Egaununo 40

Omu natu hafesa Karunga

YISINKE natu vhura kurugana mokuhafesa Karunga? Kuvhura tu mu pe nkenye eyi ndi?— Jehova kutanta asi: “Yikorama nayinye yomowiza, yange.” Age kutanta hena asi: “Sisiliveli nongorodo zomouzuni zange.” (Episarome 24:1; 50:10; Hagayi 2:8) Posili sininke esi natu vhura kumupa Karunga. Sininke musinke oso?—

Jehova kwa tu pulisira mokutokora kumukarera ndi hawe. Age kapi a tu sininike tu rugane eyi ana hara tu rugane. Tu ze tu tare eyi Karunga ga tu ungira yipo tu vhure kutokora nsene asi tatu mu karere ndi hawe.

Nampo wa yi diva asi pwa kara mahina aga va wapaika mokurugana yirugana yongandi. Mahina gangoso kapi aga horowora eyi naga rugana. Jehova ngano ga vhulire kutuunga natuvenye tu kare ngwendi mahina gangoso. Age ngano ga vhulire kutuunga yipo tu vhure kurugana tupu eyi ana tu harere tu rugane. Nye Karunga kapi ga yi rugene oyo. Ono yi diva asi morwasinke?— Yidaneso yimwe kwa kara ngwendi mahina ogo tuna singonona. Nsene o si diva, tasi rugana yininke eyi ga si wapaikira ogu ga si rugana. Wa mona rumwe sidaneso sokufana ngoso ndi?— Rorunzi vantu kuvaseta kudana nosidaneso esi asi rugana eyi tupu va si wapaikira. Karunga kapi ana hara tu mu limburukwe morwa ose mahina aga va wapaikira mokumukarera. Jehova kuna hara tu mu karere morwa twa mu hara ntani morwa tuna hara kumulimburukwa.

Omu ono kugazara, ngapi a lizuvhu Guhyetu gemeguru apa atu mu limburukwa morwa tuna hara kuyirugana?— Tantera nge, ngapi omu nkareso zoge azi kundama vakurona woge?— Bibeli kuuyunga asi munona gomunongo “kutumbadekesa guhwe” nye munona gomugova “kuretera zina eguwo.” (Yisewe 10:1) Wa yi koneka asi apa o rugana eyi ava ku tantere oguho nonyoko kuvahafesa?— Nye ngapi omu ava lizuvhu apa o dili kuvalimburukwa?—

Ngesi tu ze tu gazadare ko kuhamena Guhyetu gemeguru, Jehova. Age kututantera omu natu vhura kumuhafesa. Gusa Bibeli zoge o penune moYisewe 27:11, NW. Karunga kuna kututantera asi: “Munwange kara munongo nokuhafesa mutjima gwange, yipo ni limburure ogu ana kuswaura nge.” Ono yi diva asi yisinke ayi tanta kuswaura muntu ndi?— Muntu kuvhura kukuswaura pokukuzora ntani nopokuuyunga asi ove kapi to vhuru kurugana eyi ono tanta asi to yi rugana. Ngapi omu Satana a swaura Jehova?— Tu ze tu tare.

Diworoka, twa lirongere mEgaununo 8 mobuke ezi asi Satana kwa hara kukara gopomuhowo ntani kwa hara asi nkenye gumwe a mu limburukwe. Satana kutanta asi vantu kukarera tupu Jehova morwa Jehova nga va pa mwenyo gwanarunye nsene va mu karera. Konyima zokupukisa oAdamu naEva va dire kulimburukwa Jehova, Satana kwa homwene Karunga asi: ‘Vantu kukukerera tupu morwa yeeyi o va pe yininke. Pe nge tupu mpito, ano ame kuvhura kuninka nkenye gumwe a tunde ko koge.’

Nonkango dene-dene edi kapi to di gwana mo moBibeli. Nye pokuresa kuhamena mugara Joba, ayo kutuzerera nawa-nawa asi Satana ga uyungire nonkango dokufana ngwendi ngoso kwaKarunga. Yi kare asi Joba ngano ga limburukwire kwaKarunga ndi hawe, ayo kwa kere nomulyo kwaSatana ntani kwaJehova. Tu ze tu penune Nobibeli detu mwaJoba egaununo 1 neli 2 yipo tu tare eyi ya horokere.

Koneka megaununo 1 asi Satana yimo ga kere meguru apa vaengeli va monekere kosipara saJehova. Jehova kwa pulire Satana asi: “Yinke ono ka rugana?” Satana ta limburura asi age kuna ka gendagura pevhu. Jehova ta mu pura hena asi: ‘Ono nongonona asi Joba kukerera nge ntani ga nyenga kurugana udona ndi?’—Joba 1:6-8.

Poopo tupu Satana ta ligusa-gusa mo asi: ‘Joba kukukerera tupu morwa kapi ga kara nomaudigu. Nsene o hageka ngesi kumupopera ntani nokumutungika, age ngano nga teka ko koge.’ Jehova ta limburura asi: ‘Satana, kuvhura o rugane nkenye eyi ono hara kumurugana, nye Joba mwene nokanunu si asi o mu korese.’—Joba 1:9-12.

Yisinke ga rugene Satana?— Age kwa wapaikire vantu va ka vake nongombe noyindongili ntani nokukadipaga ava ngava yi lisa. Makura ruvadi taru dipaga nonzwi novasita vado. Konyima, vantu tava wiza nokuyavaka nongameru nokuyadipaga ava ngava di takamesa. Moruhura, Satana ta retesa po ekundungu eli lya mbandwire nzugo ezi va kere vana vaJoba murongo, ano navenye kwa fire. Kugusa ko nayinye eyi ya horokere, Joba simpe nga kerere Jehova.—Joba 1:13-22.

Apa Jehova ga mwene hena Satana, ta mu tantere asi Joba simpe ha ga limburukwira. Satana ta ligusa-gusa mo pokutanta asi: ‘Nsene o pulisira nge ni gume rutu rwendi, age ngano ta teka ko koge.’ Makura Jehova ta pulisire Satana mokukoresa rutu rwaJoba, nye ta mu rondora asi ga ha mu dipaga.

Satana ta zuguma Joba masina rutu rwendi mudima. Ago kwa nukire momudona dogoro kwato gumwe ga here kumuhenyena. Nampili mukadaJoba kwa tanterere yendi asi: “Yinke yokudilira kufingilira Karunga o fe?” Owo va lininkisire asi vakaume vaJoba kwa ya mu dingwire, ano awo va ya mu ninkisire a lizuvhe udona unene pokuuyunga asi age nampo kwa rugana yininke yoyidona yiyo ana karere nomaudigu nagenye aga. Nampili ngomu Joba ga ligwanekere nomaudigu nokukora oku ga mu reterere Satana, age ga twikilire kukarera Jehova noulimburukwi.—Joba 2:1-13; 7:5; 19:13-20.

Omu ono kugazara, ngapi omu ga lizuvhire Jehova kuhamena ulimburukwi waJoba?— Awo wa hafesere Jehova morwa ga vhulire kutantera Satana asi: ‘Tara Joba! Age kukarera nge morwa ga hara kuyirugana.’ Ove ngo kara ngwendi Joba, ogu na vhura kuruganesa Jehova ngosihonena sokulikida Satana asi munayimpempa ndi?— Azo kuna kara mfumwa mokugava elimbururo kweyi ga tente Satana asi age kuvhura kugusa nkenye ogu a dire kukarera Jehova. Yosili, Jesus kwa yi tere asi azo mfumwa.

Murongi goMunene kapi ga pulisilire Satana a mu ninkise a rugane yininke yepuko. Gazara tupu omu sihonena sendi sa hafesere oGuhwe! Jehova ga vhulire kutara kwaJesus nokulimburura Satana asi: ‘Tara Munwange! Age kwa limburukwa nge morwa ga hara nge!’ Gazara tupu ruhafo oru ga kere naro Jesus mokuhafesa mutjima goGuhwe. Morwa ruhafo oro, Jesus kwa lididimikire nampili nomfa dokositji.—Vahebeli 12:2.

Ono hara kukara ngwendi Murongi gwetu goMunene nokuhafesa Jehova ndi?— Twikira kulironga kuhamena eyi ana ku harere Jehova o rugane, ntani mu hafesa pokuyirugana!

Resa eyi ga rugene Jesus mokuhafesa Karunga ntani neyi twa hepa kurugana mokumuhafesa, moYisewe 23:22-25; Johanesa 5:30; 6:38; 8:28; ntani 2 Johanesa 4.

[Efano pepenuno 207]

Morwasinke Karunga ga dilire kutuunga tu kare ngwendi ehina eli?

[Efano pepenuno 208]

Ngapi omu no vhura kuhafesa Jehova ntani novakurona woge?

[Efano pepenuno 209]

Konyima apa va zonene oAdamu naEva, ngapi omu Satana ga homwene Jehova?

[Efano pepenuno 210]

Yisinke ga lididimikilire Joba, ntani morwasinke ya hafeserere Karunga?