Egaununo 3

Ogu ga sita yininke nayinye

AME na diva sininke simwe sokutetukisa. Ono hara ni si ku tantere ndi?— Tara kuwoko goge. Goteka nonyara doge. Damuna sininke. Mawoko goge kuvhura kurugana yininke yoyinzi, ntani ago kuvhura kuyirugana nawa. Wa diva asi yilye ga sita mawoko getu?—

Yimo, age kuna kara ogu ga sita tuna nomazuru ntani nomeho getu. Age kuna kara Karunga, Guhya goMurongi goMunene. Ose twa yi hafera omu Karunga ga tu pa meho ndi?— Ose kuvhura kugaruganesa mokumona yininke yoyinzi. Ose kuvhura kutara konombya. Kuvhura kutara kowayi woutarara ntani eguru lyosinauguru. Kuvhura tu mone yidiragona yina kulya ngwendi yeyi yina kara pefano. Yosili, ayo kutetukisa asi ose kuvhura kumona yininke yangesi, ndi ngapi?—

Nye yilye ga sita yininke eyi? Muntu ga yi rugana ndi? Hawe. Muntu kuvhura a dike nzugo. Nye muntu nokuvhura si kurugana wayi ou au kuru. Muntu nokuvhura si kurugana sidiragona ndi mbya ndi nkenye sinamwenyo. Wa yi diva oyo ndi?—

Karunga yige ga sita yininke nayinye eyi. Karunga kwa sitire eguru nevhu. Age hena kwa ungire vantu. Age kwa ungire mugara nomukadi wokuhova. Jesus, Murongi goMunene, kwa rongere yininke eyi.—Mateusa 19:4-6.

Ngapi omu ga yi divire Jesus asi Karunga kwa ungire mugara nomukadi? Jesus ga mwene Karunga kuna kuyirugana ndi?— Nhi, ga yi mwene. Jesus kumwe naKarunga ga kere apa Karunga ga ungire mugara nomukadi. Jesus yige muntu gokuhova ogu ga ungire Karunga. Jesus muengeli ga kere, ntani age kwa parukire meguru noGuhwe.

Bibeli kututantera asi Karunga kwa uyungire asi: “Tatu ungeni po nye vantu.” (Genesis 1:26) Ono diva asi nalye ga uyungire Karunga ndi?— Age kwa uyungire naMunwendi. Age kwa uyungire nogu ga wizire pevhu konyima nokuyakara Jesus.

Ayo kuhafesa sili. Gazadara ko tupu! Apa atu purakene kwaJesus, ose kuna kuturonga ogu ga kere kumwe naKarunga apa Karunga ga sitire evhu ntani noyininke nayinye yapeke. Jesus ga lirongerere ko yoyinzi pokurugana kumwe noGuhwe meguru. Eyi yiyo Jesus ga karera Murongi goMunene.

Omu ono kugazara asi Karunga ga guvire pokukara gelike komeho a ya unge Munwendi ndi?— Hawe. Nsene asi kapi ga guvire, morwasinke ga sitilire yinamwenyo yapeke?— Age kwa yi rugene eyi morwa age Karunga geharo. Age ga here vapeke va paruke nokuhafera eparu. Twa hepa kugavera rupandu kwaKarunga morwa ga tu pa mwenyo.

Nayinye eyi ga rugana Karunga kulikida eharo lyendi. Karunga kwa sitire ezuva. Ezuva kutupa uzera ntani ugenya. Nsene pa pira ezuva nayinye ngano tayi tende ntani pevhu kapi tapa kara eparu. Kapi ono hafa asi Karunga ga sita ezuva ndi?—

Karunga kurokesa hena mvhura. Pamwe kapi to yi hafere nsene kuna kuroka mvhura morwa kapi to vhuru kupwaga ponze o ka danauke. Nye mvhura kuvatera nombya di kure. Nsene tatu mono nombya donongwa, kwalye natu gava rupandu?— KwaKarunga. Ano kwalye natu gava rupandu nsene tatu li enyango noyikwahidi eyi ayi tovara?— Twa hepa kugava rupandu kwaKarunga, morwa ezuva nomvhura zendi ayi ninkisa yininke yi kure.

Nsene gumwe ta ku pura asi: ‘Karunga yige ga sitire vantu noyikorama ndi?’ Ngapi omu no mu limburura?— Ayo uhunga mokutanta asi: “Nhi, Karunga kwa sitire vantu noyikorama.” Nye ngapi nsene muntu kapi ga pura asi Karunga yige sili ga ungire vantu? Ngapi nsene a tanta asi vantu kwa tundilira koyikorama? Bibeli kapi azi rongo yininke oyo. Azo kutanta asi Karunga kwa sitire yinamwenyo nayinye.—Genesis 1:26-31.

Nye gumwe kuvhura a ku tantere asi age kapi ga pura mwaKarunga. Yinke no vhura kuuyunga?— Kuvhura o mu likide nzugo, nokumupura asi: “Yilye ga dika nzugo ozo?” Nkenye ogu ga yi diva asi pweli gumwe ga zi dika. Nzugo kapi za lidika zene!—Vahebeli 3:4.

Makura kuvhura o mu likide hena mbya ntani nokumupura asi: “Yilye ga zi sita?” Kwato muntu ga sita mbya. Ngamoomu tupu nzugo kapi za lidika zene, nezi mbya nazo kapi za lisita zene. Pweli ogu ga zi sita. Yige Karunga.

Mu ninka a sikame ntani nokupurakena kosidira sina kudimba. Makura mu pura asi: “Yilye ga sita yidira ntani yilye ga yi ronga kudimba?” Karunga. Karunga yige ga sita eguru nevhu ntani noyinamwenyo nayinye! Age yige a gava mwenyo.

Nye, gumwe kuvhura a tante asi age kupura tupu mweyi a vhuru kumona. Kuvhura a uyunge asi: ‘Nsene kapi nina kusimona, kapi tani yi pura.’ Vantu vamwe kutanta asi kapi va pura mwaKarunga morwa kapi ava mu mono.

Yimo, ose nokuvhura si kumona Karunga. Bibeli kutanta asi: ‘Nagumwe si a vhuru kumona Karunga.’ Kwato mugara ndi mukadi ndi munona ga kara pevhu na vhura kumona Karunga. Yipo nye kwato ogu na vhura kuhetekera ko kurugana efano ndi sihwi saKarunga. Karunga kututantera asi twa ha rugana sihwi sendi. Yipo nye, kapi tayi hafesa Karunga nsene tu kara noyininke yangoso membo lyetu.—Exodus 20:4, 5; 33:20; Johanesa 1:18.

Nye nsene nokuvhura si kumona Karunga, ngapi omu wa yi diva asi age pweli? Gazadara ko kweyi. Kuvhura o mone mpepo ndi?— Hawe. Kwato ogu a vhuru kumona mpepo. Nye ove kuvhura kumona yininke eyi azi rugana mpepo. Ove kuvhura kumona yihako kuna kuligumagura apa mpepo azi pepere monomutayi dositji. Yipo nye wa yi pura asi pwa kara mpepo.

Nove kuvhura kumona yininke eyi ga rugana Karunga. Apa o mono mbya ndi sidira, ove kuna kumona yininke eyi ga sita Karunga. Yipo nye wa yi pura asi Karunga pweli.

Gumwe kuvhura a ku pure asi: ‘Yilye ga sita ezuva ntani nevhu?’ Bibeli kutanta asi: “Karunga kwa sitire eguru nevhu.” (Genesis 1:1) Yimo, Karunga kwa sita yininke nayinye eyi yoyiwa! Ngapi omu ono kulizuvha kuhamena eyi?—

Ayo sili yiwa kuparuka. Ose kuvhura kuzuvha marudimbo gomawa goyidira. Ose kuvhura kumona nombya noyininke yimwe eyi ga sita Karunga. Ntani ose kuvhura kulya nondya edi ga tu pa Karunga.

Twa hepa kugava rupandu kwaKarunga koyininke nayinye eyi. Unene po, twa hepa kumupandura morwa ga tu pa mwenyo. Nsene asi ose sili kugava rupandu kwaKarunga, ngatu rugana ko yuma. Yuma musinke oyo?— Ose ngatu purakena kwaKarunga ntani ngatu rugana eyi ana kututantera moBibeli. Monkedi zangoso ose kuvhura kulikida asi twa hara ogu ga sita yininke nayinye.

Twa hepa kulikida rupandu koyininke nayinye eyi ga rugana Karunga. Ngapi? Resa eyi va tjanga mEpisarome 139:14; Johanesa 4:23, 24; 1 Johanesa 5:21; ntani Ehororo 4:11.

[Efano pepenuno 21]

Yilye ga sita yinamwenyo nayinye?

[Mafano pepenuno 22, 23]

Mokumona asi pweli ogu ga dika nzugo, yilye ogu ga sita nombya noyitji ntani noyikorama?

[Efano pepenuno 25]

Ngapi omu no yi diva asi mpepo zina kara ko?