Kuuyunga nomukumo

NSENE muntu ta uyunga nomukumo, wopeke ngava yi mona asi age sili kwa pura eyi ana kuuyunga. Kuuyunga nomukumo gwangoso, kugumonena mezuvhiso lyomupositoli Paurusa. Age kwa tjangerere ava va ya kere vapuli moTesaronika asi: ‘Twa mu reterere mbudi zongwa, kapisi mononkango delike, hawe, moomu ose ava twa diva asi yosili atu uyunga.’ (1 Tes. 1:5) Mukumo gwangoso kugumonena hena monkedi omu nga uyunga ntani nomomparukiso zendi. Kuuyunga nomukumo gomunene kwa hepa hena kukulikida monkedi omu atu gava mausili gomoBibeli.

Kuuyunga nomukumo kapi ya lifana nokulinenepeka nokugazara asi magano goge yigo gelike po gouhunga. Mevango lyoyo, muntu ogu a uyunga nomukumo kuhamena yininke yomoNonkango daKarunga, nga yi rugana monkedi ezi azi likida epuro lyokupama moyuma oyo.—Heb. 11:1.

Yiruwo eyi no uyunga nomukumo. Ayo ya kara nomulyo kuuyunga nomukumo nsene moyirugana yokuzuvhisa ono kara. Vantu kukoneka, kapisi mbudi zoge zelike, nye hena nonkedi zoge zokuuyunga. Awo kudimburura omu sili ono kulizuvha kuhamena eyi ono kuuyunga. Kuuyunga koge nomukumo kuvhura kulikida asi ono kara nombudi zomulyo unene kupitakana nonkango edi ono kuruganesa.

Pwa kara hena hepero zokuuyunga nomukumo nsene kuna kuuyungisa mbunga zovapuli vakwetu. Mupositoli Peturusa kwa tjenge mbilive zendi zokuhova ‘mokukorangeda oku ta gava undipo asi nkenda ezi va kara nazo yizo nkenda zosili zaKarunga.’ Morwa eyi, age kwa korangedere vanavazina asi: “Kareni muna koro mwazo.” (1 Pet. 5:12) Apa ga tjangerere mbungakriste zomoRoma, mupositoli Paurusa kwa uyungire nomukumo ogu gwa va reterere uwa. Age kwa tjenge asi: “Ame kwa yi diva nawa-nawa asi, nayimwe si yokutugusa mo meharo lyaKristusa: nonomfa si deedi nomwenyo si novaengeli si nomapangero si ndi nonkondo donompepo, noyininke si yantani neyi si yokomeho. Neyi si yekeguru neyi si yokonhi-nhi, nasimwe si poyisitwa nayinye esi sokutugusa mo meharo lyaKarunga eli twa kara nalyo mwaJesus Kristusa, Hompa gwetu.” (Rom. 8:38, 39) Paurusa kwa tjenge hena nomukumo kuhamena hepero zokuzuvhisira wopeke, ano upampi wendi mosirugana sina kwa geve umbangi asi age ga divire mulyo gosirugana oso. (Yirug. 20:18-21; Rom. 10:9, 13-15) Vakuronambunga nawo va hepa kulikida mukumo gokulifana ngomu vana kuronga kutundilira moNonkango daKarunga.

Posiruwo selirongo ntani nopoyiruwo yapeke, vakurona va hepa kuuyunga nomukumo nsene kuna kuzogera yuma yopampepo kumwe novana vawo. Eyi kwa hepa asi vakurona va tunge po eharo lyaKarunga nononzira dendi monomutjima dawo. Makura kuvhura va uyunge nomukumo gokutundilira komutjima kumwe novana vawo, morwa “kana kupwagesa eyi ya zura momutjima.” (Ruk. 6:45; Deut. 6:5-7) Kuuyunga nomukumo gwangoso ngayi tumangeda hena vakurona mokutura po sihonena sepuro lya hana uyilipaki.—2 Tim. 1:5.

Ayo ya kara nomulyo mokuuyunga nomukumo unene po nsene epuro lyoge kuna kuliheteka. Mukweni ogu o dimbi nendi sure ndi murongi ndi ogu o rugana nendi kuvhura a ku pure eyi o dilire kulihameka mosipito songandi. Elimbururo lyewa lyokuvyukilira kuvhura ngali mu vatere mokufumadeka mutaro goge goBibeli kuhamena yuma oyo. Yisinke no vhura kurugana nsene gumwe a ku sininika o rugane yininke yoyidona ngwendi kukumbagera ndi kuruganesa yikwepangwe ndi ruhonda? Ya kara nomulyo mokuyizeresa nawa asi ove kapi no ka lihameka mo moyininke yangoso ntani asi nampili va ku sininike kapi no rundurura etokoro lyoge. Eyi kwa hepa asi o uyunge nomukumo nsene kuna kunyokera po yininke yangoso. Pokunyokera po ekondjeso lyamukadaPotifara mokuhondera nendi, Josefa kwa uyungire nononkondo asi: “Ngapi omu nani rugana-rugana udona wa hura opo, ni zone kwaKarunga gwange?” Apa ga mu sininikire, age makura ta duka mo monzugo.—Gen. 39:9, 12.

Omu no uyunga nomukumo. Nonkango edi no ruganesa kuvhura kulikida mukumo goge. Yikando yoyinzi Jesus kwa tamekere kupwagesa nontanto domulyo pokutanta asi: “Yosili nina kukutantera.” (Joh. 3:3, 5, 11; 5:19, 24, 25) Mukumo gwaPaurusa kwa gu likidire mononkango edi ngwendi: “Ame kwa yi diva nawa-nawa,” “Ame na diva, ame hena na korerera mwaHompa Jesus,” ntani “Kapi nina kuuyunga yimpempa, yosili nina kuuyunga!” (Rom. 8:38; 14:14; 1 Tim. 2:7) Kuhamena esikiliromo lyononkango dendi, Jehova poyiruwo yimwe nga ninkisa vaporofete vendi va ruganese nonkango denkondopeko ngwendi asi: “Ayo yiyo tupu kuhoroka.” (Hab. 2:3) Nsene kuna kutumbura mauporofete aga, nove kuvhura o ruganese nonkango dokulifana. Nsene ngo huguvara mwaJehova kapisi mwanyamoge, ntani nokuuyunga nava wopeke nefumadeko, kuruganesa nonkango edi adi likida mukumo gokulifana ngayi gava umbangi asi wa kara nepuro lyokupama.

Kuuyunga nomukumo kuvhura hena kukulikida melituromo ntani nomuhagaro gononkango edi ono kuruganesa. Maligumaguro gokosipara nokorutu nayinye kukwatesa ko nkedi ezi, nampili ngomu ya lisiga kwankenye muntu. Yi kare asi ove kwa kara nonomuga ndi nezwi lyenunu, nsene wa pura asi eyi ono kuuyunga usili ntani ono hara wopeke va yi zuvhe, kuuyunga koge nomukumo ngaku yi likida.

Yimo, nkenye nkango natu ruganesa zokulikida mukumo gwetu za hepa kukara zosili. Nsene vantu ngava yi dimburura asi ose kuna kulininkisa mevango lyokuuyunga kutundilira komutjima, kuvhura ngava gazare asi mbudi zetu kwato mulyo. Yipo nye, kupitakana pwanayinye, uyunga ngwendi moomu o uyunga. Nsene kuna kuuyungisa mbunga zonene, kuvhura o hepe kuziguruka kuuyunga nomukumo kupitakana omu o uyunga. Nye sitambo soge sa hepa kukara sokuuyunga usili nemanguruko.

Eyi nayi ku vatera o uyunge nomukumo. Mokumona asi kuuyunga nomukumo kwa kwatera mo malizuvho goge kweyi no uyunga, ya kara nomulyo mokuliwapaikira nawa. Ayo kapi ya gwanena po tupu mokugusa mauzera mosimbapiratjangwa ntani nokugatumbura. Wa hepa kukwata egano mauzera goge ntani nokugauyunga mononkango danyamoge. Wa hepa kupura asi ayo usili ntani asi eyi ono kuuyunga kuna kara nomulyo kovapurakeni woge. Eyi kutanta asi pokuliwapaikira siuyungwa soge, wa hepa kugazadara ko komaukaro gawo, neyi va diva nare, ntani omu vana kulizuvha kuhamena sirongwa oso.

Nsene ngatu gava siuyungwa kuhaka-haka, wopeke kapi ngava gazara asi twa kara nomukumo. Yipo nye, mokugwederera ko kokuliwapaikira mauzera gomawa, kondja unene konkedi zoge omu no ka si gava. Demenena unene komaruha gosiuyungwa soge aga gana hepa elituromo lyosili yipo o ka si gave nawa wa hana kutara unene pomadidiliko goge. Diworoka hena mokukanderera kwaJehova a tungike elituromo lyoge. Monkedi zangesi ‘Karunga nga ku koreka’ mokuuyunga monkedi ezi ngazi likida mukumo goge kousili ntani nomulyo gombudi zoge.—1 Tes. 2:2.