Siuyungwa sokudira kutjanga nkenye nkango

NAMPO ko rugene unene mokuwapaika siuyungwa soge. Kuvhura o kare nomapukururo gomawa. Efatururo kuvhura li zuvhike nawa. Kuvhura o si gave wa hana kuhaka-haka. Nye nsene vapurakeni woge kuna kugazara nayopeke nokupurakena tupu kwayimwe eyi ono kuuyunga, ngapi omu nasi vhura kuvakundama siuyungwa soge? Nsene vapurakeni kuna kuvadigopera kudemenena magano gawo kosiuyungwa, kuvhura ngo gume nomutjima dawo ndi?

Yisinke ayi retesa po udigu wangoso? Pwa kara nokonda dokulisiga-siga. Konda zonene kuna kara kuresa siuyungwa soge. Nampo muuyungi kuna kutara unene pomadidiliko gendi. Maudigu gangesi kwa korera monkedi omu ono wapaike siuyungwa soge.

Nsene pomuhowo o tjanga siuyungwa soge makura konyima o hetekere ko kusitura morupe rwekamo, ngayi ku digopera mokuuyunga nemanguruko. Morwasinke? Morwa ono horowora nonkango edi ono hara kukaruganesa. Nampili nsene ngo ruganesa ekamo mokugava siuyungwa, ngo hetekera ko kudiworoka nonkango edi wa ruganesere apa wa si tjenge. Nkedi omu o tjanga nomu o uyunga kwa lisiga. Nkedi zoge zokugava siuyungwa ngazi yi likida.

Mevango lyokutjanga siuyungwa, heteka yitwa eyi yina kukwama ko: (1) Horowora siparatjangwa ntani magano gomulyo gosirongwa aga no ka ruganesa mokutunga siparatjangwa oso. Kosiuyungwa sosisupi, magano gavali gomulyo kuvhura ga gwanene po. Ano siuyungwa sosire kuvhura si kare nomagano gane ndi gatano. (2) Konhi zankenye egano lyomulyo, didilika matjangwa aga ono hara kukaruganesa mokusitunga, ntani yifanekeso nonokonda edi ono hara kukaruganesa. (3) Gazadara ko omu no ka gava etwaromo lyosiuyungwa. Kuvhura hena o tjange ntanto zimwe ndi mbali detwaromo. Ntani wapaika hena ehageso lyoge.

Kuliwapaikira omu no gava siuyungwa kwa kara nomulyo. Nye wa ha rugurura mosiuyungwa mokuresa nkango nonkango nositambo sokusikwata momutwe. Pokuliwapaikira, demenena komagano aga ono hara kupwagesa, kapisi kononkango. Magano wa hepa kugarugurura dogoro ga pwage nemanguruko. Nsene ono tungu nawa siuyungwa soge nomagano gokulikwama, eyi ngayi ku rerupira kugava siuyungwa ntani magano ngaga wiza pwagene.

Konakona mauwa. Nsene ngo dira kuresa siuyungwa soge, ngo vhura kuuyunga nemanguruko, ntani vantu ngava ku purakena nawa. Siuyungwa soge ngasi tovara ntani ngava si hafera vapurakeni woge.

Kuuyunga monkedi zangesi ngayi ku pulisira mokutara kovapurakeni woge, ano eyi ngayi wapukurura euyungo lyoge kumwe nawo. Mokumona asi kapi ono kudemenena pomadidiliko mokuresa nkenye ntanto, ngayi ninkisa vapurakeni woge va lizuvhe asi ono diva sirongwa soge nawa ntani wa pura mweyi ono kuuyunga. Yipo nye, kugava siuyungwa monkedi zangesi ngayi guma nomutjima dovapurakeni woge.

Kudira kutjanga nkenye nkango ngayi ku pa hena umanguruki wokutura po marunduruko. Tu tante asi kongurangura mezuva eli no ka gava siuyungwa soge, walye tava saya mbudi ezi zina lizi nosirongwa esi no ka zogera. Kapi nayi ka wapa mokukazitumbura ndi? Ndi nampo ngomu ono kuuyunga, to yi dimburura asi sinzi sovapurakeni kuna kara vadinkantu wokuza kosure. Nayi ka wapa mokukatjindja mapukururo noyifanekeso yoge negano lyokuvavatera va dimburure omu sirongwa oso sina kundama maparu gawo.

Uwa umwe hena wokudira kutjanga nkenye nkango kuna kara asi kupindura nondunge doge. Nsene vapurakeni woge ngava purakena nelituromo, ngayi ku kundama ntani kuvhura ngo tamunune magano gamwe ndi kurugurura magano gamwe gomulyo mokugankondopeka. Nsene o dimburura asi elituromo lyovapurakeni kuna kusesupa, kuvhura o rugane ko yuma mokukandana po udigu owo mevango lyokuuyungisa vantu ava vana kudira kupurakena.

Takamesa eyi yina kukwama ko. Kudira kutjanga nkenye nkango nako kwa kara nomaudigu gongandi. Nsene no gwederera ko magano gomanzi apa no gava siuyungwa soge, kuvhura o pitakanese siruwo. Kuvhura kukohonona po udigu ou pokudidilika pekamo siruwo esi no ruganesa kwankenye karuha komosiuyungwa soge. Makura kwama elikwamo eli.

Udigu umwe, unene po kovauyungi wovawa, kuna kara kulihuguvara unene. Morwa kugava yiuyungwa nkenye apa mombunga, vamwe kuvhura va lizuvhe asi kapisi udigu mokugenderera kutura kumwe magano yipo va sikise mo siruwo. Nye elinunupiko ntani nokukwata egano asi ose kuna kulihameka melikwamo lyerongo omu Jehova mwene a kara Murongi goMunene ya hepa kututumangeda tu liwapaikire nawa.—Jes. 30:20; Rom. 12:6-8.

Sinka sosinene sovauyungi wovape wokudira kutjanga nkenye nkango kuna kara asi kuvhura va divare eyi kava hara kuuyunga. Wa ha pulisira udigu ou u ku kondere mokugava yiuyungwa monkedi ezi. Liwapaikira nawa, ntani huguvara mwaJehova mokukuvatera nompepo zendi zokupongoka.—Joh. 14:26.

Morwa kukara nosinka sosinene sokuruganesa nonkango nondunganesoraka zongwa, vauyungi vamwe kutjanga nonkango dosiuyungwa nasinye. Yimo, siuyungwa sereso kuvhura kukara nononkango nondunganesoraka zongwa, nye kuuyunga nemanguruko kukoka elituromo lyovapurakeni kupitakana siuyungwa sereso. Vantu kupurakena nawa komagano aga ava gava mononkango nomonontanto doureru edi nava vhura kukwata egano. Nsene ngo liwapaikira nawa, ngo ruganesa nonkango dokuwapera morwa ono kwata nawa magano gomosiuyungwa, nye kapisi morwa kusikwata momutwe. Ntani nsene o ruganesa mbuuyungiso zongwa nkenye ezuva, yimo ngo uyunga hena apa ngo kara kositantara.

Madidiliko aga no vhura kuruganesa. Ngomu ngasi pita siruwo ntani neliyombereso, ngayi ku vhulika mokusupipika ekamo lyosiuyungwa soge. Kwankenye egano kuvhura o tjange nonkango dononsesu kumwe nomatjangwa. Eyi kuvhura kugwaneka posipepa simwe tupu. Moyirugana yokuzuvhisa, kuvhura o kwate momutwe ekamo lyomagano. Nsene ono rugana epaparo kosirongwa negano lyokukarugana etengwiropo, kuvhura o ture sipepa somadidiliko goge moBibeli zoge. Ndi kuvhura o ruganese makamo ga kara mokafo “Yirongwa yoBibeli yeliyongo” ndi magano ga kara moReasoning From the Scriptures ngontundiliro zonzogera zoge.

Nampili ngoso, nsene kuna ku hundire mokuyagava yiuyungwa yoyinzi moyivike yongandi tupu, ove ngo hepa madidiliko gomanzi. Morwasinke? Yipo o rugurure mo komeho zokugava nkenye siuyungwa. Nampili ngoso, nsene o korera unene komadidiliko goge pokugava siuyungwa, nokugatara nkenye apa, kapi ngo vhura kuuyunga nemanguruko. Nsene to tjanga nonkango dononzi pekamo lyoge, didilika nonkango domulyo nomatjangwa aga no ka ruganesa.

Nampili ngomu vauyungi wovawa ava ruganesa nkedi ezi mokugava yiuyungwa, awo pamwe kuvhura va rese ndi va kwate momutwe nonkango dimwe. Metwaromo nemehageso, omu wa hepa kutara kovapurakeni woge nokuruganesa nonkango dononkondo, kuvhura kukwata momutwe nonkango dongandi. Ya wapa kuresa mavango apa vana ruganesa nonomora nomatwemwinino ndi matjangwa ntani kuvhura kureta yitundwamo yoyiwa.

Nsene wopeke kuna kutupura tu faturure. Poyiruwo yimwe wopeke kuvhura va tu pure tu faturure epuliro lyetu twa hana kugwana mpito zokuliwapaikira komeho zosiruwo. Eyi kuvhura kuhoroka apa atu ligwanekere nagumwe moyirugana yokuzuvhisa nokuretesa po nompata. Maukaro gokulifana kuvhura ga horoke apa atu kara novanekoro ndi varugani vakwetu ndi kosure. Wokurugana mepangero kuvhura va tu pure tu faturure kuhamena epuliro lyetu ntani nomparukiso zetu. Matjangwa kututumangeda asi: “Omu liwapaikire nkenye apa kulimburura nkenye ogu ana kumupura yokumusingonwena ehuguvaro eli lya kara mweni. Omu yi rugane nombili nefumadeko.”—1 Pet. 3:15, 16.

Koneka omu Peturusa naJohanesa va limbwilire komeho zosigongi somasimbi goVajuda, ngamoomu va yi didilika moYirugana 4:19, 20. Momusupi awo kwa fatwilire sirugana sawo. Awo kwa yi rugene monkedi zokuwapera kovapurakeni vawo, pokuyilikida asi udigu ou va ligwanekerere nawo kwa va tembe hena. Konyima, marundiro goyimpempa kwa ga vyukisire kwaSitefanesa, ntani kwa mu twere kovapangeli vena. Hararasi ga hepere kugava elimbururo. Resa elimbururo lyendi lyononkondo moYirugana 7:2-53. Ngapi omu ga wapaikire sirongwa sendi? Age kwa tumbwire yihorokwa melikwamo. Posiruwo sokuwapera, age kwa tamekere kutumbura mpepo zourwanesi ezi gwa likidire muhoko goVaisraeli. Mokuhulisa, age kwa yi likidire asi sigongi somasimbi naso kwa likidire mpepo zokulifana mokuninka MunwaKarunga va mu dipage.

Nsene va ku zigida hararasi mokukafaturura epuliro lyoge, yisinke eyi nayi vhura kukuvatera mokugava elimbururo lyewa? Temwinina Nehemiya, ogu ga kandererere momutjima komeho zokulimburura epuro eli ga mu pulire Hompa Aretaserekesesi. (Neh. 2:4) Yokukwama ko, wapaika usimbu ekamo momagano goge. Kuvhura o yi rugane monkedi zangesi: (1) Horowora egano limwe ndi gavali (kuvhura o horowore magano gomoYirongwa yoBibeli yeliyongo). (2) Tokora asi matjangwa musinke no ruganesa mokugakwatesa ko. (3) Wapaika nawa omu no tameka efatururo lyoge monkedi zongwa yipo ogu ana ku pura a hare kupurakena. Makura tameka kuuyunga.

Moukaro wekondjeso, kuvhura o diworoke eyi no rugana ndi? Jesus kwa tanterere vasikuli vendi asi: “Mwa ha lipakera sinka asi ngapi ndi yinke nomu ka uyunga, yeeyi moruveze rooro ngomu gwana eyi ngomu ka uyunga. Kapisi nyone ngomu ka uyunga, Mpepo zaGuhyeni yizo ngazi mu uyungisisa.” (Mat. 10:19, 20) Eyi kapi yina kutanta asi ngo kara ‘nouhwi wounongo’ ou va pere koVakriste womouye wopomuhowo. (1 Kol. 12:8) Nye nsene nkenye apa ove kugwanena mo uwa medeuro eli a gava Jehova kovakareli vendi mombungakriste, mpepo zokupongoka ngazi ku vatera mokudiworoka mapukururo ogo posiruwo apa ngo ga hepa.—Jes. 50:4.

Pwa hana masinganyeko, kudira kuresa siuyungwa soge kwa kara sili nomulyo. Nsene o gava nkenye apa yiuyungwa yoge monkedi ezi mombungakriste, ayo ngayi ku rerupira mokulimburura hararasi, morwa kuvhura o liwapaikire ekamo lyomomagano monkedi zokulifana. Wa ha kara nowoma. Kudira kuresa yiuyungwa yoge ngayi ku vatera hena mokuninka sirugana soge sokuzuvhisa si wape. Ntani nsene ono kara nositumbukira sokugava yiuyungwa mombungakriste, ngo koka elituromo lyovapurakeni woge ntani ngo guma nomutjima dawo.