noyihepwa yetu, age kutupa mapukururo aga naga tu vatera kutupitisira keparu lyombili nerago. (Episarome 103:14; Jesaya 48:17) Ntani hena, ediwo lyaKarunga kwa gava mbudi zongwa zoruhafo kwetu.
MWENYO GWANARUNYE!
6. Usili musinke ga gavere Jesus Kristusa kuhamena ediwo lyaKarunga?
6 Muntu ogu ga divikwa momahistoli Jesus Kristusa ga zeresere ko kuhamena yidiviso yediwo lyaKarunga. Age kwa tente asi: “Mwenyo gwanarunye, yigo ogu asi va ku dive, asi nyovelike Karunga gosili, nogu wa tuma, Jesus Kristusa.” (Johanesa 17:3, nonkango nyose twa di hendameka.) Gazara tupu—ediwo lyokutwara komwenyo gwanarunye!
7. Yisinke yina kulikida asi kapi sa kere sitambo saKarunga asi tu fe?
7 Wa ha tjida mwenyo gwanarunye usimbu ngwendi asi nzodi tupu. Hansa, tara konkedi omu va sitire rutu romuntu. Kwa ru tura pasitetu mokumakera nokuzuvha nokufumbwira nokumona nelizuvho. Pwa kara yininke yoyinzi pevhu eyi ayi hafesa nondunge detu—nondya donongwa nomarudimbo goyidira gomawa nonombya dedumba lyewa nomavega gomawa gokuzera noukaume wouwa wokuhafera! Ntani uruvi wetu wokutetukisa awo kwa pitakana kompiuta zonene, awo kutuninkisa tu tambure nokuhafera yininke nayinye eyi. To gazara nye asi Musiti gwetu kwa hara asi tu fe tu zumbanese yininke nayinye eyi? Kapi tapa kara nye nokonda mokuwiza pehageso asi age kwa hara tu kwame eparu lyerago noku ka hafera mwenyo gwanarunye ndi? Yimo, eyi yiyo nali ka tanta ediwo lyaKarunga koge.
EPARU MOPARADISA
8. Yisinke azi tanta koBibeli kuhamena meho zovantu?
8 Eyi azi tanta Bibeli kuhamena meho zevhu novantu, kuyitura monkango zimwe—Paradisa! Jesus Kristusa ga uyungire ko apa ga tanterere gwina mugara ga fire asi: “To ka kara kumwe name moParadisa.” (Rukasa 23:43) Etumburo lyoParadisa lya vhulire kugazaresa mugara gwina keparu lyerago lyovakurona vetu wopomuhowo, Adamu naEva. Apa ga va sitire Karunga, kwa kere vana sikilire mo ntani awo kwa parukire mosikunino soufuuli esi ga tulire po Musiti. Eyi yasi waperere kusitumbura asi sipata saEdeni, edina olyo ali likida kuhafera.
9. Ngapi omu lya kere eparu moParadisa zopomuhowo?
9 Ee, uwa musinke sa kere sipata sina! Ozina, paradisa zousili. Yitji yimwe yoyiwa kwa yimine enyango lyewa. Apa nye va ya nongwenene oAdamu naEva mukunda gwawo, va nwe komema gomatovara nokunyanga kenyango lyokoyitji, kapi kwa kere konda kwawo mokukara nosinka ndi nowoma. Nampili yikorama kapi ya kere nosiponga, morwa Karunga kwa pere mugara nomukadi epangero lyeharo kwanayinye. Mepakerero, vantu wopomuhowo kwa hafererere ukanguki wouwa. Ngano kwa kere noulimburukwi kwa Karunga, ngano va kere nomeho zerago lyanarunye. Awo kwa va pere sirugana sombili mokutakamesa sikunino sawo soParadisa. Simpe Karunga kwa gavere mpangera kwaAdamu naEva va ‘zwide evhu nokulipangera.’ Awo novana vawo ngano va nenepekere Paradisa dogoro evhu lyetu nalinye ngano lya kere evega lyewa lyoruhafo.—Genesis 1:28.
10. Yisinke ga kere nayo Jesus megano apa ga uyungire kuhamena koParadisa?
10 Nye Jesus apa ga tumbwire Paradisa, kapi ga pulire gwina mugara ga fire asi ngano a gazare ko zina za pita nare. Hawe, Jesus kwa uyungire zokomeho! Age ga yi divire asi evhu lyetu nalinye ngali kara paradisa. Karunga nga ka tengwidira po sitambo sendi sopomuhowo kuhamena vantu nevhu. (Jesaya 55:10, 11) Yimo, Paradisa ngava zi wapukurura! Ngapi omu ngazi ka kara? Siga Nonkango daKarunga, Bibeli zoKupongoka, zi limburure.
EPARU MOPARADISA ZOKUWAPUKURURA
11. Yisinke ngayi ka horoka kuhamena uvera noukurupe nonomfa moParadisa zokuwapukurura?
11 Uvera noukurupe nonomfa kapi ngayi kara ko hena. “Vatwiku ngava vhura kumona ko noyipurupuru ngayi zuvha ko. Yirema yomondambo ngayi lidinkura tayi dana, ano yipurupuru ngayi dimba unene.” (Jesaya 35:5, 6) “Karunga mwene nga kara [povantu], a kare Karunga gwawo. Ano Karunga nga kokota mahodi nagenye komeho gawo. Nomfa kapi hena ngadi kara ko, neguwo si nomalirankali nokukora kapi ngayi kara ko hena, yeeyi yininke yomuhowo yina dimi po.”—Ehororo 21:3, 4.
12. Morwasinke natu karera mousili asi moParadisa zokomeho kapi ngamu ka kara yirugana yoyidona nonyanya noudinikarunga?
12 Yirugana yoyidona nonyanya noudinikarunga ngava ka yi hanagura po narunye. “Vadinikarunga ngava va mana po . . . Karuwogona tupu ko, mudinikarunga ta dongonoka po . . . kapi ngo mu gwana. Valinunupiki yiwo ngava hingira sirongo.” (Episarome 37:9-11) “Nye Karunga nga nyafura mo vadinikarunga mosirongo, ano vananzo nga va dura mo moomu ava dura yimeno mevhu.”—Yisewe 2:22.
13. Ngapi omu nga ka retesa po Karunga mbili?
13 Mbili ngazi pangera evhu nalinye. “Age [Karunga] kwa hageka yita mouzuni mudima; ga tezagura mauta, yiyo ga haraganesa magonga.” (Episarome 46:9) “Uhungami ngano tau lihana . . . , mpora ngazi kare ko dogoro noku ngaku diminina kwedi.”—Episarome 72:7.
14, 15. Yisinke za tanta koBibeli kuhamena mambo noyirugana nonondya moParadisa zokuwapukurura?
14 Kapi ngaku ka pira hena mambo ano yirugana ngayi ka kara yombili. “Vantu ngava litungira mambo omu ngava kara . . . . Awo ngava tapeka moyipata, tava lipanda vhinyu—azo kapi ngava zi nwa vapeke. Vantu vange, ngava kara nomwenyo gomure ngwendi yitji. Awo ngava hafera unene yininke eyi va rugana vene. Yirugana eyi ava rugana ngayi ragopa, ano vanona vawo, kapi ngava gwanekera nomaudigu.”—Jesaya 65:21-23.
15 Ngapa kara nondya dononzi dokukanguka. “Ewogo lyoyisima ngano tali kara mosirongo; nondundu ngano tadi zura muzangu.” (Episarome 72:16) “Mapya gana tundu muzangu gwago; Karunga, Karunga gwetu a tu tungike.”—Episarome 67:6.
16. Morwasinke ngali karera eparu moParadisa lyokuhafera?
16 Mwenyo gwanarunye pevhu moparadisa ngagu kara gokuhafera. “Muhungami nga gusa sirongo nga tunge mo narunye-narunye.” (Episarome 37:29) “Mburundu ngazi hafa, ano nombya ngadi temuna mowiza.”—Jesaya 35:1.
EDIWO NOMEHO ZOGE
17. (a) Yisinke wa hepa kurugana nsene asi eparu lyomoParadisa kuna kukukoka? (b) Ngapi omu tuna yi diva asi Karunga ta ka reta po malisinto gomanene pevhu?
17 Nsene asi eparu moParadisa kuna kukukoka, ya ha ku kandana nkenye eyi mokugwana ediwo lyaKarunga. Age kwa hara vantu, hena nga ka reta po malisinto mokukaninka evhu li ka kare paradisa. Ngano nyove wa kere nononkondo dokutulisa po ehagekeso lyeguwo nouhahungami ou una kara ngesi mouzuni, amesi ngano wa yi rugana, ndi kapisi yimo? Kapi tatu yi ndindire nye asi Karunga nga ka yi rugana ndi? Bibeli kuna kutupa nawa-nawa ezereso lyosiruwo esi Karunga nga ka zeresa uzuni ou womaudigu moku ka pinganesera mo epangero lyokusikilira mo lyouhungami. (Ndaniyera 2:44) Nye Bibeli kapi zina kututantera tupu yeeyi yelike. Azo kuna kutulikida asi ngapi omu ngatu ka paruka mouzuni woupe ou ga tumbwidira Karunga.—2 Peturusa 3:13; 1 Johanesa 2:17.
18. Yisinke nali vhura kukuruganena ediwo lyaKarunga ntaantani?
18 Ediwo lyaKarunga kuvhura kukuruganena yoyinzi nampili ntaantani. Sinzi somapuro gomadigu aga aga hepeke vantu kugalimburura moBibeli. Nsene asi ove to tambura epitisiro lyamo, ngayi ku vatera kutunga po ukaume naKarunga. Ee, uwa musi kounene! Nayi kuninkisa o hafere mbili ezi a gava Karunga gelike. (Varoma 15:13, 33) Nsene to vareke kutambura ediwo eli lyohepero unene, ono rugana sininke somulyo netungiko lyeparu lyoge. Kapi ngo livera asi yeeyi wa gwana ediwo lyaKarunga eli ali twara komwenyo gwanarunye.
19. Epuro musinke ngatu ka zogera ko megaununo lyokukwama ko?
19 Ose kuna kulikida koBibeli asi yizo buke za kwata ediwo lyaKarunga. Nye ngapi omu twa yi diva asi kapisi buke zounongo wovantu, nye sininke sanenepa unene? Ngatu ka zogera epuro eli megaununo lyokukwama ko.
KONA-KONA EDIWO LYOGE
Morwasinke nali vhulira ediwo lyaKarunga kukutwara kerago lyanarunye?
Ngapi omu ngali ka fana eparu pevhu moParadisa ozo zina kuwiza?
Morwasinke ngo ka gwanena mo uwa nsene to tambura ediwo lyaKarunga ntaantani?