Egaununo 10

Jesus nonkondo unene kupitakana nompepo donondona

TO YI DIWOROKA asi morwasinke muengeli gumwe gwaKarunga ga ya karererere Satana Muzonaguli?— Morwa edowo lyendi lyokuhara kumukarera lya mu ninkisire a rwanese Karunga. Poveli vaengeli vamwe va ya kweme Satana ndi?— Yimo, poveli. Bibeli kuvatumbura asi ‘vaengeli vaSatana’ ndi nompepo donondona.—Ehororo 12:9.

Vaengeli ava wovadona ndi nompepo donondona da pura mwaKarunga ndi?— Bibeli kutanta asi: ‘Nompepo donondona nado da yi pura asi Karunga pweli.’ (Jakopo 2:19) Nye ngesi ado woma. Morwa da diva asi Karunga nga ka di futisa koyininke yoyidona eyi da rugana. Yininke musinke oyo?—

Bibeli kutanta asi vaengeli vena kwa sigire embo lyawo meguru nokuwiza pevhu va ya paruke ngwendi vantu. Awo kwa yi ruganenene morwa kwa here kuligwanekera panyama novakadi wovawa vepevhu. (Genesis 6:1, 2; Juda 6) Yinke wa diva kuhamena kuligwanekera panyama?—

Kuligwanekera panyama kuna kara apa mugara nomukadi ava kara kumwe pankedi zokulikarera. Konyima zokuyirugana, mukeke kuvhura kukura mezimo lyozina. Nye ayo epuko kovaengeli mokuligwanekera panyama. Karunga kwa hara tupu mugara nomukadi ava va likwara mokuligwanekera panyama. Monkedi zangoso, nsene mukeke vana mu hampuruka, mugara namukadendi kuvhura va mu rere.

Apa vaengeli va gusire marutu gopasintu nokuligwanekera panyama novakadi vepevhu, vakeke vawo apa va kulire kwa ya kere mamuturungu. Ago kwa kere nyanya ntani ngaga zuvhisa vantu kukora. Makura Karunga ta reta ruhanzo rorunene mokuyazonagura po mamuturungu novantu navenye wovadona. Nye Karunga kwa ninkire Nowa a tunge emuwato, mokuparura vantu wovasesu ava va rugene yoyiwa. Murongi goMunene kwa tente asi eyi ya horokere poRuhanzo, mulyo unene kuyidiworoka.—Genesis 6:3, 4, 13, 14; Rukasa 17:26, 27.

Ono diva asi yinke ya horokerere vaengeli wovadona apa rwa wizire Ruhanzo ndi?— Awo kwa hagekere kuruganesa marutu gopasintu aga va gusire, makura tava tengura meguru. Nye kapi va kere hena vaengeli vaKarunga, makura tava ya kara vaengeli vaSatana ndi nompepo donondona. Ano yinke ya horokerere vana vawo womamuturungu?— Awo va fire koRuhanzo. Ntani hena vantu navenye ava va dilire kulimburukwa kwaKarunga va fire.

Kutundilira poRuhanzo, Karunga kapi ga pulisira hena nompepo donondona di kare ngwendi vantu. Nye nampili ngomu atu dili kumona nompepo donondona, ado simpe kuhetekera ko kuninka vantu va rugane yininke yoyidona unene. Ado kuna kureta maudigu gomanene kupitakana pwanare. Morwa ado va di zuguma mo meguru di wize pevhu.

Ono yi diva asi morwasinke atu dilire kudimona nompepo donondona ndi?— Morwa ado yisitwa yopampepo. Nye ose kuvhura tu kare nousili asi ado podili. Bibeli kutanta asi Satana ‘kuna kupukisa uzuni naunye,’ ano nompepo dendi donondona kuna kumuvatera.—Ehororo 12:9, 12.

Kuvhura Muzonaguli nonompepo dendi donondona di tu pukise nokutukumbagera ndi?— Yimo, kuvhura nsene kapi tuna kutakamesa. Nye twa ha kara nowoma. Murongi goMunene kwa tente asi: ‘Muzonaguli nayimwe si kwange.’ Nsene tu kara pepi naKarunga nga tu popera koMuzonaguli nonompepo dendi donondona.—Johanesa 14:30.

Ya kara mulyo tu dive yininke yoyidona eyi nadi hetekera nompepo donondona kutuninka tu rugane. Gazadara ko tupu. Yininke musinke yoyidona da rugene nompepo donondona apa da wizire pevhu?— Komeho zoRuhanzo, ado kwa ligwanekerere panyama novakadi, sininke esi sa dira kufira kurugana vaengeli. Naina nompepo donondona kuyihafera apa vantu ava dili kulimburukwa veta zaKarunga kuhamena kuligwanekera panyama. Tanko ni ku pure: Wolye tupu wokuvhura kuligwanekera panyama?— Mouhunga, vantu ava va likwara tupu.

Naina vamatigona novakadonagona vamwe kuligwanakera panyama, nye eyi yidona. Bibeli kwa likida asi Karunga yige ga sita nomwenyo dovagara novakadi. Jehova kwa sitire maruha aga gorutu nositambo sokulikarera asi va ga ruganese tupu vantu wokulikwara. Ayo kuhafesa nompepo donondona apa vantu ava rugana yininke eyi ga silika Jehova. Pasihonena, nompepo donondona kuyihafera apa mumati ndi mukadona a danesa nomwenyo dovakwawo. Ose kapi tuna hara kuhafesa nompepo donondona, ndi ngapi?—

Posili sininke simwe hena esi da hara nompepo donondona, nye Jehova kwa si nyenga. Wa si diva asi sininke musinke oso?— Nyanya. (Episarome 11:5) Nyanya kuna kara apa vantu ava zuvhisa vakwawo kukora. Diworoka asi eyi yiyo ga rugene mamuturungu, vana wonompepo donondona.

Nompepo donondona kwa hara hena kutjilisa vantu. Poyiruwo yimwe ado kulininkisa di kare ngwendi vantu ava va fa. Pamwe kuvhura kutemwinina mazwi gowo va fa. Monkedi zangesi, nompepo donondona kukumbagera vantu wovanzi asi vantu wokufa vazuni ntani kuvhura kuuyunga novantu. Yimo, nompepo donondona kuninkisa vantu wovanzi va pure moyiundumba-ndumba.

Yipo nye twa hepa kutakamesa asi Satana nonompepo dendi donondona da ha tu kumbagera. Bibeli kurondora asi: ‘Satana kulipirura a kare ngwendi muengeli gomuwa ntani vakareli vendi nawo kuyirugana.’ (2 Vakolinte 11:14, 15) Nye nompepo donondona ado sili nondona. Tu tare omu nadi vhura kutuheteka tu kare ngwendi yido.

Kupi oku ava lirongere vantu kuhamena nyanya ndi kuligwanekera panyama pankedi zepuko ndi yourodi ndi yiundumba-ndumba?— Awo kuyitarera komalikwamo gokotivi ndi monodividi nomonovidiyo ndi kovakaume wovadona. Pokuyirugana, ayo kutuhedesa pepi naKarunga ndi noMuzonaguli nonompepo dendi donondona? Yinke ono kugazara?—

Yilye ogu ono kugazara ana tu harere tu purakene nokutarera yininke yoyidona?— Yimo, Satana nonompepo dendi donondona. Yinke twa hepa kurugana name nove?— Twa hepa kuresa nokupurakena nokutara yininke yoyiwa eyi ngayi tu vatera tu karere Jehova. Kuvhura o gazadare ko yininke yimwe yoyiwa eyi natu vhura kurugana ndi?—

Nsene tu rugana yoyiwa, kapi ngatu tjira nompepo donondona. Jesus nonkondo unene kudipitakana ntani ado da mu tjira. Ezuva limwe nompepo donondona kwa zigilire kwaJesus asi: “Nani ove kuna wizire o ya tu zonagure?” (Marukusa 1:24) Ose ngatu hafa apa Jesus nga wiza a ya zonagure po Satana nonompepo dendi donondona, ndi ngapi?— Nye siruwo esi, kuvhura tu huguvare asi Jesus nga tu popera konompepo donondona nsene tu kara pepi nendi ntani noGuhwe vemeguru.

Tu rese eyi twa hepa kurugana mwa-1 Peturusa 5:8, 9 ntani Jakopo 4:7, 8.

[Efano pepenuno 57]

Yisinke yoyidona va rugene vaengeli ava?

[Efano pepenuno 58]

Morwasinke pana karere maudigu gomanzi naina pevhu kupitakana pwanare?

[Mafano pepenuno 60]

Yisinke nayi vhura kuhoroka nsene tu tarera yininke yonyanya?

[Efano pepenuno 61]

Yininke musinke yoyiwa twa hepa kurugana?