Egaununo 4

Karunga ga kara nedina

YISINKE no hova kupura muntu nsene sikando sokuhova muna kuligwanekera nage?— Ove ngo pura edina lyendi. Natuvenye twa kara nomadina. Karunga kwa pere muntu gokuhova pevhu edina. Age kwa mu rukire Adamu. MukadaAdamu kwa mu rukire Eva.

Nampili ngoso, kapisi vantu velike va kara tupu nomadina. Gazadara ko tupu koyininke yapeke eyi ya kara nomadina. Nsene wa weka simbwa ndi simbisi, ove kuvhura kusiruka edina, ndi kapisi yimo?— Yimo, kukara nedina mulyo unene.

Tara konombungururu masiku. Nonzi! Omu ono kugazara da kara nomadina gado ndi?— Yimo, Karunga ga pa nkenye mbungururu edina. Bibeli kututantera asi: “Age yige ga panga sivaro sonombungururu, age kuditumbura nadinye madina gado.”—Episarome 147:4.

Yilye ogu no vhura kutanta asi yige muntu gomulyo po unene mouzuni mudima?— Yimo, Karunga. Omu ono kugazara ga kara nedina ndi?— Jesus ga tente asi Karunga ga kara nedina. Posikando simwe Jesus kwa kanderere kwaKarunga asi: ‘Ame na divisa edina lyoge kovasikuli vange.’ (Johanesa 17:26) Wa li diva edina lyaKarunga ndi?— Karunga mwene kututantera asi yilyo yilye. Age kutanta asi: “Ame nyame Jehova. Olyo yilyo edina lyange.” Yipo nye asi edina lyaKarunga kuna kara JEHOVA.—Jesaya 42:8, NW.

Ngapi omu o lizuvhu apa vapeke ava diworoka edina lyoge?— Ove kuhafa, ndi kapisi yimo?— Jehova nage kuna hara vantu va dive edina lyendi. Yipo nye twa hepera kuruganesa edina Jehova apa atu uyunga kuhamena Karunga. Murongi goMunene kwa ruganesere edina lyaKarunga, Jehova, apa nga uyunga novantu. Posiruwo simwe Jesus kwa tente asi: “O hare Jehova Karunga goge nomutjima goge nagunye.”—Marukusa 12:30, NW.

Jesus ga divire asi “Jehova” alyo edina lyomulyo po unene. Yipo nye ga rongere vasikuli vendi mokuruganesa edina lyaKarunga. Ntani age ga va rongere mokutumbura edina lyaKarunga momakanderero gawo. Jesus ga divire asi Karunga kwa hara vantu navenye va dive edina lyendi, Jehova.

Nare-nare Karunga ga likidire mulyo gedina lyendi komugara Mosesa, ogu ga kere gumwe goVaisraeli. Vaisraeli kwa tungire mosirongo saEgipite. Vantu womosirongo oso ngava va tumbura asi Vaegipite. Awo kwa tulire Vaisraeli va kare vapika ntani ngava va hepeke. Apa Mosesa ga kulire, age kwa hetekere kuvatera gumwe gomomuhoko gwendi. Eyi kwa handukisire Farawo, hompa goVaegipite. Age kwa here kudipaga Mosesa! Yipo nye Mosesa ga tjwayukire mo moEgipite.

Mosesa kwa zire kosirongo sapeke, kosirongo soVamidiyana. Kosirongo oso Mosesa kwa ka kwere ntani nokukareta vana. Age hena ta ka kara musita gononzwi. Ezuva limwe Mosesa kwa ka lisilire nonzwi dendi pepi nondundu, makura yipo ga mwene sininke sokutetukisa. Sihwa kwa twerere, nye aso nokuveva si! Mosesa ta heda pepi a ka tare nawa.

Ono diva asi yisinke ya horokere?— Mosesa ta zuvhu ezwi lina kutunda pokatji kosihwa sokutwera. Ezwi tali tanta asi: “Mosesa, Mosesa!” Yilye ga uyungire eyi?— Karunga! Karunga kwa pere Mosesa yirugana yoyinzi. Karunga ta tanta asi: ‘Wiza kumwe ni ku tume kwaFarawo, hompa gwaEgipite, o ka guse mo mbunga zange zaIsraeli moEgipite.’ Karunga kwa tumbwidilire Mosesa asi nga mu vatera.

Nye Mosesa ta tantere Karunga asi: ‘Nsene nani za koVaisraeli moEgipite ni ka tante asi Karunga ana tumu nge, makura va ka pure nge asi: “Edina lyendi yige yilye?” Ame ngapi omu nani ka va limburura?’ Karunga ta tantere Mosesa a ka tantere Vaisraeli asi: ‘Jehova yige ana tumu nge kweni. Jehova yilyo edina lyange lyanarunye.’ (Exodus 3:1-15, hetakanesa NW.) Eyi kulikida asi Karunga nga ruganesa edina Jehova, ntani age kapi nga li rundurura. Karunga kwa here kumudivira narunye kedina lyendi Jehova.

Apa Mosesa ga tengwire koEgipite, Vaegipite kwa gazarere asi Jehova kwa kere sikarungagona tupu soVaisraeli. Awo kapi va gazarere asi age kwa kere Karunga gouzuni mudima. Yipo nye Jehova ga tanterere hompa goVaegipite asi: ‘Edina lyange ngava li divisa mouzuni mudima.’ (Exodus 9:16) Jehova sili ga divisire edina lyendi. Ono diva asi ngapi omu ga yi rugene ndi?—

Karunga kwa ruganesere Mosesa mokupitisira Vaisraeli va tunde mo moEgipite. Apa va ya sikire pEfuta lyEgeha, Jehova ta panuna nzira mefuta. Vaisraeli tava vindakana pevhu lyekukutu. Ano apa Farawo novakwayita vendi va gendere pevhu lyekukutu, mema aga ga sikamene komaruha nagenye taga kudumike Vaegipite, makura navenye tava fu.

Konyima vantu navenye vepevhu tava tameke kuzuvha eyi ga rugene Jehova pEfuta lyEgeha. Ngapi omu tuna yi diva asi va zuvhire yininke eyi?— Konyima zonomvhura 40, Vaisraeli kwa wizire koKanani, sirongo esi ga va tumbwidilire Jehova. Vagara vavali woVaisraeli kwa va tanterere mukadi gedina Rahabu asi: “Ose twa zuvha asi HOMPA kwa pwilikire mema gEfuta lyEgeha apa mwa tundire moEgipite.”—Josuwa 2:10.

Vantu wovanzi naina kuna lifana noVaegipite vena. Awo kapi va pura asi Jehova yige Karunga gouzuni mudima. Yiyo nye Jehova ana harere vantu vendi va tantere ko wopeke kumuhamena. Eyi yiyo ga rugene Jesus. Kehagero lyeparu lyendi pevhu, Jesus kwa tanterere Jehova mekanderero asi: “Ame na va divisa edina lyoge.”—Johanesa 17:26.

Ono hara kukara ngwendi Jesus ndi? Nsene yimo, tantera ko wopeke asi edina lyaKarunga yilyo Jehova. Ngo yi dimburura asi vantu wovanzi kapi va li diva. Nampo kuvhura o va likide moBibeli mEpisarome 83:18 (Bibeli zoRutjadi ndi NW). Tu tare si moBibeli nokuresa kumwe etjangwa eli. Alyo kutanta asi: “Ove nyovelike, gedina Jehova, ove Karunga gekEguru-guru gouzuni mudima.”

Yinke tuna lirongere ko ketjangwa eli?— Ose tuna lirongo asi Jehova yilyo edina lyomulyo po unene. Alyo kuna kara edina lyaKarunga Munankondo nadinye, GuhyaJesus ntani Musiti goyininke nayinye. Diworoka, Jesus ga uyungire asi twa hepa kuhara Jehova Karunga nomutjima gwetu nagunye. Wa hara Jehova ndi?—

Ngapi omu natu yi likida asi twa hara Jehova?— Nkedi zokuhova, pokumudiva ngaKaume koge. Ano zauvali, pokutantera ko wopeke edina lyendi. Ose kuvhura tu va likide moBibeli ezi za kara nedina lyaJehova. Ntani kuvhura tu va tantere ko kuhamena yininke yoyiwa eyi ga sita Jehova ntani neyi ga rugene. Eyi kuhafesa unene Jehova morwa age kuna hara vantu va mu dive. Nose kuvhura kulihameka mo moyirugana oyo, ndi ngapi?—

Kapisi navenye ngava hara kupurakena nsene tatu uyunga kuhamena Jehova. Vantu wovanzi kapi ngava purakene nampili apa nga uyunga Jesus, Murongi goMunene, kuhamena Jehova. Nye eyi kapi ya hagekesere Jesus mokuuyunga kuhamena Jehova.

Tu kareni ngwendi Jesus. Tu twikireni kuuyunga kuhamena Jehova. Nsene tu yi rugana ngoso, Jehova Karunga nga hafa morwa ose kuna kulikida eharo kedina lyendi.

Ngesi tu rese kumwe moBibeli matjangwa gongandi aga gana kulikida mulyo gwedina lyaKarunga: Episarome 8:1; Mateusa 6:9; Johanesa 17:6; ntani Varoma 10:13.

[Efano pepenuno 27]

Wa yi diva asi nombungururu nadinye da kara nomadina gado ndi?

[Efano pepenuno 28]

Sininke musinke somulyo ga lirongerere ko Mosesa posihwa sokutwera?

[Efano pepenuno 29]

Ngapi omu ga divisire Karunga edina lyendi pEfuta lyEgeha?

[Mafano pepenuno 30]

Jesus ga divisire edina lyaKarunga.

Kuvhura o likide edina lyaKarunga moBibeli ndi?