Egaununo 2

Mbilive zokutunda kwaKarunga geharo

TANTERA nge, buke musinke wa hara unene?— Vanona vamwe kuvhura va horowore buke zokuhamena yikorama. Vapeke kuvhura va horowore buke ezi za kara nomafano gomanzi. Ayo kuvhura kuhafesa pokuresa nobuke odo.

Nye nobuke donongwa po mouzuni kuna kara edi adi tu tantere usili kuhamena Karunga. Zimwe zonobuke odo, azo mulyo unene kupitakana nobuke nonkwawo. Buke musinke ozo?— Bibeli.

Morwasinke za karera Bibeli nomulyo?— Morwa azo kwa tunda kwaKarunga. Azo kututantera kuhamena Karunga ntani noyininke yoyiwa eyi nga ka tu ruganena. Azo hena kutulikida eyi twa hepa kurugana yipo tu mu hafese. Azo ngwendi mbilive zokutunda kwaKarunga.

Karunga ngano ga vhulire kutjanga Bibeli nazinye meguru nokuzipa vantu. Nye kapi ga yi rugene. Nampili ngomu magano ga tundililire kwaKarunga, age kwa ruganesere vakareli vendi vepevhu mokutjanga Bibeli.

Ngapi omu ga yi rugene oyo Karunga?— Mokuyikwata egano, gazadara ko kweyi. Apa atu zuvhu ezwi lyomuntu moradio, alyo kuvhura li kare lyagumwe ogu ana kara ure unene. Apa atu tarere tivi, ose kumona mafano govantu ava va kara moyirongo yapeke, nokuzuvha eyi vana kuuyunga.

Vantu kuvhura va ze ure nampili kokwedi, nokutuma nombudi pevhu. Wa yi diva oyo ndi?— Nsene asi vantu kuvhura kuyirugana, Karunga nage kuvhura a tume nombudi dokutunda meguru ndi?— Nhi, kuvhura a yi rugane! Ano age ga yi rugene nare komeho vantu va ya kare nonoradio ndi nonotivi.

Mosesa kwa kere mugara ogu ga zuvhire Karunga kuna kuuyunga. Mosesa kapi ga vhulire kumona Karunga, nye ga zuvhire ezwi lyendi. Apo kwa kere po mamiliyona govantu apa ya horokere eyi. Mezuva olyo Karunga kwa kankamesere ndundu nazinye, ntani kwa kere ko sindundumo nomaruvadi. Vantu va divire asi Karunga ana uyunga, nye awo kwa kere noutjirwe wounene. Makura tava tantere Mosesa asi: “Karunga ga ha uyunga nose, neisi natu fa.” Konyima, Mosesa ta tjanga yininke eyi ga uyungire Karunga. Ano eyi ga tjenge Mosesa moyili moBibeli.—Exodus 20:18-21.

Mosesa kwa tjenge nobuke ntano dokuhova doBibeli. Nye kapisi yige gelike ga kere mutjangi. Karunga kwa ruganesere vagara wokusika po-40 mokutjanga nobuke domoBibeli. Vagara ava kwa parukire nare-nare, ntani ayo kwa gusire nomvhura dononzi mokumana kutjanga Bibeli. Ayo kwa gusire siruwo sokusika po nomvhura 1 600! Ayo kutetukisa pokudiva asi vamwe kapi va lidivire, nye nayinye eyi va tjenge kwa liza.

Vagara vamwe ava ga ruganesere Karunga mokutjanga Bibeli kwa fumanene. Nampili ngomu Mosesa ga kere musita gononzwi, konyima ga ya kere mpitisili gomuhoko gwaIsraeli. Saromo kwa kere hompa gonondunge ntani gongawo mouzuni mudima. Nye vatjangi vamwe kapi va divikwire. Amosa kwa kere mutakamesi goyitji youkuzu.

Mokugwederera ko, mutjangi gumwe goBibeli kwa kere ndokotora. Wa diva edina lyendi ndi?— Rukasa. Mutjangi gumwe hena kwa kere mufutisi gomutero. Edina lyendi yige Mateusa. Gumwe kwa kere mulirongi goveta zomaukarelikarunga goVajuda. Age kwa tjenge nobuke dononzi domoBibeli kupitakana navenye. Wa diva edina lyendi ndi?— Paurusa. Ano varongwa vaJesus oPeturusa naJohanesa ava va kere vakwati wonomfi, nawo kwa kere vatjangi woBibeli.

Sinzi sovatjangi ava woBibeli kwa tjenge kuhamena yininke eyi nga ka rugana Karunga komeho. Ngapi omu va divire yininke oyo komeho yi ka horoke?— Karunga yige ga va pere nombudi odo. Age kwa va tanterere eyi ngayi horoka komeho.

Apa Jesus, Murongi goMunene, ga ya kere pevhu, ruha rorunene roBibeli aro rwa pwa nare kutjanga. Diworoka asi Murongi goMunene kwa kere meguru. Age ga divire eyi ga rugene Karunga. Age ga yi pulire asi Bibeli kwa tunda kwaKarunga ndi?— Nhi, ga yi pulire.

Apa nga uyunga Jesus novantu kuhamena yirugana yaKarunga, age nga resa moBibeli. Poyiruwo yimwe nga va tantere matjangwa aga ga kwete momutwe. Jesus kwa tu retera hena nombudi dononzi dokutunda kwaKarunga. Jesus kwa tente asi: “Eyi na zuvha kwendi, yiyo ani tantere uzuni.” (Johanesa 8:26) Jesus ga zuvhire yininke yoyinzi kwaKarunga morwa age kwa parukire kumwe naKarunga. Ano kupi oku natu vhura kuresa yininke eyi ga uyungire Jesus?— MoBibeli. Nayinye kwa yi tjangera mo, tu yi rese.

Yimo, apa Karunga ga ruganesere vagara mokutjanga Bibeli, awo kwa tjenge meraka eli ngava ruganesa. Yipo nye, Bibeli pomuhowo kwa zi tjenge moRuhebeli nomoRuaramaki ntani nomoRugereka. Mokumona asi sinzi sovantu naina kapi va diva kuresa maraka ogo, Bibeli kwa zi toroka momaraka gapeke. Naina maruha goBibeli kuvhura kugagwana momaraka gokupitakana po-2 260. Gazadara ko tupu kweyi! Bibeli azo mbilive ezi ga tjangera Karunga vantu navenye. Nye yi kare asi yikando yingapi va zi tjangurura, azo simpe kuna kara mbudi zokutunda kwaKarunga.

Eyi azi uyunga Bibeli kuna kara nomulyo kwetu. Azo kwa zi tjenge nare-nare. Nye azo kututantera yininke eyi yina kuhoroka naina. Ntani azo kututantera eyi nga ka rugana Karunga komeho ezi zina kara popepi. Eyi azi tanta kuhafesa! Azo kutupa ehuguvaro lyewa.

Bibeli kututantera hena omu ana tu harere Karunga tu paruke. Azo kututantera yininke youhunga neyi yoyidona. Nove name twa hepa kuyidiva eyi. Azo kututantera kuhamena vantu ava va rugene yoyidona ntani neyi ya va horokerere, yipo nose tu vhure kukandana po maudigu aga va ligwanekerere nago. Azo hena kututantera kuhamena vantu ava va rugene youhunga ntani noyitundwamo yoyiwa eyi va gwene. Ayo nayinye kwa yi tjangera uwa wanyamwetu.

Nye mokuninka asi tu gwanene mo mauwa gomanzi moBibeli, twa hepa kudiva elimbururo kepuro eli. Epuro kuna kara asi: Yilye ga tu pa Bibeli? Ngapi omu no limburura?— Nhi, Bibeli nazinye kwa tunda kwaKarunga. Ngapi nye omu natu vhura kulikida asi ose sili tu vanandunge?— Pokupurakena kwaKarunga ntani nokurugana eyi a tanta.

Yipo nye twa hepa kulitulira po siruwo sokuresa Bibeli kumwe. Apa atu gwana mbilive zokutunda komuntu ogu twa hara unene, ose kuziresurura. Azo kwa kara nomulyo unene kwetu. Bibeli nazo za hepa kukara nomulyo unene kwetu morwa azo kuna kara mbilive zokutunda kogu ga tu hara unene. Azo kuna kara mbilive zokutunda kwaKarunga geharo.

Litulira po siruwo ngesi mokuresa matjangwa aga gana kulikida asi Bibeli sili Nonkango daKarunga, edi va tjangera morwa uwa wanyamwetu: Varoma 15:4; 2 Timoteusa 3:16, 17 ntani 2 Peturusa 1:20, 21.

[Mafano pepenuno 17]

Ngapi omu twa yi diva asi Karunga kuvhura kutuuyungisa kutundilira koure?

[Mafano pepenuno 19]

Wolye madina govatjangi ava woBibeli?

[Efano pepenuno 20]

Yininke musinke no vhura kulirongera ko pokuresa Bibeli?