Egaununo 32

Omu Jesus va mu popererere

POYIRUWO yimwe Jehova kurugana yuma monkedi zokutetukisa mokupopera vanona ntani nava ava dili kuvhura kulipopera vene. Nsene o genda mowiza, ove kuvhura o mone nkedi zimwe omu a yi rugana eyi Jehova. Nye pomuhowo kapi no kwata nawa-nawa egano lyeyi yina kuhoroka.

To mono sidira sina kuyatembera pevhu pepi nove. Aso kuna kumoneka ngwendi kuna remana. Tasi koko evava lyaso limwe ntani apa no si hedera, aso tasi tundu po. Ngomu no si kwama, aso tasi twikire kukuligora. Hararasi tupu, sidira tasi tuka. Evava lyaso nani kapi kali remana! Ono diva asi yinke sina rugana sidira sina?—

Pepi tupu napa kasi ya tembere sidira, vana vaso kava vanda moyihwa. Zinya tudiragona twina kuna tjira asi ove kuvhura o gwane vana vaso nokuvakoresa. Yiyo nye sina lininkisire ngwendi kuna remana ntani nokukugusa pepi novana vaso. Ono diva asi yilye gokuvhura kutupopera ngwendi moomu a popere zinya tudiragona vana vendi?— MoBibeli, Jehova kwa mu hetakanesa kosidira esi ava tumbura asi ekuvi, esi asi vatere vana vaso.—Deuteronomium 32:11, 12.

MunaJehova gomulyo po unene kuna kara Munwendi Jesus. Apa ga kere Jesus meguru, age kwa kere muntu gopampepo gononkondo ngwendi oGuhwe. Age nga litakamesa mwene. Nye apa va ya mu hampurukilire Jesus pevhu ngomukeke, age kapi ga vhulire kulitakamesa mwene. Age ga hepere epopero.

Mokuninka asi a sikise mo mpango zaKarunga pevhu, Jesus ga hepere kukura nokukara mugara gomukondi gokusikilira mo. Nye nampili ngoso, Satana kwa hetekerere ko kudipaga Jesus komeho a ya kare mukondi. Mahetekeroko mokudipaga Jesus apa ga kere munona ntani nononkedi omu ga mu poperere Jehova kuna kara esimwititi lyokuhafesa. Nove ono hara kulizuvha ndi?—

Karuwogona konyima zapa va mu hampurukire Jesus, Satana ta ninkisa mbungururu zi minikire meguru koUpumezuva. Vakonentu tava kwama mbungururu nokilometa mafere va ze koJerusarema. Apa va ka sikire oko tava pura oku ngava hampurukira ogu nga kara hompa goVajuda. Apa va pulire vagara ava va diva eyi za uyunga ko Bibeli kuhamena eyi, awo kwa limbwilire asi: “MoBeterehema.”—Mateusa 2:1-6.

Konyima apa Herodesa, hompa gomudona gomoJerusarema, ga zuvhire kuhamena hompa ogu gomupe ogu va hampurukilire modoropa zaBeterehema, age kwa tanterere vakonentu asi: ‘Zendeni, mu ka papare munona ogo. Makura mu ka tengure mu ya tantere nge ko.’ Ono diva asi morwasinke ga harerere Herodesa kudiva oku nava gwana Jesus?— Morwa Herodesa kwa kere nomfudu ntani kwa here kudipaga Jesus!

Ngapi omu ga poperere Karunga Munwendi?— Apa vakonentu va ka gwene Jesus, tava ka mu pa mauhwi. Konyima Karunga ta rondora vakonentu monzodi asi va ha tengwira kwahompa Herodesa. Awo makura tava piti nzira zapeke va ze kwawo va hana kutengwira koJerusarema. Apa ga yi zuvhire Herodesa asi vakonentu vana zi, age kwa handukire unene. Mokuhetekera ko kudipaga Jesus, Herodesa ta ninki va dipage vanonagona wovamati navenye womoBeterehema wonomvhura mbali yi gurumuke! Nye Jesus kapi ga kere mo.

Ono diva asi ngapi omu ga tjwayukire Jesus?— Konyima zapa vakonentu va tengwire kembo, Jehova ta rondora Josefa, mugara gwaMariya, mokutunda mo nokudukira koEgipite. Oko yiko va dukisilire Jesus mokumuparura kwaHerodesa gomudona. Konyima zonomvhura dongandi, apa oMariya naJosefa va ka tengwire koEgipite kumwe naJesus, Karunga kwa rondwere hena Josefa. Age kwa mu tanterere monzodi asi va ze koNasareta, oku nga ka kara Jesus megameno.—Mateusa 2:7-23.

Ono mono nye omu ga poperere Jehova Munwendi ndi?— Yilye ogu ono kugazara ga fana ngwendi tudiragona otu ga horekere zinya moyihwa ndi ngwendi Jesus apa ga kere munonagona? Ove nani kapi wa fana tudiragona twina naJesus ndi?— Nove poveli ava vana hara kukuzuvhisa kukora. Ono diva asi yiwo wolye?—

Bibeli kutanta asi Satana kwa fana ngwendi nyime gokununga ogu ana hara kutulya. Ngamoomu tupu nyime narunye a homokere tukoramagona, Satana nonompepo dendi donondona narunye kuhomokera vanona. (1 Peturusa 5:8) Nye Jehova nonkondo unene kupitakana Satana. Jehova kuvhura kupopera vanona ava ava mu karere ndi kuvhura kuvamangurura kwankenye yininke yoyidona eyi a va rugana Satana.

To diworoka mEgaununo 10 lyobuke ezi eyi Muzonaguli ntani nonompepo dendi donondona ava hetekere ko kutuninka tu rugane ndi?— Awo kuhetekera ko kutuninka tu kare nomalikwatakano gokuligwanekera panyama aga a tanta Karunga asi epuko. Nye wolye tupu va hepa kuligwanekera panyama?— Yimo, mugara nomukadi ava va likwara.

Nampili ngoso, ehudi vakondi vamwe kurara vanona. Pokurugana ngoso, vamati novakadona kuvhura kutameka nawo kurugana yininke yoyidona eyi va lironga kovakondi owo. Vanona ava nawo kuvhura kutameka kuruganesa nomwenyo dawo monkedi zepuko. Eyi yiyo ya horokere nare-nare mositata saSodoma. Bibeli kutanta asi vagara vamo, ‘wovasesu nava wokukurupa,’ kwa here kurara vagara ava va ya dingwire Roto.—Genesis 19:4, 5.

Ngamoomu tupu Jesus va hepere kumugamena, nove ono hepa egameno kovakondi nokovanona vakweni ava nava hara kukurara. Vantu ava kuvhura kulininkisa asi awo vakaume woge. Pamwe kuvhura va ku pe yuma nsene o tumbwidira mokudira kutantera vapeke eyi vana hara kukurugana. Ngwendi Satana nonompepo dendi donondona, vantu ava vayilipaki, ano awo kwa hara kulihafesa tupu vene. Awo kuhara kugwana malihafeso pokurara vanona. Eyi nzo zonene!

Ono diva asi yinke nava vhura kurugana mokulihafesa vene ndi?— Awo kuvhura kuhetekera ko mokudanesa mwenyo goge. Ndi kuvhura va danese nomwenyo dawo pomwenyo goge. Nye wa ha pulisira nkenye gumwe a danaukise ugara woge ndi ukadi woge. Nampili a kare asi mukuroge ndi mumbyoge ndi onane woge ndi otate woge. Maruha aga gorutu roge kwa likarera.

Ngapi omu no gamena rutu roge kovantu ava ava rugana yininke yoyidona yangesi?— Pomuhowo, wa ha pulisira nkenye muntu a danese mwenyo goge. Nsene gumwe a hetekera ko kuyirugana, uyunga nononkondo asi: “Hageka! Tani ka ku tanta kweyi ono kurugana!” Ano nsene muntu ogu a tanta asi eyi yina kuhoroka kuna kara epuko lyoge, wa ha yi pura. Kapisi usili. Yi kare asi yige yilye, zende o ka mu tante kwagumwe ogu no vhura kuhuguvara sili! Nampili a tante asi eyi muna kurugana nyonelike tupu muvavali muna yi diva, wa hepa simpe kukamutanta. Nampili muntu ogu a kutumbwidire mokukupa mauhwi ndi a ku tjilise, wa hepa kutunda po pwendi nokuza o ka mu tante.

Wa ha kara nowoma, nye wa hepa kutakamesa. Apa vakurona woge ava ku rondora kuhamena vantu ndi mavango aga ga kara nosiponga, wa hepa kupurakena kwawo. Nsene o va purakena, kapi ngo pa mpito muntu gomudona a ku korese.

Resa kuhamena kulikunga nyamoge koyirugana yoyidona yoruhonda, mwaGenesis 39:7-12; Yisewe 4:14-16; 14:15, 16; 1 Vakolinte 6:18; ntani 2 Peturusa 2:14.

[Efano pepenuno 167]

Ngapi omu sidira esi sina kupopera vana vaso?

[Efano pepenuno 168]

Apa vakonentu va mene kudingura Jesus, erondoro musinke ga geve Karunga mokupopera Jesus?

[Efano pepenuno 169]

Ngapi omu Jesus va mu poperere hena?

[Efano pepenuno 171]

Yisinke wa hepa kuuyunga nokurugana nsene gumwe na hetekera ko kukukwata monkedi zepuko?