Omu no tamununa sirugana soge sokuzuvhisa

APA Jesus ga tumine varongwa vendi va ka zuvhise, age kwa va tanterere asi: “Muzangu gwene munzi, nye varugani vasesu.” Ava va hepere kuzuvha mbudi zongwa vanzi, yiyo ga gwedere ko asi: ‘Hundireni mwenyamuzangu, asi a tume komuzangu gwendi varugani.’ (Mat. 9:37, 38) Jesus kwa tanterere varongwa vendi omu nava zuvhisa. Age kwa yi likidire asi va hepa kuyirugana usimbu, pokutanta asi: “Yosili nina kumutantera asi, kapi ngomu yi tjiura yitata yaIsraeli, MunwaMuntu age ga hana kumyauka.”—Mat. 10:23.

² Nampili naina, vanzi vana hepa kuzuvha mbudi zongwa. Mbudi ezi zongwa zoUhompa va hepa kuzizuvhisa komeho uhura u wize, ano siruwo esi sina hupu ko sisupi. (Mar. 13:10) Mokumona asi epya kuna kara uzuni, ukaro wetu una lifana nou waJesus novarongwa vendi, nye elisigo kuna kara asi ose kuna kuzuvhisira mouzuni mudima. Ose tu vasesu mokutuhetakanesa novantu ava ava dili kukarera Jehova, nye twa kara nehuguvaro asi Jehova nga tu vatera. Mbudi zongwa ezi zoUhompa waKarunga tanko ngava zi divisa mouzuni mudima, ano apa ngasi sika mo siruwo ga tura po Jehova ntani nye ngaku kwama uhura. Kuvhura tu ture Uhompa waKarunga muhowo meparu lyetu yipo tu zuvhisire vantu wovanzi ndi? Yitambo musinke yopampepo twa litulira po?

³ Jesus ga likidire eyi Jehova ga hepa ko kovakareli vendi, pokutanta asi: “O hare HOMPA Karunga goge nomutjima goge nagunye, nomwenyo goge nagunye nonondunge doge nadinye nononkondo doge nadinye.” (Mar. 12:30) Jehova ana hara tu liture mo unene mosirugana sendi nomutjima nagunye. Eyi kutanta asi monkedi omu atu litura mo mosirugana saJehova kulikida nsene twa mu hara sili. (2 Tim. 2:15) Pwa kara nompito dononzi kwanatuvenye, kuliza noukaro wetu. Konakona nompito odo dimwe, ntani litulira po yitambo eyi nayi ku vatera o sikise mo sirugana soge sokuzuvhisa.

KUKARA MUZUVHISI

⁴ Navenye ava ava tambura usili womoBibeli nokutura po marunduruko kuvhura kukara vazuvhisi wombudi zongwa. Esi yiso sirugana ga pere Jesus varongwa vendi. (Mat. 24:14; 28:19, 20) Konyima tupu zokuzuvha mbudi zongwa, muntu kutameka kutantera ko wopeke. Eyi yiyo ga rugene Andiliyasa naFilipusa naKoroneliusa ntani navamwe hena. (Joh. 1:40, 41, 43-45; Yirug. 10:1, 2, 24; 16:14, 15, 25-34) Eyi kutanta nye asi muntu kuvhura a tameke kuzuvhisa nampili kapi ga gwana ekuho ndi? Nhi! Paapa tupu na wapera kukara muzuvhisi gokudira kugwana ekuho, age kuvhura a zuvhise tunda embo zende embo. Ntani kuliza noukaro wendi, age kuvhura a lihameke mononkedi dimwe hena dokuzuvhisa.

⁵ Konyima zokugwana ekuho, age kutwikira kuvatera wopeke va zuvhe mbudi zongwa. Vagara novakadi navenye va kara nositumbukira sokuzuvhisa mbudi zongwa. Aso situmbukira sili somulyo kulihameka mosirugana soUhompa. Nkenye ogu ana kutamununa sirugana sendi mokukarera Jehova, nga gwana ruhafo.

KUKAZUVHISIRA OKU KUNA HEPA EVATERO

⁶ Nampo mukunda ogu azi zuvhisire mbungakriste zeni kugurugurura nkenye apa ntani mambo nagenye ga pwa kuzuvhisira. Ukaro owo kuvhura u ku ninkise o hare kudirukira komukunda gwapeke oku kuna hepa evatero. (Yirug. 16:9) Nsene ove o mukuronambunga ndi mukwafimbunga, nampo kozili mbungakriste zina hepa evatero lyoge. Mutareli gweni gonombunga kuvhura a ku pe ko magano omu no ka vatera mbungakriste zongandi. Beteli kuvhura zi ku pe ko mauzera gamwe nsene ono hara kukazuvhisira koruha rwapeke mosirongo seni.

⁷ Ono hara kukazuvhisira kosirongo sapeke ndi? Nsene yimo, wa hepa kukonakona nawa etokoro lyoge. Zogera kumwe novakuronambunga womombungakriste zeni. Etokoro lyangoso ngali kukundama ntani nankenye ogu ana hamene mo mediruko olyo. (Ruk. 14:28) Nye nsene kuna kugazara kukakara ko karuwogona, hansa dirukira tupu momukunda gomosirongo seni.

⁸ Moyirongo yimwe, vanavazinyetu wovagara ava ava pitisire simpe vape mousili. Vanavazinyetu owo wovape, awo kulinunupika pokupulisira ava ava dirukire konombungakriste dawo ava va karera Jehova siruwo sosire va pitisire. Nsene ove o mukuronambunga ntani ono hara kudirukira kosirongo sapeke, sitambo soge sa ha kara sokukadinisira wopeke yitumbukira yawo, nye si kare sokukaruganena kumwe nawo. Va korangeda va ture po ezokomeho nokutambura yitumbukira mombungakriste. (1 Tim. 3:1) Lididimikira nsene yininke kapi vana kuyirugana ngwendi moomu ava yi rugana kosirongo oku wa tunda. Ngomukuronambunga, ruganesa ediwo lyoge yipo o vatere vanavazinyetu wovagara. Ano nsene ezuva limwe ngo tokora kutengura kosirongo seni, vanavazinyetu owo ngava twikira kupakera mbili mbungakriste.

⁹ Komeho Beteli zi ku tumine madina gonombungakriste oku kuna hepa evatero, Komitiye zoYirugana yomoMbungakriste zeni za hepa kutjangera mbilive Beteli. Ozo mbilive va zi hepa, yi kare asi ove mukuronambunga ndi mukwafimbunga ndi muzuvhisi gokukarerera ndi muzuvhisi tupu. Komitiye ozo za hepa kutuma mbilive ozo kumwe nehundiro lyoge koBeteli zomosirongo esi ono hara kukavatera.

KUZUVHISA MERAKA LYAPEKE

¹⁰ Kuvhura o tamunune hena sirugana soge pokulironga eraka lyapeke, kukwatera mo rupurupuru. Nsene ono hara kukazuvhisa meraka lyapeke, ya wapa kuzogera novakuronambunga ntani nomutareli gonombunga. Awo ngava ku pa ko mauzera nekorangedo eli wa hepa. Mepitisiro lyoBeteli, nombungakriste dimwe kwa tulisa po nosikora dokuronga eraka vazuvhisi ntani vazuvhisi wokukarerera ava vana hara kukazuvhisa meraka lyapeke.

KUKARA MUZUVHISI GOKUKARERERA

¹¹ Vazuvhisi navenye va hepa kudiva eyi ya hepa po nsene ono hara kukara muzuvhisi gokuvatera ndi gokukarerera ndi gosiruwo nasinye ntani noyirugana yimwe hena yoUhompa yosiruwo nasinye. Muzuvhisi gokukarerera ga hepa kukara Mukriste ga gwana ekuho gosihonena sosiwa ntani ogu au pulisire ukaro wendi a zuvhise novili edi da hepa po. Komitiye zoYirugana yomoMbungakriste yizo azi pulisire muntu nsene ana hara kukara muzuvhisi gokuvatera ndi gokukarerera, nye Beteli yizo azi gava epulisiro nsene ono hara kukara muzuvhisi gosiruwo nasinye.

¹² Uzuvhisi wokuvatera kuurugana kwedi kumwe tupu ndi gongandi gokulikwama ndi siruwo songandi kuliza noukaro. Vazuvhisi wovanzi kuyihafera kurugana uzuvhisi wokuvatera unene po poyiruwo ngwendi pomakwedi goMurarero gwaHompa ndi pedinguro lyomutareli gonombunga. Vamwe kurugana uzuvhisi wokuvatera momakwedi gepwizumuko. Vazuvhisi ava va gwana ekuho ava dimbi sure, awo kuvhura kurugana uzuvhisi wokuvatera apa azi pata sure. Ano vamwe kurugana uzuvhisi wokuvatera mokwedi kwaNsinano noku kwaKudumogona apa novili ava di gurumwisa ntani posiruwo sedinguro lyomutareli gonombunga. Yi kare asi moukaro musinke ono kara, nsene wa kara nosihonena sosiwa nonkareso zongwa ntani asi kuvhura yi ku tompoke mokusikisa mo novili douzuvhisi wokuvatera dokwedi kumwe ndi makwedi gongandi, vakuronambunga ngava yi hafera mokutarurura ehundiro lyoge lyouzuvhisi wokuvatera.

¹³ Mokukara muzuvhisi gokukarerera ntudi wa hepa kuwapaika siruwo soge yipo o sikise mo novili edi da hepa po momvhura. Ngomuzuvhisi gokukarerera, ngo hara kuruganena kumwe nombungakriste zeni. Vazuvhisi wokukarerera woupampi kuna kara etungiko kombungakriste, awo kuvatera wopeke va liture mo unene mokuzuvhisa nokuvakorangeda va litulire po sitambo sokukara vazuvhisi wokukarerera. Komeho o ture mo ehundiro lyokukara muzuvhisi gokukarerera, wa hepa kukara muzuvhisi gosihonena sosiwa ogu ga gwana ekuho ure womakwedi ntazimwe ngoso.

¹⁴ Vazuvhisi wosiruwo nasinye kuvahorowora movazuvhisi wokukarerera ava ava rugana unene mokuzuvhisa. Awo va hepa kukazuvhisira nkenye oku zina kuvatuma Beteli. Unene po kuvatuma konomukunda oku kuna hepa vazuvhisi nokukatota po nombungakriste. Pamwe, vazuvhisi wosiruwo nasinye kuvatuma konombungakriste edi dina hepa evatero. Ano vakuronambunga ava ava rugana uzuvhisi wosiruwo nasinye kuvatuma kotumbunga va ka vatere, nampili kapi kuna kara hepero zovazuvhisi. Vazuvhisi wosiruwo nasinye kugwana ko kasilinga kongandi yipo va livaterese ko. Ano vamwe kuvahorowora va rugane uzuvhisi wosiruwo nasinye pokaruwogona tupu.

VATUMWA

¹⁵ Komitiye zoyirugana yokuzuvhisa zoMbungagendesi yizo azi horowora vatumwa, ano Komitiye zoBeteli yizo azi va tumu komavango oku nava ka zuvhisira. Sitambo sawo sokukavatera mosirugana sokuzuvhisa ntani noku ka nkondopeka nombungakriste. Vatumwa awo kugwana edeuro koSikora zovazuvhisi woUhompa. Awo kuvapa mararo nokugwana ko kasilinga va livaterese ko.

SIRUGANA SOUTARELI

¹⁶ Ava azi horowora Mbungagendesi va kare vatareli wonombungakriste, pomuhowo kugwana edeuro pokuvaninka va kare vatareli wokukwatera mo yipo va gwane ko udivi. Vagara ava kwa hara sirugana sokuzuvhisa ntani vapuli vakwawo. Awo vazuvhisi woupampi novauyungi novarongi wovawa ntani va litura mo unene mokulironga Bibeli. Awo va kara nosihonena sosiwa mokulikida yiyimwa yompepo nokutara yininke kuliza nomu ayi tara Jehova ntani va kara nounongo. Nsene munazinyetu ogo ga kwara, mukadendi ga hepa kukara noyikara yoyiwa ntani ga diva kuruganena kumwe novakwawo. Age hena a kare muzuvhisi gomuwa. A kare mukadi gokukwata egano situmbukira sendi ngomu ya fira vakadi woVakriste wokulimburukwa, kapisi a dine mugara gwendi ndi a mu tokwere po. Vatareli novakadi vawo kwa kara nosirugana sosidigu, ano ava vana hara kurugana sirugana soutareli va hepa kukara noukanguki wouwa. Vazuvhisi wokukarerera kapi ava tura mo ehundiro lyokukara vatareli. Nye nsene vana hara kukara mosirugana soutareli awo kuvhura kutantera ko mutareli gwawo gonombunga, makura a va pe ko mauzera.

NOSIKORA DOUKARELI

¹⁷ Sikora zovazuvhisi woUhompa: Pana kara hepero zovazuvhisi woUhompa konomukunda oku ava dili kuzuvhisira nkenye apa ntani nokuvatera monombungakriste di ture po ezokomeho. Kuna kukorangeda vanavazinyetu wovagara nava wovakadi wovadike ntani valikwali va ture mo mahundiro gokuza koSikora ozo va ka gwane edeuro lyokuwapera. Apa ava ka mana sikora ozo, vamwe kuvatuma va tengure koyirongo yawo ngovazuvhisi wokukarerera va ka vatere konomukunda oku kuna hepa vazuvhisi. Ano vamwe ava ava ligava vene kuvapa yitumbukira yongandi moyirongo yawo ndi kuvatuma koyirongo yapeke va ka vatere. Wovasesu tupu ava ava tumu va ka kare vazuvhisi wosiruwo nasinye pokaruwogona ndi vazuvhisi wosiruwo nasinye wokukarerera. Vazuvhisi wokukarerera ava vana hara kuza kosikora ozo kuvhura kugwana mauzera pokukakara pepongo eli ali kara pwankenye sigongi somazuva gatatu.

¹⁸ Sikora zoBibeli zaGiliyata: Vanavazinyetu ava ava uyunga Ruingilisa wovadike ntani novalikwali ava va kara mosirugana sosiruwo nasinye yiwo ava horowora va ze kosikora ozo. Awo kuvhura kukakorangeda nombungakriste ntani noku nkondopeka ava va kara moBeteli. Awo va yi likida nare asi awo kuhafera kuruganena vapuli vakwawo nokuvatera vakwawo va lironge ntani nokukwama mapukururo gomoMatjangwa nongendeseso zombunga zaJehova. WomoKomitiye zoBeteli kukorangeda vanavazinyetu wokuwapera va ture mo mahundiro. Ava ava ka tunda kosikora ozo, kuvatuma mosirugana sokuzuvhisa ndi koBeteli zomosirongo sapeke ndi zomosirongo sawo.

KURUGANA KOBETELI

¹⁹ Kurugana koBeteli kuna kara situmbukira sokulikarera. Nkango Beteli kutanta asi “nzugo zaKarunga,” ayo ya liza noyirugana eyi ava ruganene mo. Ava ava rugana koBeteli kurugana sirugana somulyo omu mwa hamena kutjanga nokutoroka ntani nokuhanesa yimbapiratjangwa yoBibeli. Mbungagendesi kutara sirugana esi asi mulyo unene, morwa awo kugava epitisiro nomapukururo konombungakriste uzuni mudima. Sinzi sovatoroki kukatunga noku ka ruganena konomukunda oku ava uyunga eraka eli ava toroka. Eyi kuvavatera va dive eraka eli ava uyunga vantu nkenye ezuva. Ntani kuvavatera va dive nsene vantu kuna kukwata egano eraka eli vana ruganesa moyimbapiratjangwa eyi ava toroka.

²⁰ Sinzi soyirugana ava rugana koBeteli kuhepa nonkondo. Yipo nye asi sinzi sava ava zigida koBeteli kuna kara vadinkantu ava va ligava va gwana ekuho, woukanguki wouwa ntani wokurugana unene. Nsene pana kara hepero zovantu va ka rugane koBeteli zomosirongo seni nye nove ono hara kuza, kuvhura kugwana mauzera kovakuronambunga womombungakriste zeni kuhamena kukarugana koBeteli.

SIRUGANA SETUNGO

²¹ Kutunga mavango getu goukareli naso kuna kara sirugana somulyo, sa lifana nesi ga rugene hompa Saromo apa ga tungire ntembeli. (1 Vah. 8:13-18) Vanavazinyetu wovanzi kulizambera mosirugana esi setungo noupampi pokuruganesa siruwo sawo noyiweka yawo.

²² Nove ono hara kukavatera ndi? Nsene wa gwana ekuho ntani ono hara kukavatera, kuvhura o pure vanavazinyetu ava ava pitisire sirugana oso setungo momukunda gweni, awo ngava yi hafera mokukuvatera noku ku deura nampili kapi wa diva sirugana oso. Kuvhura o zogere novakuronambunga nsene ono liwapaikire kukavatera. Vazuvhisi ava va gwana ekuho wokuwapera kuvhura kuvatuma mokukavatera mosirugana setungo koyirongo yapeke.

²³ Nompito nonzi dokuvatera mosirugana setungo. Vazuvhisi wosihonena sosiwa ava va gwana ekuho va kara ko noudivi wongandi mosirugana setungo, kuvhura va hamene mombunga ava tumbura asi Local Design/Construction volunteers ndi LDC. Mepitisiro lyoBeteli vamwe kutunda koure va ya vatere ketungo posiruwo songandi va rugane mokambunga ava tumbura asi construction volunteers mokuyarugana yivike yivali ndi makwedi gatatu ngoso. Ava ava horowora va rugane siruwo sosire kuvatumbura asi construction servants. Muntu ogu ava tumu a ka rugane kosirongo sapeke kumutumbura asi expatriate construction servant. MoConstruction Group kwa hamena mo construction servants ntani construction volunteers, awo yiwo ava pitisire nkenye sirugana setungo ntani kuvavatera wombunga LDC nava womombungakriste ava ava lizambere. Ava ava tumbura asi Construction Group kulihameka mwankenye etungo monomukunda edi da kara mepitisiro lyoBeteli.

YITAMBO MUSINKE WA KARA NAYO YOPAMPEPO?

²⁴ Nsene wa ligava kwa Jehova, sitambo soge kuna kara sokumukarera eparu lyoge nalinye. Nye yitambo musinke yopampepo wa kara nayo? Kukara noyitambo yopampepo ngayi ku vatera o ruganese nonkondo doge noyiweka yoge monkedi zongwa. (1 Kol. 9:26) Kulitulira po yitambo yangoso, ngayi ku vatera o kare nelikwatakano lyewa naJehova nokudemenena koyininke yomulyo po ngomu ono kukondjera yitumbukira yimwe hena.—Fil. 1:10; 1 Tim. 4:15, 16.

²⁵ Mupositoli Paurusa kwa tu tulira po sihonena esi twa hepa kuhonena omu natu karera Karunga. (1 Kol. 11:1) Paurusa kwa ligeve mwene yipo a rugane unene mosirugana saJehova. Age ga yi nongwenene asi Jehova ga mu pere nompito dononzi. Age kwa tjangerere vapuli vakwawo womoKolinte asi: “Yeeyi ame kuna zegwilire nge nzira zongwa zoyirugana yoyinene.” Eyi kuna lifana noukaro wetu naina. Nompito nonzi dokukarera Jehova monombungakriste detu, unene po kuzuvhisa mbudi zongwa zoUhompa. Ngwendi moukaro waPaurusa, kurugana ‘yirugana yoyinene’ kwa hamena mo ‘nonkore dononzi.’ (1 Kol. 16:9) Paurusa ga vhulire kulipangera. Age kwa uyungire asi: “Ame kuyomberesa rutu rwange ru zire mo”. (1 Kol. 9:24-27) Nose yimo atu lizuvhu ngoso ndi?

²⁶ Kuna kukorangeda nkenye ogu a litulire po yitambo yopampepo kuliza noukaro wendi. Wovanzi ava vana kara naina mosirugana sosiruwo nasinye kwa va tompoka morwa kwa litulilire po yitambo yopampepo. Nampili paapa va kere awo simpe vanona, vakondi vawo navamwe ngava va korangeda va litulire po yitambo yopampepo. Awo va limonena ruhafo oru aru tundu pokulitulira po yitambo mokukarera Jehova, ntani kapi vana kulivera. (Yis. 10:22) Yitambo yimwe kuna kara kuzuvhisa nkenye sivike ndi kutameka kulironga novantu Bibeli ndi kulitulira po siruwo sokuliwapaikira yokomapongo. Yomulyo po kuna kara asi tu kare tuna koro nokusikisa mo sirugana setu sokuzuvhisa. Nsene tu yi rugana eyi, ngatu fumadeka Jehova nokusikisa mo sitambo setu sosinene sokumukarera narunye nanarunye.—Ruk. 13:24; 1 Tim. 4:7b, 8.