“Omu takamese mokupurakena kweni”

KUPURAKENA mulyo mokulironga yuma. Kupurakena kuvhura hena kukundama meho zomuntu mokukaparuka. Apa Jehova ga wapaikire mokuzowora vantu vendi mounkwate waEgipite, age kwa geve mavyukiso kwaMosesa a ga gave komasimbi goVaisraeli kuhamena eyi va hepere kurugana mokuparura nombeli dawo komuengeli gonomfa. (Ex. 12:21-23) Masimbi makura taga twara mbudi ezi kwankenye epata. Eyi kwa yi rugene kupitira mokuuyunga. Vantu va hepere kupurakena nawa. Ngapi omu va kumbwilire ko? Bibeli kutanta asi: “Ano Vaisraeli makura tava zi va ka yi rugane. Moomu ga tanterere HOMPA oMosesa naArona, nawo yimo va rugene.” (Ex. 12:28, 50, 51) Ngoyitundwamo, Vaisraeli kwa gwene ezoworo lyokutetukisa.

Naina, Jehova kuna kutuwapaikira ezoworo lyenene kupitakana lina. Yosili, mapukururo aga a gava kwa kara nomulyo kwetu mokugapurakena. Mapukururo gangoso kugagava komapongo gomombungakriste. Ove kuna kugwanena mo uwa momapongo ogo ndi? Ayo kwa korera unene omu o purakene.

Ove kudiworoka magano gomulyo aga ava gava komapongo ndi? Azo nkareso zoge mokuruganesa meparu lyoge nkenye sivike mapukururo aga ava gava ndi o ga ligavere kumwe nava wopeke ndi?

Wapaika mutjima goge

Mokugwanena mo uwa wounene momapukururo aga ava gava komapongo goSikriste, twa hepa kuwapaika nomutjima detu. Mulyo gokurugana ngoso kwa gu likida mweyi ya horokere mosiruwo sepangero lyahompa Jehosafata gwaJuda. Jehosafata kwa kere nouradi koukareli wousili. Age “ta hanagura mavega nagenye gokutongamenena govapagani nonombundi dakarunga gomukadi Asera gwaJuda” ntani kwa pangerere vahompagona noVarevhi novapristeli va ronge Veta zaJehova vantu navenye ava va kere moyitata yaJuda. Nampili ngoso, “mavega govapagani gokutongamenena kapi ga ga zungwilire po.” (2 Hist. 17:6-9; 20:33) Ukareli woyikarunga ntani nou waJehova ou ga dilire kupulisira ou va ruganenene komavega govapagani gokutongamenena, kwa kere udigu mokugahagekesa po.

Morwasinke mapukururo aga ga geve Jehosafata ga dilire kurugana siruwo sosire? Etjango kwa twikira ko asi: “Mbunga kapi za ligavere nomutjima nagunye mokutongamena Karunga gozinyakurwawo.” Va yi zuvhire, nye kapi va yi tulire pasirugana. Nampo va lizuvhire asi kuza kontembeli moJerusarema mokukagava nonzambo kwa kere udigu. Zi kare asi konda musinke, nomutjima dawo kapi lya di tumangedere epuro.

Mokunyokera kutengwira mouzuni waSatana, twa hepa kuwapaika nomutjima detu tu tambure mapukururo aga ana kutupa Jehova naina. Ngapi? Nkedi zimwe zomulyo kuna kara pokukanderera. Twa hepa kukanderera asi tu tambure mapukururo gaKarunga norupandu. (Epis. 27:4; 95:2) Eyi ngayi tu vatera tu pandwire elituromo lyovanavazinyetu ava a ruganesa Jehova mokuronga vantu vendi, nampili ngomu va dira kusikilira mo. Ngayi tu tumangeda tu pandwire Jehova koyininke yoyipe eyi tuna kulironga ntani hena nokompito ezi twa gwana mokunenepeka ediwo lyetu koyininke eyi twa lironga nare. Eharo lyokurugana mpango zaKarunga ngali tu ninkisa tu kanderere asi: “Ronga nge HOMPA eyi ono harere nge asi ni yi rugane, . . . ronga nge kukuruganena sankondonkondo.”—Epis. 86:11.

Demenena kelikwamo

Pwa kara madonganeso gomanzi aga aga tu ninkisa tu dire kupurakena nawa. Kuvhura tu kare noyinka yoyinzi. Ezogerero negendaguro lyovantu monda ndi ponze zevango eli atu pongere kuvhura kutudonganesa. Kukora kwetu koparutu kuvhura kutudigopekesera mokupurakena nawa. Ava va kara novanonagona narunye kuvadigopera mokupurakena nawa. Yisinke nayi vhura kutuvatera tu demenene kelikwamo?

Meho getu kukundama oku aga demenene magano getu. Ruganesa meho goge ga ku vatere mokupurakena pokuganwika komuuyungi. Nsene ta tumbura etjangwa lyomoBibeli, nampili wa li diva, li tara, nokukwama ngomu ana kuliresa. Nyokera po kusetauka o tare kwankenye oku kuna kara ezogerero ndi egendaguro. Nsene meho kuna kukuninkisa o gazare yapeke, ngo zumbanesa eyi vana kuuyunga kositantara.

Nsene ‘yinka momutjima’ kuna kukudigopekesera mokudemenena kelikwamo, kanderera kwaJehova a ku pe mbili nomutjima guna litura yipo o purakene nawa. (Epis. 94:19; Fil. 4:6, 7) Ruguruka kukanderera nsene hepero. (Mat. 7:7, 8) Mapongo gomombungakriste kuna kara ewapaiko lyokutunda kwaJehova. Kuvhura o kare nehuguvaro asi Jehova kuna hara o gwanene mo uwa.—1 Joh. 5:14, 15.

Kupurakena koyiuyungwa

Ove kuvhura o diworoke magano gomawa aga ono zuvhu moyiuyungwa. Nampili ngoso, kupurakena kosiuyungwa kwa hamena mo yoyinzi kupitakana tupu kugusa mo magano gomulyo. Siuyungwa kuna kara ngwendi rugendo. Nampili ngomu monzira mwa kara yininke yoyinzi yokuhafesa no vhura kumona, sininke somulyo po kuna kara oku ono kuza ndi sitambo sorugendo. Muuyungi kuvhura a hetekere ko kuninkisa vapurakeni va ya sike kehuliso lyongandi ndi a va tumangede va rugane ko yuma yongandi.

Tarurura siuyunga esi ga geve Josuwa komuhoko goVaisraeli, va tjanga mwaJosuwa 24:1-15. Sitambo sendi kwa kere sokutumangeda vantu mokukwaterera koukareli wousili pokuligusa ko vene kokukarera yikarunga yoyimpempa yonomuhoko edi da va kundurukidire. Morwasinke ya karerere mulyo? Elihaneno nakunye lyoukareli woyimpempa kwa ninkisire elikwatakano lyoVaisraeli kumwe naJehova li kare mosiponga. Vantu kwa limbwilire Josuwa pokutanta asi: ‘Narumwe si asi ngatu yi gazare oyo yokusiga HOMPA, makura tu ruganene vakarunga nawopeke! . . . Nose kuna hara ngatu ruganene HOMPA.’ Ano oyo yiyo va rugene!—Jos. 24:16, 18, 31.

Ngomu ono kupurakena kosiuyungwa, heteka kukwata egano sitambo saso. Gazadara ko omu magano aga ana kupwagesa muuyungi gana kutwaredesa kositambo oso. Lipura nyamoge eyi gana kukutumangeda mapukururo o rugane.

Kupurakena posiruwo sonzogera

Elirongo lyoRuhungu nElirongo lyoBibeli lyoMbunga, ntani nomaruha gamwe gEpongo lyoYirugana kugarugana ngononzogera domapuro nomalimbururo moyimbapiratjangwa yoBibeli.

Kupurakena nawa poyiruwo eyi kwa fana ngwendi kuna kulihameka mo monzogera. Mokugwanena mo uwa momunene, purakena nawa. Koneka oku zina kuza nzogera. Koneka omu mupitisili ana kunkondopeka siparatjangwa nomagano gomulyo. Limburura mapuro gendi momutjima. Purakena ngomu wopeke vana kufaturura mauzera ogo. Pokutara mauzera kuliza nomutaro gwava wopeke kuvhura ngayi ku vatere mokukara nomutaro gwapeke kosirongwa. Lihameka mo monzogera pokupwagesa malizuvho gepuro lyoge.—Rom. 1:12.

Kuliwapaikira sirongwa komeho zosiruwo ngayi ku vatera o lihameke mo monzogera ntani nokukwama malimbururo gava wopeke. Nsene ukaro woge kapi una kukupulisira mokuliwapaikira nawa, ruganesa nampili nominute dongandi mokutara mosirongwa oso o kare negano lyaso komeho zepongo. Pokurugana ngesi ngo gwanena mo yoyinzi monzogera.

Kupurakena koyigongi

Koyigongi kwa hwa kukara ko madonganeso gomanzi kupitakana komapongo gomombungakriste. Eyi kuvhura kudigopekesa mokupurakena nawa. Yisinke nayi vhura kutuvatera?

Sininke somulyo kuna kara mokugwana epwizumuko lyokugwanena po masiku. Nkenye ezuva komeho zokutameka elikwamo, koneka siparatjangwa sosigongi. Tara kosiparatjangwa sankenye siuyungwa nokundindira eyi nava ka zogera mo. Ruganesa nawa Bibeli zoge. Vantu wovanzi kwa yi dimburura asi kudidilika magano gomulyo kuvavatera mokudemenena nondunge dawo kelikwamo. Didilika mapukururo aga ono hara kuruganesa meparu lyoge nomoyirugana yokuzuvhisa. Zogera magano gongandi ngomu ono kuza nokutunda kosigongi nkenye ezuva. Eyi ngayi ku vatera mokudiworoka mapukururo.

Kudeura vanona va purakene

Vakurona woVakriste kuvhura va vatere vana vawo, nampili vakeke, va kare ‘vakonentu yipo ngava paruke’ pokuvasimba komapongo nokoyigongi. (2 Tim. 3:15) Mokumona asi vanona va lisiga mononkareso ntani nomu ava purakene, pwa hepa nondunge mokuvavatera va purakene nawa. Magano gana kukwama ko kuvhura ga ku vatere.

Nsene membo, wapaika ko yiruwo omu vana woge nava hingira nokumwena va rese ndi va tare mafano gomoyimbapiratjangwa yetu yoSikriste. Nsene komapongo, nyokera po kupa vana woge yidaneso mokuvatura mombinzu-mbinzu. Ngwendi moomu tupu ya kere moVaisraeli vanare, nampili naina vanona kukara po yipo ‘nkenye ogu ngano a zi zuvhe, ntani a lirongere ko.’ (Deut. 31:12) Pamwe, vakurona vamwe kupa nampili vanonagona yimbapiratjangwa eyi vana kukonakona mepongo. Ngomu vana kukura, va vatera va lihameke mo melikwamo omu muna hepa elihameko lyovapurakeni.

Matjangwa kwa horora elizo lya kara pokatji kokupurakena kwaJehova ntani nokumulimburukwa. Eyi kuyimonena mononkango daMosesa edi ga uyungilire muhoko goVaisraeli asi: “Ame ngesi tani mu pe ehoroworo pokatji komwenyo nonomfa nopokatji ketungiko lyaKarunga nefingiliro lyaKarunga, horoworeni po mwenyo . . . pokuhara Jehova Karunga gweni, nokupurakena kezwi lyendi oku tomu mu huguvara.” (Deut. 30:19, 20, NW) Naina, kupurakena komapukururo aga a gava Jehova nokugaruganesa momaparu getu kuna kara nomulyo mokugwana ehafero lyendi nomwenyo gwanarunye. Omu tupu ya kara nomulyo asi tu purakene kerondoro lyaJesus asi: “Omu takamese mokupurakena kweni”!—Ruk. 8:18.