Egaununo 36

Wolye ngava ka vhumbura? Kupi ngava ka kara?

MOMAGAUNUNO gavali ga ka pita, vantu vangapi twa lirongere ava va vhumbwire?— Vatano. Vangapi va kere vanona?— Vatatu. Ano gwaune kwa mu tumbwire asi mumatigona. Omu ono kugazara yinke yina kulikida eyi?—

Ayo kulikida asi Karunga ga hara vanona. Nye age nga ka vhumbura hena vantu vapeke wovanzi. Karunga nga ka vhumbura tupu owo va rugene yoyiwa ndi?— Kuvhura tu gazare ngoso. Nye, vantu wovanzi kapi va lirongere usili kuhamena Jehova Karunga naMunwendi. Awo ngava rugana yininke yoyidona morwa awo kwa va rongere yininke yepuko. Omu ono kugazara, Jehova nga ka vhumbura vantu wokufana ngoso ndi?

Bibeli kutanta asi: “Va kare vawa ndi vadona, ngava va pindura koufe.” (Yirugana 24:15) Morwasinke ngava va vhumbwira vantu wovadona?— Morwa awo kapi va gwene mpito mokulironga kuhamena Jehova neyi ga hara vantu va rugane.

Omu ono kugazara, siruwoke ngava ka vhumbura vantu?— Gazadara ko asi apa Rasarusa ga fire Jesus ga tumbwidilire Malita asi: “Mpanzoge na vhumbuka.” Malita ta mu limburura asi: “Na yi diva asi, nga vhumbuka pevhumbuko lyezuva lyouhura.” (Johanesa 11:23, 24) Yisinke ga tembe Malita apa ga tente asi Rasarusa nga vhumbuka ‘pezuva lyouhura’?—

Malita ga divire etumbwidiro eli lyaJesus asi: ‘Navenye ava va kara monontoko, ngava pwaga mo.’ (Johanesa 5:28, 29) ‘Ezuva lyouhura’ kuna kara apa navenye ava va kara momagano gaKarunga ngava ka va vhumbura. Ezuva eli lyouhura kapisi ezuva lyonovili 24. Alyo ngali kara lyonomvhura eyovi. Bibeli kutanta asi mezuva eli ‘Karunga nga pangura uzuni.’ Ano ava nga ka pangura ngava kwatera mo ava ngava gwana evhumbuko.—Yirugana 17:31; 2 Peturusa 3:8.

Gazara tupu omu ngali ka kara ezuva olyo lyewa! Mezuva eli lyonomvhura eyovi, mamiliyona gomanzi govantu ava va fa ngava ka tengwira hena keparu. Jesus kutumbura evango eli ngava ka va vhumbwira asi Paradisa. Tu ze tu tare oku ngazi kara Paradisa ntani omu ngazi ka fana.

Konyara novili ntatu komeho Jesus a ka fe, age kwa uyungire kuhamena Paradisa nomugara ogu va mu pamparere nendi. Mugara gwina kwa mu dipagerere morwa maunzoni aga ga rugene. Nye apa mugara ogu gomukorokotji ga nomenene nokupurakena eyi va uyungire kuhamena Jesus, ta tameke kupura mwaJesus. Makura mukorokotji gwina ta tanta asi: “Ngo diworoke nge apa ngo za mouhompa woge.” Jesus ta mu limburura asi: “Yosili nina kukutantera naina asi, ngo ka kara kumwe name moParadisa.”—Rukasa 23:42, 43, NW.

Yisinke ga tembe Jesus apa ga uyungire nonkango odo? Kupi ngazi kara Paradisa?— Gazadara ko si tanko. Pomuhoverera, kupi za kere Paradisa?— Diworoka asi Karunga kwa pere mugara gomuhowo Adamu namukadendi va tunge moparadisa paapa pevhu. Kwa zi tumbwire asi sikunino saEdeni. Mosikunino oso kwa kere mo yikorama, nye kwato ogu ya remekere. Ntani mwa kere hena yitji yomanyango goutovara kumwe hena nomukuro gomunene. Alyo kwa kere evango lyewa mokutunga!—Genesis 2:8-10.

Apa atu resa asi mukorokotji gwina nga ka kara moParadisa, twa hepa kutura megano asi evhu eli ngava ka li ninka li ka kare evango lyewa lyokutunga. Ngoso Jesus nga ka kara pevhu kumwe nomukorokotji gwina moParadisa ndi?— Hawe. Ono diva asi morwasinke nga dilira kukara Jesus pevhu ndi?—

Morwa Jesus nga kara meguru a pangere ngaHompa goParadisa pevhu. Jesus nga kara nomugara gwina monkedi ezi asi nga ka mu vhumbura koufe nokukamupa yihepwa yendi. Nye morwasinke nga pulisilira Jesus mugara gwina ga kere nare mukorokotji a kare moParadisa?— Tu ze tu tare nsene natu vhura kugwana elimbururo.

Komeho mukorokotji gwina a ka uyunge naJesus, ga divire kuhamena sitambo saKarunga ndi?— Hawe, kapi ga si divire. Age nga rugana yininke yoyidona morwa kapi ga divire usili kuhamena Karunga. MoParadisa ngava ka mu ronga kuhamena sitambo saKarunga. Makura ngava ka mu pa mpito mokukalikida asi age sili ga hara Karunga pokurugana mpango zendi.

Navenye ava ngava vhumbura ngava paruka moParadisa pevhu ndi?— Hawe. Ono yi diva asi morwasinke?— Morwa vamwe ngava va vhumbura mokukaparuka kumwe naJesus meguru. Ngava ka pangera kumwe nendi ngovahompa woParadisa pevhu. Tu ze tu tare asi ngapi twa yi diva eyi.

Momasiku komeho Jesus a ka fe, age kwa tanterere vapositoli vendi asi: ‘Meguru membo lyoTate mwa kara mavango gomanzi, tani zi ni ka mu wapaikire evango.’ Makura Jesus ta va tumbwidire asi: “Ngani ka tengura ni ya mu simburure, none ngomu ka kare oku na kara.”—Johanesa 14:2, 3.

Kupi oku ga zire Jesus konyima zevhumbuko lyendi?— Yimo, age kwa tengwire meguru a ka kare kumwe noGuhwe. (Johanesa 17:4, 5) Yipo nye Jesus kwa tumbwidilire vapositoli vendi ntani novasikuli vapeke asi nga ka va vhumbura yipo va vhure kukakara kumwe nendi meguru. Yisinke ngava ka rugana meguru kumwe naJesus?— Bibeli kuuyunga asi varongwa vendi ava va hamena ‘mevhumbuko lyomuhowo’ ngava ka kara meguru nokukapangera evhu “kumwe nendi nomumvho eyovi.”—Ehororo 5:10; 20:6; 2 Timoteusa 2:12.

Vangapi ngava ka hamena mo ‘mevhumbuko lyomuhowo’ nokukapangera kumwe naJesus ngovahompa?— Jesus kwa tanterere varongwa vendi asi: ‘Walye o tjira ove mbungagona, yeeyi Karunga kuna hara a mu pe Uhompa wendi.’ (Luke 12:32) “Mbungagona” zowo ngava vhumbura mokukakara kumwe naJesus moUhompa wendi wemeguru, kwa kara nosivaro. Bibeli kulikida asi “mayovi efere nonomurongo ne nane” ngava va gusa pevhu va ze meguru.—Ehororo 14:1, 3.

Vangapi ngava ka paruka moParadisa pevhu?— Bibeli kapi za gava sivaro. Nye Karunga ga tanterere oAdamu naEva apa va kere mosikunino saEdeni mokureta vana nokuzwida evhu. Awo kapi va yi rugene. Nye Karunga nga ka divilisa asi sitambo sendi sokuzwida evhu novantu wovawa ngasi ka sika mo.—Genesis 1:28; Jesaya 45:18; 55:11.

Gazara tupu omu ngayi ka tovara mokukaparuka moParadisa! Evhu nalinye ngali kara ngwendi sikunino soufuuli. Aso ngasi zura yidira noyikorama ntani ngasi fuura nankenye rudi royitji nonombya. Kwato ogu nga ka zuvha kukora morwa asi ta vere, ntani kwato ogu nga ka fa. Navenye ngava ka kara vakaume. Nsene tuna hara tu ka paruke narunye moParadisa, ngesi yiso siruwo sokuliwapaikira.

Resa yoyinzi kuhamena sitambo saKarunga kevhu moYisewe 2:21, 22; Muudisi 1:4; Jesaya 2:4; 11:6-9; 35:5, 6; ntani 65:21-24.

[Efano pepenuno 187]

Morwasinke vamwe ava va dilire kurugana youhunga nga ka va vhumbwira Karunga?

[Efano pepenuno 188]

Kupi ngazi kara Paradisa ezi ga tanterere Jesus mugara ogu?

[Efano pepenuno 189]

Nsene tatu resa kuhamena Paradisa, yisinke twa hepa kutura megano?

[Mafano pepenuno 190]

Ava ngava ka vhumbura kupi oku ngava ka kara, ntani yisinke ngava ka rugana?