Kuuyunga nelituromo

KUUYUNGA nelituromo kutovaresa siuyungwa. Nampili ngomu ya kara mulyo mokugava siuyungwa sokuronga, kugava siuyungwa nenyanyuko nelituromo ngayi pindura elituromo lyovapurakeni. Yi kare asi ove gokontundiliro musinke ndi yikara musinke wa kara nayo, nove kuvhura o tunge po sikara sokuuyunga nelituromo.

Kuuyunga nomalizuvho. Apa ga uyungire nomukadi goMusamaliya, Jesus kwa uyungire asi wokukanderera Jehova va hepa kuyirugana “moMpepo nomousili.” (Joh. 4:24) Ukareli wawo wa hepa kuutumangeda rupandu rokutundilira komutjima ntani u lize nousili ou wa kara moNonkango daKarunga. Nsene muntu na kara norupandu rwangoso, ayo ngayi lilikida monkedi omu a uyunga. Age nga kara neharo lyokuuyunga nava wopeke kuhamena mawapaiko gaJehova geharo. Maligumaguro gendi gokosipara naga gorutu ntani nezwi lyendi ngayi likida omu ana kulizuvha kuhamena eyi ana kuuyunga.

Morwasinke muuyungi ogu ga hara Jehova nokupura mweyi ana kuuyunga na dilira pamwe kuuyunga nelituromo? Ayo kapi tupu ya gwanena po mokuliwapaikira eyi na ka uyunga. Age ga hepa kulihameka mo pamalizuvho. Tu tante asi muuyungi kuna gava siuyungwa sokuhamena nzambo zosizoweseso saJesus Kristusa. Apa muuyungi na gava siuyungwa sendi, age kapisi a gazare tupu mauzera gosiuyungwa oso, nye ga hepa kugazara norupandu kweyi azi tanta nzambo zaJesus kwendi nokovapurakeni vendi. Ga hepa kudiworoka malizuvho gendi gorupandu kwaJehova Karunga naJesus Kristusa kewapaiko eli lyewa. Ga hepa kugazadara ko keparu lyewa eli ngasi reta sizowoseso kovantu, eparu lyoruhafo rwanarunye noukanguki wokusikilira mo moparadisa pevhu! Yipo nye, ga hepa kuhamesera mo mutjima gwendi.

Kuhamena murongi gomoIsraeli, Esira, Bibeli kwa uyunga asi: “Esira kwa wapaikire mutjima gwendi mokulironga veta zaJehova nokuzisikisa mo ntani nokuronga moIsraeli.” (Esir. 7:10, NW) Nose nsene ngatu wapaika mbudi ntani nonomutjima detu, ngayi tu ninkisa tu uyunge kutundilira komutjima. Kuuyunga kutundilira komutjima kuhamena usili kuvhura kuvatera unene owo tuna kuuyungisa mokutunga po eharo kousili.

Gazadara ko kuhamena vapurakeni woge. Nkedi zimwe hena zomulyo zokuuyunga nelituromo kuna kara pokukara netokomeno asi vapurakeni woge va hepa kuzuvha eyi ono kuuyunga. Eyi kutanta asi pokuliwapaikira siuyungwa soge, wa ha pongaika tupu magano gomulyo nye hena kanderera kwaJehova mokukuvatera o ruganese siuyungwa sangoso mokuninka vapeke va gwanene mo uwa. (Epis. 32:8; Mat. 7:7, 8) Konakona eyi vapurakeni woge va hepera kuzuvha mapukururo ogo, nomu nava gwanena mo uwa, ntani nomu no si gava yipo va hafere mulyo gomapurukuro ogo.

Liwapaikira nawa siuyungwa soge dogoro si kundame malizuvho goge gokomutjima. Mauzera kuvhura ga dire kukara gomape, nye nkedi zoge zokugagava kuvhura kuninkisa vapurakeni woge va yi hafere. Nsene to wapaike mauzera aga sili naga vatera vapurakeni woge mokunkondopeka elikwatakano lyawo naJehova, nokulikida rupandu komawapaiko gendi, netompoko mokulididimikira makondjeso geparu mouzuni ou ndi omu nayi va wapera moyirugana yokuzuvhisa, wa kara nokonda zokukagava siuyungwa soge nelituromo.

Ngapi nsene siuyungwa soge kuna kara sokukaresa komeho zombungakriste? Mokuresa nelituromo, yinzi ya hamena mo kupitakana tupu kutumbura nonkango nokudipongeka mouhunga. Liwapaikira nawa ereso lyoge. Nsene to ka resa karuha moBibeli, rugana epaparo. Divilisa asi ono si kwata nawa egano. Konakona omu no gwanena mo uwa novapurakeni woge, ntani resa monkedi ezi nazi vhura kuyilikida oyo.

Ove kuna kuliwapaikira kuza moyirugana yokuzuvhisa ndi? Rugurura sirongwa esi no ka zogera nomatjangwa aga ono hara kukaruganesa. Gazadara ko hena eyi vana kugazara vantu. Yisinke kava uyungire kombudi? Maudigu musinke ava ligwanekere nago? Nsene ngo liwapaikira kulikida vantu asi Nonkango daKarunga kwa kara nekohononopo komaudigu aga ava ligwanekere nago, ove ngo kara neharo lyokuyiuyunga ntani elituromo ngali wiza pwalyene.

Likida elituromo pokutovareka siuyungwa soge. Kuuyunga nelituromo kukulikida pokutovareka siuyungwa soge. Eyi ya hepa kuyilikida meligumaguro lyoge kosipara. Wa hepa kuuyunga nomukumo nye kapisi monkedi zokulinenepeka.

Ayo kwa hepa ehetakano. Vamwe kuuyunga nomalizuvho kwanayinye. Kuvhura va hepe kuvavatera mokudimburura asi muntu ogu a pitakanesa kulikida malizuvho, kuvhura kuninkisa vapurakeni vendi va demenene kwendi mevango lyokudemena kombudi ezi ana kugava. Koruha rumwe, ava wonomuga va hepa kuvakorangeda mokuuyunga nomalizuvho.

Kuuyunga nelituromo kukundama wopeke. Nsene ove kutara kovapurakeni woge ntani nokulikida elituromo mosiuyungwa soge, vapurakeni woge nawo ngava litura mo. Aporo nga tovareke mbuuyungiso zendi, ntani kwa mu singonwene asi muuyungi gomuwa. Nsene nove o hwama nompepo zaKarunga, kugava koge siuyungwa nenyanyuko ngayi tumangeda vapurakeni woge va rugane ko yuma.—Yirug. 18:24, 25; Rom. 12:11.

Elituromo lyokuliza nosiuyungwa. Takamesa asi wa ha ruganesa elituromo kupitakanena mosiuyungwa nasinye, morwa kuvhura yi ninkise vapurakeni woge va dire kusihafera. Makura nkenye etumangedo eli ngo gava kuliza neyi ono kuzogera kuvhura ngava li ncenune. Eyi kunkondopeka mulyo gokuliwapaikira nawa siuyungwa soge yipo o tjindje nkenye apa muhagaro gezwi lyoge. Kapisi o si gave monkedi zokudira kulikida elituromo lyoge. Nsene no horowora nawa magano gomosiuyungwa soge, ngo si hafera sili unene. Nye magano gamwe kuhepa asi o uyunge nelituromo kupitakana makwawo, ano eyi ya hepa kuyiruganesa nawa mosiuyungwa nasinye.

Magano gomulyo unene po ga hepa kugagava nelituromo. Siuyungwa soge sa hepa kukara nomagano gomulyo gokuvhura kutumangeda vapurakeni woge. Konyima zokufatwilira vapurakeni woge, wa hepa kuvatumangeda pokuvalikida mauwa gokuruganesa momaparu gawo magano aga ono zogere. Elituromo lyoge ngali ku vatera mokuguma nomutjima dovapurakeni woge. Kugava siuyungwa nenyanyuko kapi kwa hepa kukulisininika. Pwa hepa kukara konda, ano siuyungwa soge ngasi ku pa konda zeyi no uyungira nenyanyuko.