Kuliwapaikira yiuyungwa yomoSikora zoUkareli

NKENYE siuyungwa ava gava moSikora zoUkareli kugava mpito zokukura pampepo. Litura mo unene, ano ekuro lyoge ngali moneka kwanyamoge noku kwava wopeke. (1 Tim. 4:15) Sikora ngazi ku vatera o kulike evhuliko lyoge momunene.

Ove kwa kara noutjirwe wokuuyunga komeho zombungakriste ndi? Yimo ya kara, nampili nare wa litjangesa mosikora ezi. Nampili ngoso, poyili yininke yongandi eyi nayi vhura kukuvatera mokusesupika woma. Pembo, zi kare nkareso zoge zokuresa kuziguruka nkenye apa. Komapongo gomombungakriste, limburura nkenye apa, ntani nsene o muzuvhisi, lihameka nkenye apa mokuzuvhisa. Eyi ngayi ku yikisa mokuuyunga komeho zava wopeke. Mokugwederera ko, liwapaikira yiuyungwa yoge komeho zosiruwo, ntani nokuyiliyomberesa kuziguruka. Diworoka asi ngo uyunga komeho zovapurakeni ava va ku hara. Komeho zokugava nkenye siuyungwa, kanderera kwaJehova. Age kugava neharo mpepo zokupongoka kovakareli vendi owo ava zi mu hundire.—Ruk. 11:13; Fil. 4:6, 7.

Lididimika, ayo kugusa siruwo mokukara muuyungi nomurongi gokuwapera. (Mika 6:8) Nsene ntaantani tupu wa litjangesa mosikora, wa ha ndindira asi o gave siuyungwa sosiwa nare. Rugana ruha rumwe rombuuyungiso posiruwo. Lironga sirongwa somobuke esi sa zogera ruha oro. Nsene kuvhura, rugana eliyombereso eli va gava mosirongwa oso. Eyi ngayi ku pa edeuro moruha rombuuyungiso komeho o ka gave siuyungwa soge mombungakriste. Ngo tura po ezokomeho ngomu sina kupita siruwo.

Omu no liwapaikira siuyungwa sereso

Eliwapaikiro lyokuresera mbunga kwa kwatera mo yoyinzi kupitakana tupu kutumbura nonkango dina kara posipepa. Kondja mokukwata nawa egano eyi lina kutanta ereso. Apa tupu no gwana siuyungwa soge, si resurura nositambo esi momagano. Heteka kukwata egano sitambo sankenye ntanto ntani negano eli lina kara mwankenye paragarafu yipo o rese nawa magano nomalizuvho gokuwapera. Nsene kapi wa diva nkango, pura ava va diva nawa eraka. Diva ereso lyoge nawa. Vakurona kuvhura va vatere vana vawo mokuyirugana eyi.

Va ku pa ruha rwereso lyoBibeli ndi? Nampo kuvhura o pure gumwe ogu ga diva kuresa nawa a ku resere novelise odo kuziguruka, makura o didilike yininke ngwendi omu a tumbura nonkango, nonkangopongeko, nenkondopeko, ntani nomuhagaro gezwi lyendi. Heteka kuyiruganesa mereso lyanyamoge.

Nsene to tameke kuliwapaikira siuyungwa soge, divilisa asi ono resa nawa sirongwa esi sa zogera ruha rombuuyungiso oru vana ku pe. Konyima zokuliyomberesa ereso lyoge yikando yongandi, tarurura hena sirongwa sombuuyungiso. Hetekera ko kukwama mapukururo aga vana gava momunene.

Edeuro eli ngali ku vatera unene moyirugana yoge yokuzuvhisa. Ngomu ono kulihameka moyirugana yokuzuvhisa, ngo kara nonompito dononzi dokuresera ko nawopeke. Mokumona asi Nonkango daKarunga kwa kara nononkondo dokurundurura maparu govantu, ya kara nomulyo asi o di rese nawa. (Heb. 4:12) Wa ha ndindira asi ngo dive kuresa nawa konyima tupu zokugava siuyungwa simwe ndi yivali. Paurusa kwa tjangerere mukuronambunga gumwe ogu ga kere noudivi wounzi asi: “Kovekeda ngorooro kuresera vantu.”—1 Tim. 4:13, NW.

Kuruganesa siparatjangwa ntani noukaro wosihorokwa

Yisinke no rugana nsene va ku pa siuyungwa mosikora omu muna hamene ukaro wosihorokwa?

Wa hepa kutarurura yininke yitatu: (1) siparatjangwa soge, (2) ukaro wosihorokwa nomuntu ogu no ka uyunga nendi, ntani (3) ruha romapukururo oru vana ku pe.

Wa hepa kupapara mauzera gokuhamena kosiparatjangwa sosiuyungwa soge. Nye komeho zokuza mo momunene, gazadara ko kuhamena ukaro wosihorokwa nomuntu ogu no ka uyunga nendi, morwa eyi tayi ka kundama siuyungwa ntani nomonkedi omu no ka si gava. Ukaro wosihorokwa musinke no ka ruganesa? Ove to ka likida omu ava gavere mbudi zongwa komuntu ogu wa diva ndi? Ndi to ka likida eyi nayi vhura kuhoroka nsene to gwanekere nomuntu sikando sokuhova? Ogo muntu mukondi ndi munona koge? Nkareso musinke na vhura kulikida kuhamena sirongwa esi ono liwapaikire kuzogera nendi? Yisinke ga diva ko kuhamena kosirongwa oso? Sitambo musinke ono hara kusikisa mo monzogera zoge? Malimbururo komapuro ogo ngaga ku vatera mokuliwapaikira siuyungwa soge.

Kupi oku no gwana mauzera kuhamena sirongwa esi vana ku pe? Pepenuno 33 dogoro 38 lyobuke ezi, kuna kara po nzogera zokuhamena: “Omu no rugana epaparo.” Si resa, ntani ruganesa yiruganeso yepaparo eyi wa kara nayo. Pamwe kuvhura o gwane mauzera gomanzi kupitakana aga ono hepa. Resa tupu magano gana gwanene po. Ngomu ono kuyirugana oyo, tura megano ukaro wosihorokwa ou no ka ruganesa mosiuyungwa soge ntani nomuntu ogu no ka uyunga nendi. Didilika magano gomulyo aga naga ka wapera kuruganesa.

Komeho zokuwapaika siuyungwa soge ntani nokuhorowora magano aga no zogera, litulira po siruwo sokuresa ruha romapukururo oru vana ku pe. Kuruganesa mapukururo ogo kuna kara konda zonene zeyi vana ku pere siuyungwa.

Pokumana siuyungwa soge posiruwo esi vana ku pe, ngo kara nosiruwo sokugwanena po mokugava ehageso, morwa sidiviso ngava si gava nsene siruwo sosiuyungwa soge sina pu. Nampili ngoso, moyirugana yetu yokuzuvhisa, kapi twa kara noudigu wosiruwo. Yipo nye ngomu ono kuliwapaikira, gazadara ko kosiruwo esi ono kara naso, nye yomulyo po demenena kokuronga nawa.

Ukaro wosihorokwa. Konakona magano gana kara pepenuno 82, ntani horowora po limwe eli nali rugana moyirugana yoge yokuzuvhisa ntani eli nali ku pulisira mokuninka siuyungwa soge si kare soparugano. Nsene ove kwa kara mosikora siruwo sosire, yi tara eyi ngompito zokukuvatera mokusika nokutunga po udivi wokugwederera ko moyirugana yoge yokuzuvhisa.

Nsene mutareli goSikora zoUkareli ta ku pe ukaro wosihorokwa, yi tambura. Sinzi somaukaro goyihorokwa kwa kwatera mo kugavera umbangi. Nsene kapi wa zuvhisa rumwe momaukaro aga vana faturura, gwana magano pokuuyunga novazuvhisi ava va zuvhisa momaukaro gangoso. Nsene kuvhura, hetekera ko kuzogera magano gosiuyungwa soge moukaro wokulifana nou no ka ruganesa mosikora. Eyi ngayi ku vatera unene medeuro lyoge.

Nsene vana ku pe siuyungwa

Nsene ove o mugara, kuvhura va ku pe o gave siuyungwa sosisupi mombungakriste. Mokuliwapaikira yiuyungwa eyi, magano aga wa hepa kukatarurura kwa lifana naga va likida nare moyiuyungwa yomalikido. Malisigo gomanene po kuna kara vapurakeni ntani nonkedi omu no gava siuyungwa soge.

Liwapaikira siuyungwa soge yipo vapurakeni navenye va gwanene mo uwa. Sinzi sovakalimo nare va diva madi gousili woBibeli. Nampo va diva nawa sirongwa esi vana ku pe. Tura megano eyi va diva nare kuhamena sirongwa soge. Hetekera ko kugava siuyungwa soge morupe omu nava vhura kugwanena mo uwa. Lipura nyamoge asi: ‘Ngapi omu nani vhura kuruganesa sirongwa sange ni nenepeke rupandu rwange noru rovapurakeni vange kwaJehova ngomuntu? Yisinke yina kara mo mosiuyungwa eyi nayi tu vatera tu kwate egano mpango zaKarunga? Ngapi omu siuyungwa esi nasi vhura kutuvatera tu ture po matokoro gomawa mouzuni ou aga pangere madowo goparutu?’ (Efe. 2:3) Malimbururo gokuhafesa komapuro ogo kwa hepa epaparo. Pokuruganesa Bibeli, kondjera mokuteda ko matjangwa kupitakana tupu kugaresa. Faturura matjangwa aga ono kuruganesa, ntani likida omu matjangwa ogo aga vatere mokutulisa po matokoro gouhunga. (Yirug. 17:2, 3) Wa ha ruganesa mauzera gomanzi. Gava siuyungwa soge monkedi zoureru kusidiworoka.

Eliwapaikiro lya hepa hena kukwatera mo nkedi zoge zokugava siuyungwa. Wa ha ncenuna egano eli. Liyomberesa kugava siuyungwa soge kuziguruka. Elituromo lyoge mokulironga nokutura maruha aga gombuuyungiso pasirugana ngali gwederera kezokomeho lyoge. Yi kare asi ove o muuyungi gomupe ndi gwanare, liwapaikira nawa yipo o vhure kukauyunga nomukumo ntani nomalizuvho gokuwapera mosiuyungwa soge. Ngomu ono kugava nkenye siuyungwa mosikora, diworoka sitambo sokuruganesa uhwi wombuuyungiso ou ga ku pa Jehova mokumufumadekesa ko.—Epis. 150:6.