Vadinkantu—Yisinke ngomu rugana neparu lyeni?

“A ME kuna hara ngani kare neparu lina gwanene.” Eyi yiyo ga tente mukadona gumwe. Pwa hana esinganyeko nove kuna hara yokulifana. Nye ngapi omu no gwana eparu “lina gwanene”? Magawombudi novakaume, ntani nampo novarongi vaava, kuvhura va tante asi egwaneno eli kuwiza po mokugwana yimaliva yoyinzi nokuhafera etokomeno sirugana songandi—kukara mutompoli!

Nampili ngoso, Bibeli kwa rondora vadinkantu kekwama-kwamo lyetomporo lyemona asi “ngwendi mpepo tupu ono kutjida.” (Muudisi 4:4) Konda zimwe kuna kara asi, vadinkantu wovasesu tupu ava ka gwana maungawo nomfumwa. Owo ava yi gwana rorunzi kukakara meguwo lyenene. Mudinkantu goMubritania ogu ga tokomenene etomporo lyelirongo lyenene kwa tente asi: “Ayo kwa fana ngwendi epakote lina pili yuma. Nsene to ka tara monda, kutupu eyi yina kara mo.” Yimo, sirugana pamwe kuvhura kureta ugawo nediviko. Nye ayo kapi tayi vhuru kuhafesa ‘yihepwa yoge yopampepo.’ (Mateusa 5:3, New World Translation) Yimo tupu hena, 1 Johanesa 2:17 kwa rondora asi “uzuni ngau zonauka po.” Nampili o gwane etomporo mouzuni ou, alyo ngali kara lyokaruwogona tupu.

Muudisi 12:1 kwa kukorangeda vadinkantu asi: “Diworoka musiti goge momazuva goge goudinkantu.” Yimo, nkedi zongwa unene zokuruganesa eparu lyoge kuna kara moukereli waJehova Karunga. Nye pomuhowo, ove wa kona kusikilira mo mokukara moukereli waKarunga. Ngapi omu no yi rugana eyi? Ntani yisinke lya kwatera mo eparu lyokukerera Karunga?

Kusikilira mo mokukara Mbangi zaJehova

Pokutameka, ove wa kona kutunga eharo lyokukerera Karunga—ano eharo olyo kapi ali wiza po pwalyene, nampili vakurona woge va kare Vakriste. Ove wa kona kukara nelikwatakano lyanyamoge naJehova. Mukadona gumwe kwa tente asi: “Kukanderera kukuninkisa o kare nelikwatakano lyanyamoge naJehova.”—Episarome 62:8; Jakopo 4:8.

Varoma 12:2 kwa zeresa hena ntambo zimwe ezi no tura po. Amo kwa tanta mo asi: “[Diveni] kukoneka mpango zaKarunga neyi yoyiwa ya mu wapera ayo ya sikilira mo.” Ove kusinganyeka pamwe yininke eyi va ku ronga ndi? Kwama nye ekorangedo lyoBibeli, ‘nokulikonekesa’ asi yininke eyi yosili! Tura po epaparo lyanyamoge. Resa Bibeli nonombapiratjango doBibeli. Nampili ngoso, kulironga kuhamena Karunga kapisi kutarurura tupu usili. Gusa siruwo o tede kweyi ono resa yipo yi ku dame momutjima goge. Eyi ngayi ninkisa eharo lyoge kwaKarunga li kure.—Episarome 1:2, 3.

Kutunda opo, hetekera ko kuligawinwina oyo ono kulironga, nampo novagendisure vakweni. Kuzuvhisa tunda embo zende embo kuna kara ntambo zokukwama ko. Poyiruwo yimwe kuvhura o gwanekere nomunasure mukweni mezuvhiso lyoge, ano eyi kuvhura kukugusa mukumo pomuhowo. Nye Bibeli kutukorangeda asi “nokufasi nomuga koMbudi zoNgwa.” (Varoma 1:16) Ove kuna kureta mbudi zeparu nehuguvaro! Morwasinke no fira nomuga?

Nsene asi vakurona woge Vakriste, ove nampo wa za nawo nare moyirugana eyi. Nye ove kuvhura kurugana ko yoyinzi kupitakana tupu kuza membo ove ono mwena ndi kugava tupu yifo notumbapiragona ndi? Ove kuvhura kuuyunga nyamoge nsene ono zi membo, nokuruganesa Bibeli o ronge mwenyembo ndi? Nsene kapisi yimo, gwana nye mbatero kovakurona woge ndi komuhamenimo mombungakriste gomukurona. Si tura si kare sitambo soge o sikilire mo mokukara muzuvhisi gombudi zongwa gokupira kugwana ekuho!

Konyima zosiruwo, ove ngo ka tura po eligawo—kutura po mugano kwaKarunga asi ove ngo mu kerera kutunda opo. (Varoma 12:1) Nampili ngoso, eligawo kapisi sininke semehoramo tupu. Karunga kwa hepa asi navenye va ‘gave undipo weyi nokana, makura va va parure.’ (Varoma 10:10) Posiruwo sekuho, pomuhowo ove kugava ediviso lyepuro lyoge mononkango. Ntani nye na kukwama ekuho lyomomema. (Mateusa 28:19, 20) Yimo asi ekuho kwa kara ntambo zomulyo unene. Nye wa ha ligusa ko morwa kutjira asi kuvhura yi ka ku yipire mononkedi dongandi. Nsene o huguvara mwaKarunga a ku pe nonkondo, age nga ku pa “nonkondo edi dononene” di ku vatere o kare ono sikama wa hana kulinyunganga.—2 Vakolinte 4:7; 1 Peturusa 5:10.

Posiruwo sekuho, ove kukara gumwe goNombangi daJehova. (Jesaya 43:10) Eyi ya kona kukundama nononkondo nkedi omu no ruganesa eparu lyoge. Eligawo kwa kwatera mo ‘kulidina.’ (Mateusa 16:24) Ove kuvhura kuzumbanesa yitambo nomfumwa zanyamoge ‘nokuhova tanko kupapara Untungi waKarunga.’ (Mateusa 6:33) Eligawo nekuho kugava nye nompito dononzi dokuvhura kurugana ngoso. Tu tarurureni ko dimwe dado.

Nompito dokukerera Karunga siruwo nasinye

● Upioniri kuna kara mpito zimwe zangoso. Mupioniri kuna kara muzuvhisi goMukriste ogu ga gwana ekuho a gava sihonena sosiwa ntani ga liwapaikira kurugana pausesu novili 70 mokuzuvhisa mbudi zongwa nkenye kwedi. Kukara novili dononzi mokuzuvhisa nayi ka ku vatera o ka kulike ediwo lyoge lyokuzuvhisa nokuronga. Vapioniri wovanzi kwa gwanekera nehafo lyokuvatera varongwa vawo woBibeli va kare Nombangi dokugwana ekuho. Ee, yirugana musinke yomouzuni yokuvhura kuhafesa nokudamesa mutjima ngeyi?

Mokufuta yifutwa yawo yemeparu, vapioniri wovanzi kwa kara noyirugana yomouzuni yosiruwo sokuyereka. Wovanzi kuliwapaikira situmbukiro esi pokulironga unongo wongandi mosure ndi kovakurona vawo. Nsene asi ove novakurona woge kuna kulizuvha asi nayi ka ku wapera mokukagwana edeuro lyokugwederera ko konyima zosure zosekondere, divilisa nawa asi ezadagwiro lyoge kapisi asi o ka gwane yimaliva yoyinzi, nye o ka livatere moyirugana yoge yokuzuvhisa ntani nampo o ka kare muzuvhisi gosiruwo nasinye.

Nampili ngoso, edidiliko lyemeparu lyomupioniri kapisi yirugana yendi yomouzuni, nye yokuzuvhisa—a vatere wopeke va ka gwane eparu! Morwasinke no pilira kulitulira po sitambo sanyamoge soupioniri? Rorunzi upioniri kutwaredera koyitumbukiro nayopeke. Ngosihonena, vapioniri vamwe kudirukira komavango oku kuna hepa unene vazuvhisi woUhompa. Vamwe kulironga eraka lyapeke va kerere mombungakriste zeraka peke momukunda gwawo ndi nampili moyirongo nayopeke. Yimo, upioniri kwa kara nkedi zeparu zongwa!

● Yirugana youtumwa kuna kara hena mpito zimwe. Kutunda mo-1943 Sure zoBibeli zoWatchtower zaGiliyata kwa gava edeuro lyewa unene kovapioniri wokusikilira mo moyirugana youtumwa. Vamani-edeuro eli kugwana sirugana sokukakerera ngovazuvhisi wosiruwo nasinye moyirongo peke. Moyirongo yoyinzi eyi, nomukaro deparu udigu, yipo nye asi yirugana youtumwa kwa hepa ukanguki wouwa nononkondo. Nampili ngoso, vatumwa kuhafera maparu goruhafo ago hena gokusikilira mo.

● Sure zEdeuro lyoUkereli kwa zi tulira po mokudeura vakuronambunga novakwafimbunga wokusikilira mo wovadike. Edeuro lyononkondo eli lyoyivike ntantatu kukwata yirongwa ngwendi yitumbukiro yovakuronambunga novakwafimbunga nokuwapaika ntani nokuuyunga komeho zombunga. Vamwe kuvatuma va ka kerere moyirongo yavene. Vamwe kuvapura va guse sirugana soukereli mosirongo peke.

● Yirugana yoBeteli kwa kwatera mo kurugana ngomulizambeli kevango lyomutayi goNombangi daJehova. Vahamenimo vamwe vemepata lyoBeteli kurugana montambo zokuvyukilira nerugano yifo yoBibeli. Vamwe kugwana yirugana yokukwatesa ko, ngwendi ewapukururo lyetungo ntani noyiruganesa, ndi epakero mbili lyopanyama lyepata lyoBeteli. Yirugana nayinye yitumbukiro yokupongoka yokukerera Jehova. Megwederero ko, ava va kara moBeteli kuhafa mokudiva asi nkenye yimwe eyi ava rugana kuvatera vanavazinyawo mouzuni naunye.

Poyiruwo yimwe, vanavazinyetu vamwe ava va kara nediwo lyokulikarera kuvazigida va ka rugane moBeteli. Nye wovanzi kugwana edeuro lyawo konyima zokuwiza koBeteli. Owo va kara moBeteli kapi ava ruganene va gwane emona nye kuvagwanena yigava yonondya nomararo ntani nokansonsogona va fute yifutwa yavene. Muhameni gumwe gemepata lyoBeteli gomudinkantu kwa singonwene yirugana yendi ngesi asi: “Ayo yiwa sili unene! Nkareso zamo kapisi ureru, nye ame kwa gwana matungiko gomanzi moukereli wange womu.”

● Yirugana youzuni mudima kukuninkisa o lihameke mokutunga mavango gonomutayi noYinyanga yoUhompa. Vakereli wouzuni mudima, ngomu ava va tumbura, kuza koyirongo peke va ka vatere yirugana yetungo. Eyi kwa kara rupe rumwe royirugana yokupongoka, ngeyi va rugene vena va tungire ntembeli zaSaromo. (1 Vahompa 8:13-18) Ewapaiko lyovakereli wouzuni mudima kwa fana tupu ngwendi lyava vemepata lyoBeteli. Ee, ngapi tupu omu sa kara situmbukiro sosiwa esi kovanavazinyetu ava ava kerere moyirugana eyi yokutanga Jehova!

Karera Jehova nomwenyo goge nagunye

Kukerera Jehova kuna kara nkedi zongwa unene omu no ruganesa eparu lyoge. Morwasinke no pilira kulitulira po nyamoge sitambo sokukerera Karunga siruwo nasinye? Zogera ukereli wosiruwo nasinye kumwe novakurona woge novakuronambunga woge ntani nomutareli goge goruhamukunda. Nsene asi ove ono hafere Beteli ndi Giliyata ndi Sure zEdeuro lyoUkereli, kara pomapongo govahafeli veyi aga aga kara poyigongi yoruhamukunda ntani noyigongi yonomukunda.

Yimo, kapisi navenye ngava sika mo va vhure kukerera siruwo nasinye. Yiruwo yimwe maudigu goukanguki ntani goyimaliva ntani noyitumbukiro yepata kuvhura kusesupika eyi no vhura kurugana. Nampili ngoso, Vakriste navenye ava va ligava va kona kupurakena kompangera zoBibeli: “O hare Hompa Karunga goge nomutjima goge nagunye nomwenyo goge nagunye nonondunge doge nadinye.” (Mateusa 22:37) Jehova kwa hepa asi o rugane dogoro paapa una kukupulisira ukaro woge. Yipo nye asi yi kare asi ukaro woge ngapi omu wa kara, ninka kukerera Jehova si kare edemeneno lyeparu lyoge. Tura po yitambo yokuvhulika moukereli woge kwaKarunga. Yimo, “diworoka musiti goge momazuva goge goudinkantu”—ano ove ngo gwana matungiko narunye morwa ono rugana ngoso!