Ezwi lyewa

VANTU kuvakundama unene eyi atu uyunga ntani nomu atu yi uyunga. Nsene muntu ogu ana kukuuyungisa kwa kara nezwi lyewa lyeharo lyonkenda, ngayi kuninkisa o hare kupurakena nawa kupitakana gezwi lyonyanya.

Kutunga po ezwi lyewa kuvhura kukwatera mo nonkareso domuntu. Ngomu muntu ana kugwederera ediwo lyendi ntani nokutura pasirugana mausili goBibeli, marunduruko ngaga moneka monkedi omu a uyunga. Yikara yoSikriste ngwendi eharo nehafo nombili kuyilikida mezwi lyendi. (Gar. 5:22, 23) Nsene kuna kara nosinka kuhamena wopeke, ezwi lyendi ngali yi likida. Apa ruhafo aru pinganene po nkareso zokusivana, nonkango ntani nomuhagaro gezwi kuyilikida. (Malira. 3:39-42; 1 Tim. 1:12; Juda 16) Nampili kapi o zuvhu olyo eraka vana kuuyunga, nsene muntu a uyunga nelinenepeko nonyanya ntani noukenya ndi gumwe nsene a uyunga nelinunupiko nelididimiko nonkenda ntani neharo, kapi ngayi ku digopera kudimburura malisigo.

Pamwe, ezwi lyedona kuliretesa po uvera ou wa zonagura nonsengazwi ndi uvera wokupinga. Maukaro gangoso kuvhura ga kare udigu kugawapukurura mouzuni ou. Nampili ngoso, kulironga kuruganesa yilyo yombuuyungiso monkedi zongwa kuvhura kuwapukurura ezwi.

Pomuhowo, mulyo kudimburura asi mazwi govantu kwa lisiga-siga. Sitambo soge sa ha kara sokutemwinina ezwi lyomuntu gongandi. Mevango lyoyo, wapeka ezwi lyoge, noyikara yalyo yokulikarera. Yisinke nayi ku vatera mokuyirugana eyi? Pwa kara yitwa yivali yomulyo.

Pangera nawa muhesero goge. Mokuninka asi o ruganese nawa ezwi lyoge, wa hepa mpepo zokugwanena po ntani nokuhesera nawa. Nsene kapi ngo yi rugana eyi, ezwi lyoge kapi ngali zuvhika nawa, ntani ngo uyunga kuhaka-haka.

Ruha rorunene romapunga kapisi rwekeguru lyonturo; ruha oru kumoneka tupu ngwendi runene morwa yisupa yokomapepe. Nye, mapunga kwa nenepera keguru lyorufungamutjima. Morwa aro kwa ru kwatakana konompatji dokonhi, rufungamutjima kwa hangura nturo kezimo.

Nsene no zwida mpepo ruha tupu rwekeguru romapunga apa no hesera, kapi no kara siruwo wa hana kuhesera. Ezwi lyoge kapi ngali kara nononkondo, ntani ngo roroka usimbu. Mokuhesera nawa, wa hepa kuhingira ndi kusikama kuvyukilira ntani nokugomona mapepe goge. Litura mo unene mokudira kutamununa tupu ruha rwekeguru ronturo zoge apa no uyunga. Pomuhowo zwida ruha rwepevhu romapunga goge. Nsene ruha oru runa zura mpepo, nompatji doge ngadi tamunuka monontere. Yimo hena, rufungamutjima ngaru gurumuka nokusindika ezimo nomaura, makura to zuvhu liva romombunda ndi sikoverero esi ono dwara. Mapunga taga gurumuka nye ago simpe moomo monompatji. Mokuliheteka nyamoge, likwata monontere donompatji doge. Makura hesera unene. Nsene o hesera nawa, kapi ngo kokera ezimo lyoge ntani nokuzerura mapepe goge. Mevango lyoyo, ngo zuvha nompatji kuna kukanduka nokugurumuka kaununu.

Yokukwama ko, wapukurura mugendo gompepo. Wa ha mana muhesero goge pokugupwagesa mongenderera. Gu pwagesa kuliwora. Wa ha heteka kugukondera pokuzinzika muliu goge. Nsene ngo yi rugana oyo, ngo uyunga ngwendi kuna kukusina. Nonsipa demezimo nedi donompatji kupwagesa mpepo, ano rufungamutjima kuninkisa mpepo va zi pwagese nononkondo ndi kuliwora.

Ngamoomu tupu muduki a lidewire marumbasano, nomuuyungi nage kuvhura a hesere nawa pokuliyomberesa. Sikama kuvyukilira nokugomona mapepe goge, hesera monkedi ezi no zwida ruha rokonhi zomapunga goge, ntani pwagesa munku kuliwora ntani nokuvarura siruwo esi no gusa momuhesero gumwe tupu. Makura liyomberesa kuresa kuziguruka ngomu ono kuhesera monkedi zokulifana.

Ninka nonsipa dorutu di liture. Sininke simwe somulyo mokukara nezwi lyewa kuna kara pokuninka nonsipa doge di liture! Ayo ngayi ku tetura komarunduruko aga ngo vhura kutura po pokulironga omu no ninka nonsipa dorutu di liture nsene kuna kuuyunga. Nondunge norutu ya hepa kulitura, morwa kukara nosinka kuninkisa nonsipa di dire kugomoka.

Ninka nondunge doge di liture pokukara nomutaro gomuwa kovapurakeni woge. Nsene ava kuna kara vantu ava o ligwanekere nawo moyirugana yokuzuvhisa, diworoka asi nampili ove kwa lironga Bibeli makwedi gomasesu tupu, wa diva yininke yomulyo kuhamena sitambo saJehova eyi no vhura kuvatantera ko. Ntani ove kuna kuvazuvhisira morwa vana hepa evatero, yi kare asi vana yi diva ndi hawe. Nsene kuna kuuyunga moSinyanga soUhompa, sinzi sovapurakeni kuna kara Nombangi daJehova. Awo vakweni zoge ntani vana hara yi kuwapere. Kwato vauyungi ava va kara novapurakeni wovawa ntani veharo ngwendi moomu twa kara nawo.

Ninka nonsipa domuliu di liture pokudemenena kononsipa odo ntani pokudigomona. Diworoka asi nonsengazwi kukankama apa nazi pita po mpepo zokutunda komapunga. Muhagaro gezwi kulitjindja ngomu nonsipa domuliu dina kulikokera nokugomoka, ngamoomu tupu muhagaro gonongodi dosikitara agu litjindji apa ava di kokere ndi ava di gomona. Apa o gomona nonsengazwi, muhagaro gezwi lyoge tagu goromoka. Kugomona nonsipa domuliu kuvatera hena mukaragorongo gu zahame, ano eyi kukundama unene muhagaro gezwi lyoge.

Ninka rutu roge narunye ru liture, eyi kwa kwatera mo nongoro nomawoko nomapepe ntani nonsingo. Eyi ngayi vatera mokugwederera komuhagaro ogu wa hepa yipo ezwi lyoge li zuvhike. Muhagaro gezwi lyangoso kuguretesa po apa rutu roge aru kara ngwendi simbangu sezwi, nye eyi kuyikundama nsene o zinzika nonsipa dorutu. Muhagaro gezwi, ogu agu tundilire momukaragokana, tagu ka hagara momukara gomazuru ntani nomoyilyo eyi ya kara noyisupa ngwendi monturo nomomazego nomosondo zokana ntani nomoyisupa yomazuru. Eyi nayinye kuvhura kugwederera komuhagaro gezwi lyewa. Nsene o dekera simbangu sezwi sosikitara, muhagaro gwaso kapi ngagu zuvhika nawa; nye sa hepa kulikarera yipo si pwagese nawa ezwi. Yimo tupu hena ya kara yilyo yorutu eyi ya kara noyisupa, eyi da kwata nonsipa dorutu. Nomuhagaro gokuwapera, ngo vhura kutjindja ezwi lyoge monaruwa ntani nokupwagesa malizuvho. Nampili mbunga zonene zovapurakeni kuvhura ngazi ku zuvhe wa hana kuzigira unene.