Sirongwa 5

Vakaume vaKarunga ngava ka paruka moparadisa

Paradisa kapi ngazi ka fana ngwendi uzuni omu tuna kuparuka ngesi. Karunga kapi ga here evhu va li zwide noudigu nomaruhodi nokukora ntani ruhepo. Komeho, Karunga nga ka rugana evhu paradisa. Ngapi omu ngazi ka fana Paradisa? Tu ze tu tare eyi zina kutanta Bibeli:

Vantu wovawa. Paradisa ngazi kara embo lyovakaume vaKarunga. Awo ngava ka liruganena-ruganena yininke yoyiwa. Awo ngava ka paruka kuliza nononzira douhungami daKarunga.—Yisewe 2:21.

Ewogo lyonondya. MoParadisa, kapi ngamu ka kara nzara. Bibeli kuna kutanta asi: “Ewogo lyoyisima [ndi yikulya] ngano tali kara mosirongo.”—Episarome 72:16.

Mambo gomawa noyirugana yokuhafera. MoParadisa pevhu, nkenye epata ngali kara nembo lyalyene. Nkenye gumwe nga ka rugana yirugana yokureta ehafo lyosili.—Jesaya 65:21-23.

Mbili mouzuni mudima. Kapi ngaku ka kara hena vantu wokukarwa ndi wokufa moyita. Nonkango daKarunga kuna kutanta asi: ‘Karunga kwa hageka yita.’—Episarome 46:8, 9.

Ukanguki wouwa. Bibeli kwa tumbwidira asi: “Nagumwe si [gomoParadisa] nga sivana asi ta vere.” (Jesaya 33:24) Hena, nagumwe si nga ka kara sirema ndi mutwiku ndi sipurupuru ndi a pire kukauyunga.—Jesaya 35:5, 6.

Ehageso lyokukora noruhodi nonomfa. Nonkango daKarunga kuna kutanta asi: “Nomfa kapi hena ngadi kara ko, neguwo si nomalirankali nokukora kapi ngayi kara ko hena, yeeyi yininke yomuhowo yina dimi po.”—Ehororo 21:4.

Vantu wovadona ngava va gusa mo. Jehova kwa tumbwidira asi age “nga nyafura mo vadinikarunga mosirongo, ano vananzo ngava va dura mo moomu ava dura yimeno mevhu.”—Yisewe 2:22.

Vantu ngava lihara-hara nokulifumadeka. Kapi ngaku ka kara hena uhahungami nehepeko nouruva nonyengo. Vantu ngava ka kara moumwe ntani ngava ka paruka mokuliza kumwe nononzira douhungami daKarunga.—Jesaya 26:9.