Hafera Nonkango daKarunga

MUNTU gehafo googu ‘ga tokomena kuresa Veta zaHOMPA.’ Muntu gwangoso kuresa Nonkango daKarunga ‘oku ta di konakona mutenya nomasiku.’ (Epis. 1:1, 2) Nove kugwana ruhafo rwangoso ndi? Ngapi omu no vhura kugwederera ko koruhafo oru adi reta Nonkango daKarunga?

Purakena ngomu ana kuuyunga Jehova

Wa ha resa tupu nonkango. Heteka kumona sihorokwa esi ono kuresa momagazaro nokuzuvha mazwi gowo va temwinina mo. Ngomu ono kuresa magaununo gokuhova gomoBibeli, zuvha ezwi lyaJehova mwene omu ana kuhorora, kanunu kanunu, eyi ga rugene mokuninka evhu li wapere kutunga po vantu. Purakena ngomu ana kutantera Munwendi, Nkurungu, asi siruwo sina siki mo sokuunga vantu wokuhova. Yi faneka megano omu oAdamu naEva vana kurwanesa Karunga, makura ta va pangura, ano konyima zoyo ta va tjida mo moParadisa. (Genesis egau. 1-3) Lizuvha uwaawa apa ono kuresa asi ezwi kuna kutunda meguru lina kutanta asi Jesus Kristusa MunwaKarunga, ogu ga mu za komutjima, ogu ga tumine a ya gave mwenyo gwendi kovantu. (Mat. 3:16, 17) Hetekera ko kugazara mupositoli Johanesa apa Jehova ga mu tanterere asi: “Tara, nayinye tani yi ninki yi kare yoyipe.” (Ehor. 21:5) Yosili, kuresa Nonkango daKarunga monkedi zangesi kureta ruhafo!

Twikira kuresa Matjangwa gokupongoka, ano ove ngo diva Jehova ngomuntu gomunene ga fumana po. Ove ngo lizuvha asi kuna kuhedera pepi nogu ga tu hara, ogu a tu tekura monkenda nokutuvatera apa atu hetekere ko kurugana mpango zendi nelinunupiko, ntani ogu a tu likida omu natu hafera etompoko mwanayinye eyi atu rugana.—Jos. 1:8; Epis. 8:1; Jes. 41:10.

Ngomu ono kuruganesa siruwo sosinzi mokuresa Bibeli, yimo hena ngo kara noruhafo rorunene ngomu ono kudiva yoyinzi kuhamena sitambo saKarunga koge. Nye ruhafo roge ngaru pitakana opo. Nsene ereso lyoge kuna kukupa evatero eli wa hepa mokukohonona po maudigu nonondunge, ove ngo lizuvha ngwendi muepisarome ogu ga tente asi: “Marongo goge yitetu; ame kugalimburukwa nomutjima nagunye.” (Epis. 119:129) Nove ngo gwana ruhafo ngomu ono kukonakona moMatjangwa nompango edi nadi ku vatera mokurundurura magazaro nomalizuvho goge monkedi ezi ga hara Karunga.—Jes 55:8, 9.

Bibeli kugava nompango dopamukaro edi adi tu popere koyiponga nokutulikida nzira zouhunga. Ngomu natu ka di resa, natu ka dimburura asi Jehova kuna kara Guhya ogu ga diva maudigu aga ngatu ligwanekera nago nsene tu pulisira madowo gopanyama ga tu pangere. Kapi ana hara tu ligwanekere nomaudigu morwa kudira kulimburukwa nompango dendi dopamukaro. Age kutupakera mbili ntani kuna tu harere tu hafere eparu lyewa. Kuresa Nonkango dendi ngayi tu vatera tu kwate egano omu ya wapa kwetu age mokukara Karunga gwetu naGuhyetu gemeguru.

Resa Bibeli nkenye ezuva

Muepisarome kwa uyunga kuhamena muntu ogu a resa nkenye ezuva Nonkango daKarunga asi: “Nayinye eyi a rugana kuragopa.” (Epis. 1:3) Yimo, nampili ngomu twa dira kusikilira mo nokuparuka mouzuni waSatana ntani nelituromo lyoMuzonaguli lyokutupukisa, kuresa nokuruganesa nkenye apa Nonkango daKarunga ngayi tu vatera yi tu tompoke mwanayinye omu mwa hamena elikwatakano lyetu naJehova.

Mokumona asi ose kuna kara mekondjeso lyouzuni ou, kuteda ko komagazaro goMusiti, nampili pokaruwogona nkenye ezuva, kuvhura kutunkondopeka. Vamwe ava va tulire modorongo morwa epuro lyawo va vhulire tupu kuresa matjangwa aga va temwinina monosayitunga. Awo kwa ga pandekere kumwe, nokugakwata momutwe nokuteda ko. Jehova ga tungikire elituromo lyawo morwa va rugene ko yuma mokugwana ediwo lyomoNonkango daKarunga kuliza noukaro wawo. (Mat. 5:3) Sinzi setu kwa kara nemanguruko lyokupita opo. Kapisi tu hulise nye asi kuresa usimbu velise zongandi moBibeli rumwe mezuva kuvhura yi rete yitundwamo yoyiwa pasitetu. Ngatu gwana matungiko nsene ngatu rundurura malikwamo getu yipo tu rese karuha koBibeli nkenye ezuva nokugazadara ko, ntani nokuyiruganesa momaparu getu.

Mousili, malikwamo getu gomawa po unene kuvhura ngava ga donganese. Nsene yi horoka oyo, twa hepa kutura yininke yomulyo pomuhowo. Pasihonena, kapi ngatu tokora mokudira kunwa mema ure wezuva limwe ndi gavali. Yi kare asi yisinke yina wiza po meparu lyetu, twa hepa kulitulira po siruwo mokulitendeka nyamwetu nomema gousili.—Yirug. 17:11.

Resa Nonkango daKarunga nadinye

Wa resa Bibeli nazinye pwanyamoge ndi? Vamwe kulizuvha asi udigu kuresa kutundilira kwaGenesis dogoro kEhororo. Yipo nye, wovanzi ava va here kuresa Bibeli nazinye kwa tamekere pomuhowo kuresa Matjangwa goRugereka goSikriste. Morwasinke? Nampo awo ya va rerupira mokumona omu nobuke edi domoBibeli adi rugana momaparu gawo ngovantu ava vana hara kukwama sihonena saKristusa. Ndi nampo morwa Matjangwa goRugereka goSikriste kwa monekere ngwendi yisesu yokuresa. Nye konyima zokumana kuresa nobuke odo 27, makura tava twikire hena kuresa nobuke 39 doMatjangwa goRuhebeli nokudihafera. Apa va mene kuresa Matjangwa goRuhebeli, awo nare vana tulisa po nkareso zokuresa Bibeli nkenye apa, makura tava twikire kuresa Matjangwa goRugereka goSikriste rwauvali, ntani kapi ava hageke kuresa. Nove ngano o tulise po nkareso zokuresa Nonkango daKarunga nkenye ezuva zi kare ruha rweparu lyoge nalinye.

Pweli gumwe gemepata ndi gomombungakriste zeni a dili kuresa ndi? Litulira po sitambo sokumuresera Bibeli nkenye apa. Ngo gwanena mo uwa ntani nage ngomu ana kuteda ko kweyi ana kuzuvha nokuyiruganesa meparu lyendi.—Ehor. 1:3.

Konyima zosiruwo, kuvhura o hare kugwederera ko hena nontambo dimwe dokulikarera kuhamena ereso lyoge lyoBibeli. Dimwe dado kuvhura kugwederera ekwato egano lyoge omu ga likwatakana maruha gokulisiga-siga goBibeli. Nobibeli dimwe kwa kara nomalikido komatjangwa gapeke aga naga ku pa mauzera kuhamena sihorokwa ndi novelise dokulifana. Kuvhura ga ku vatere mokudimburura maukaro aga ga ninkisire va tjange mapisarome gokulisiga-siga nonombilive edi va tjenge vapositoli vaJesus Kristusa. Buke Insight on the Scriptures kugava mauzera gomulyo kuhamena vantu nomavango noyikara eyi va tumbura moBibeli. Mafano nago kulikida masikiliromo gomauporofete goBibeli nokulikida asi vahompa novaporofete musinke va parukire mosiruwo simwe, ntani kugava mazuva goyihorokwa yoyinzi yomoBibeli.

Ngomu ono kuteda ko kweyi ono kulironga, ngo ya kwata egano nokonda deyi maukaro gongandi ga horokerere mokatji kovantu vaKarunga. Ngo ya diva hena eyi Jehova ga ruganenene kumwe novantu vendi monkedi zangoso. Ove ngo mona omu Jehova a konakona yirugana yovantu neyi yomapangero. Eyi ngayi ku vatera unene mokudiva magazaro gendi.

Ove ngo hafera ehistoli lyomoBibeli ngomu ngo hetekera kugazara ko mavango oku ya horokerere. Nokarata doyirongo eyi va tumbura moBibeli kuhorora mavango noyinano omu ga li kere mavango. Pasihonena, kupi oku va tavakanene Vaisraeli Efuta lyEgeha? Unene waso wokuhura kupi Sirongo sEtumbwidiro? Kupi oku ga ka sikire Jesus apa ga rugene sirugana sokuzuvhisa pevhu? Mavango musinke ga mwene Paurusa apa ga kere momarugendo gendi goutumwa? Nokarata nomafatururo gomavango kugava mauzera aga ngaga tovaresa ereso lyoge. Kupi oku no vhura kugwana nokarata domavango gomoBibeli? Dimwe kwa kara moBibeli zoNew World Translation of the Holy Scriptures. Maruha gonoInsight kwa kara nonokarata dokusika po-70, ntani kouhura woruha rokuhova kwa kara ko indekisi zotukarata. Ruganesa Watch Tower Publications Index mokudiva oku da kara nokarata dimwe. Nsene kapi wa kara noyiruganeso eyi meraka lyoge, ruganesa nokarata va tura moRuhungu mokukuvatera mereso lyoge lyoBibeli.

Momatjangwa goRuhebeli, Hompa Ndafita kwa hambererere Jehova pokutanta asi: “Karunga, magazaro goge yireru omu ga digopa kwange; nani omu ga vhuka yireru.” (Epis. 139:17) Ano moMatjangwa goRugereka goSikriste, mupositoli Paurusa kwa hambererere Jehova morwa “yige ga temesera uzera wendi monomutjima detu, tu ronge vantu kudiva uyerere waKarunga ou wa kara mosipara saKristusa.” (2 Kol. 4:6) Ndafita naPaurusa kwa parukire momauye gokulisiga; nye nampili ngoso, navenye kwa haferere Nonkango daKarunga. Nove kuvhura o di hafere nsene no litulira po siruwo mokuresa nayinye eyi ga ku pa Jehova kupitira moNonkango dendi.