Kuponga kumwe moukareli

1. Apa varongwa va pongere kumwe, yisinke va gwene, ntani morwasinke?

KONYIMA zevhumbuko lyaJesus, varongwa vendi kwa pongere kumwe va likorangede-korangede. Awo kwa zedilire mavero morwa kutjira nonkore dawo. Nye, utjirwe tau va pu apa Jesus ga va monekerere nokuvatantera asi: “Tambureni Mpepo zoKupongoka.” (Resa Johanesa 20:19-22.) Varongwa va ya pongere hena, ano Jehova ta va powoomwene mpepo zokupongoka. Awo va gwene nonkondo yipo va vhure kusikisa mo sirugana sokuzuvhisa.—Yirug. 2:1-7.

2. (a) Ngapi Jehova a tu pe nonkondo, ntani morwasinke twa di hepera? (b) Morwasinke Ukareli wepata wa karera nomulyo? (Tara nondanda dokonhi ntani kakende “Ukareli wepata,” pepenuno 175.)

² Ngwendi varongwa vena, nose kupita momaudigu gokulifana. (1 Pet. 5:9) Poyiruwo yimwe nose kutjira vantu. Yipo twa hepera nonkondo daJehova tu lididimikire moyirugana yokuzuvhisa. (Efe. 6:10) Jehova kutupa nonkondo odo kupitira momapongo. Nkenye sivike ose kukara nomapongo gatano, Siuyungwa sanavenye, Elirongo lyoRuhungu, Elirongo lyoBibeli lyoMbunga, Sikora zoUkareli, ntani Epongo lyoYirugana.a Ntani ose kukara noyilika yine momvhura, sigongi somazuva gatatu, yigongi yivali yezuva limwe ntani Murarero gwaHompa. Morwasinke ya karerera nomulyo tu kare momapongo ogo? Ngapi mapongo ogo ga tamekere? Nkareso zetu komapongo, yisinke azi horora kutuhamena?

Morwasinke atu pongere?

3, 4. Yisinke Jehova ga pangera vantu vendi va rugane? Gava yihonena.

³ Jehova kwa pangera vantu vendi va ponge va mu karere. Pasihonena, momvhura 1513 komeho Jesus a wize pevhu, Jehova kwa pere Vaisraeli Veta omu mwa hamenene Esabata yipo nkenye epata li mu karere nokulironga Veta. (Deut. 5:12; 6:4-9) Apa Vaisraeli ngava sikisa mo mpangera ozo, mapata gawo kwa nkondoparere ntani muhoko nagunye kwa kere nelikwatakano lyewa naJehova. Nye apa ngava dili kuponga kumwe va karere Jehova, age ga va nyokere.—Lev. 10:11; 26:31-35; 2 Hist. 36:20, 21.

⁴ Jesus ga tulire po sihonena sosiwa. Mwankenye Esabata, age nga zi mosinagoge. (Ruk. 4:16) Konyima zevhumbuko lyendi, varongwa vendi ngava pongo kumwe nampili ngomu za hege po veta zEsabata. (Yirug. 1:6, 12-14; 2:1-4; Rom. 14:5; Koros. 2:13, 14) Momapongo ogo, awo kapi tupu ngava lirongo nokulikorangeda nye hena ngava gava nonzambo dompandu kwaKarunga kupitira momakanderero nomomalimbururo ntani nomononsumo.—Koros. 3:16; Heb. 13:15.

5. Morwasinke atu pongere nkenye sivike nokukara poyigongi nkenye mvhura? (Tara kakende pepenuno 176, “Yigongi eyi ayi reta vantu vaKarunga kumwe.”)

⁵ Mokulifana, apa atu pongo nkenye sivike nokukara poyigongi nkenye mvhura, ose kukwatesa ko Uhompa waKarunga nokugwana nonkondo dompepo zokupongoka nokulikorangeda-korangeda. Momapongo ogo, ose kukarera Jehova kupitira momakanderero nomalimbururo ntani pokudimba nonsumo. Nampili ngomu mapongo getu ga lisiga nomu ngava ga rugana Vaisraeli novarongwa vaJesus, nye nagenye mulyo. Ngapi ga tameka mapongo aga tuna kurugana?

Mapongo kutukorangeda “mokulihara-hara nomokurugana yirugana yoyiwa”

6, 7. (a) Yisinke sitambo somapongo getu? (b) Ngapi ngava ga rugana mapongo?

⁶ Apa munazinyetu Charles Taze Russell ga tamekere kupapara usili woNonkango daKarunga, ga dimbwilire mulyo gokuponga kumwe nava va kere nositambo sokulifana. Mo-1879, Russell kwa tjenge asi: “Name novakwetu moPittsburgh ngatu pongo nokukonakona matjangwa nkenye Sondaha.” Ava ngava resa Ruhungu kwa va korangedere va ponge kumwe, apa za ya sikire mvhura 1881, mapongo ngava ga rugana moPittsburgh, Pennsylvania, nkenye Sondaha noUtatu. Sirongwa soRuhungu rwaMangundu 1895, kwa tente asi sitambo somapongo ogo sokukorangeda “Vakriste va tulise po ukaume nokulihara nokukara mouumwe” ntani nokupa mpito owo vana pongo va likorangede-korangede.—Resa Vahebeli 10:24, 25.

⁷ Mwa za nomvhura, Valirongi woBibeli ngava rugana mapongo gawo mononkedi dokulisiga-siga. Pasihonena, mo-1911 kambunga kamwe komoAmerika kwa tjenge mbilive asi: “Nkenye sivike ose kuponga rutano.” Awo ngava pongo moMandaha nomoUtatu nomoUtano ntani ruvali moSondaha. Mo-1914, kambunga kamwe komoAfrika kwa tjenge mbilive asi: “Ose kuponga ruvali mokwedi, kutundilira Utano dogoro Sondaha.” Mwa za siruwo, tapa ya horoka marunduruko momapongo getu. Tu tareni marunduruko ogo.

8. Kosinke ya hamenene yiuyungwa yanare?

⁸ Siuyungwa sanavenye. Mo-1880, munazinyetu Russell yipo ga kweme sihonena saJesus sokuza morugendo rokukazuvhisa. (Ruk. 4:43) Morugendo oro yipo ga tulisire po ngendeseso zokugava Siuyungwa sanavenye. Pokudivisa rugendo oro, Ruhungu kwa tente asi Russell “nga gava yiuyungwa yanavenye ‘kuhamena uhompa waKarunga.’” Mo-1911, apa va tulisire po nombungakriste moyirongo yoyinzi, ngava va korangeda va tume vauyungi ava va diva kuuyunga konomukunda mokukagava yiuyungwa ntazimwe yokuhamena mpanguro ntani sizoweseso. Apa ngasi pu siuyungwa, ngava divisa edina lyomuuyungi nosiparatjangwa sosiuyungwa sosivike sokukwama ko.

9. Ngapi yiuyungwa yanavenye va yi rundurura mwa za nomvhura, ntani ngapi no kwatesa ko epongo olyo?

⁹ Mo-1945, Ruhungu kwa divisire ngendeseso zokugava yiuyungwa yanavenye uzuni mudima omu mwa hamenene yiuyungwa ntantatu yoBibeli eyi ya zogerere kuhamena “maudigu goposiruwo sina.” Monomvhura dina, vauyungi kapi ngava gava tupu yiuyungwa eyi ngava gwana komukareli gokulimburukwa nye hena eyi ngava wapaike vene. Nye mo-1981, vauyungi kwa va tanterere va gave yiuyungwa eyi ngava tumu konombungakriste.b Moyiuyungwa yimwe kwa hamenene mo nzogera novapurakeni ndi malikido. Nye mo-1990, ngendeseso ozo tazi ya haga. Nare yiuyungwa yanavenye ngava yi gava monominute 45, nye mwaMurongagona 2008 tava yi gurumwisa konominute 30. Nampili ngomu pwa kara marunduruko, yiuyungwa yanavenye kuna kunkondopeka epuro lyetu moNonkango daKarunga nokuturonga kuhamena Uhompa wendi. (1 Tim. 4:13, 16) Ove kuzigida ava o lirongo nawo ntani navamwe va ya purakene koyiuyungwa oyo yomulyo yomoBibeli ndi?

10-12. (a) Marunduruko musinke va tulire mElirongo lyoRuhungu? (b) Mapuro musinke no lipura?

¹⁰ Elirongo lyoRuhungu. Mo-1922, ava ngazi tumu mbunga zaJehova va ka gave yiuyungwa konombungakriste nokukapitisira moyirugana yokuzuvhisa kwa tamekere kukorangeda vanavazinyetu va rugane elirongo lyoRuhungu. Yipo va tamekere kurugana elirongo lyoRuhungu mosivike ndi moSondaha.

¹¹ Ruhungu 15 Pembagona 1932, kwa geve mavyukiso omu nava rugana epongo olyo. Pokukwama ngendeseso ezi ngava ruganesa koBeteli, Ruhungu kwa tente asi munazinyetugara yige na pitisira epongo olyo. Vanavazinyetugara vatatu ngava hingire komeho va lipe marufo gokuresa noparagarafu. Posiruwo sina monoparagarafu kapi ngava tura mo mapuro, yipo nye mupitisili nga pura vakalimo va pure mapuro. Konyima zoyo, nga pura hena vakalimo va limburure. Apa pwa hepere efaturo lyongandi, mupitisili ga hepere kugava efatururo “lyesupi.”

¹² Nkenye mbungakriste kwa zi pulisilire mokuhorowora sifo soRuhungu esi va here kulironga. Nye Ruhungu 15 Kudumogona 1933, kwa tente asi nombungakriste nadinye di ruganese sifo sokulifana. Mo-1937, kwa geve evyukiso asi epongo olyo va li rugane moSondaha. Marunduruko gepongo olyo aga tuna kukwama naina, kwa ga pwagesere moRuhungu 1 Sikukutu 1942. Sifo oso pomuhowo kwa divisire asi mapuro ngaga moneka konhi zankenye epenuno lyosirongwa ntani yigo va hepa kuruganesa. Ntani epongo olyo va li rugane vili zimwe. Ntani kwa va korangedere va gave malimbururo “mononkango davene” kapisi va rese monoparagarafu. Elirongo lyoRuhungu kuna kara epongo lyomulyo po omu mukareli gokulimburukwa a tu pe nondya posiruwo sado. (Mat. 24:45) Nkenye gumwe a lipure asi: ‘Ame kuliwapaikira Ruhungu nkenye sivike ndi? Ntani ame kuhetekera ko kugava malimbururo ndi?’

13, 14. Ngapi lya tamekere Elirongo lyoBibeli lyoMbunga, ntani yisinke o hafere mo mepongo olyo?

¹³ Elirongo lyoBibeli lyoMbunga. Koyiha yo-1890, azo buke Millennial Dawn vana zi pwagesa momaruha gomanzi, munazinyetu H. N. Rahn, gumwe goValirongi woBibeli ogu ga tungire momukunda gwaBaltimore, Maryland, moAmerika, kwa geve egano asi va tulise po “Tumbunga toDawn” mokulironga buke ozo. Pomuhowo, epongo kwa hetekere kuliruganena momambo. Apa va ya sikire mwaSitarara 1895, epongo olyo kuna kulirugana monomukunda dononzi domoAmerika. Ruhungu romokwedi oko kwa korangedere Valirongi woBibeli navenye va rugane epongo olyo. Kwa geve evyukiso asi ogu na li pitisira ga hepa kudiva kuresa nawa. Age nga resa sena ano konyima ta ndindire vapurakeni va kumburure ko. Konyima zokumana kuresa paragarafu nokuzizogera, ta tara matjangwa aga va tura mo nokugaresa. Kehagero lyegaununo, nkenye mukalimo nga gava ekamo lyosirongwa.

¹⁴ Edina lyepongo eli kwa li rundwilire yikando yongandi. Ngava li tumbura asi Elirongo lyoBibeli lyoVabereya, morwa awo ngava konakona Matjangwa ngwendi Vabereya womosiruwo sovapositoli. (Yirug. 17:11) Konyima tava ya li rundurura asi Elirongo lyoBuke lyoMbunga. Ngesi kuna kulitumbura asi Elirongo lyoBibeli lyoMbunga, ano mbungakriste nazinye kuyaponga moSinyanga soUhompa nye kapisi komambo. Mwa za nomvhura kwa ruganesa nobuke nonombapira noyirongwa yomoRuhungu melirongo olyo. Kutundilira pwanare, navenye ngava zi kepongo olyo ngava va korangeda va lihameke mo. Epongo olyo kwa tu vatera tu kare nediwo lyenene lyoBibeli. Ove kuliwapaikira nkenye apa yipo o ka lihameke mo mepongo olyo ndi?

15. Morwasinke va zi wapaikira Sikora zoUkareli?

¹⁵ Sikora zoUkareli. Munazinyetu Carey Barber ogu nga rugana komberewa zonene zomutayi moBrooklyn, New York, kwa tente asi: “MoMandaha ngurova, 16 Murongankuru 1942, vanavazinyetugara navenye womoBeteli zaBrooklyn kwa va pulire va ka litjangese koSikora zoUkareli.” Munazinyetu Barber, konyima kwa ya kere gomoMbungagendesi, age kwa fatwilire sikora ozo asi “kuna kara ngendeseso zongwa omu Jehova ana kuruganena novantu vendi.” Sikora ozo kwa tamekere mo-1943, ano kwa vaterere vanavazinyetugara va dive kuronga nokuzuvhisa ntani kabuke Course in Theocratic Ministry kwa ka gaverere konombungakriste uzuni mudima. Ruhungu 1 Pembagona 1943, kwa tente asi Sikora zoUkareli kwa zi wapaikira mokuvatera vantu vaKarunga “va kare vazuvhisi wovawa wombudi zoUhompa.”—2 Tim. 2:15.

16, 17. Sikora zoUkareli kuronga tupu muntu udivi ndi? Faturura.

¹⁶ Pomuhowo wovanzi kwa kere nowoma kugava siuyungwa komeho zombunga. Clayton Woodworth, ogu oguhwe va ka kere modorongo naRutherford ntani navamwe mo-1918, kwa simwitilire omu ga lizuvhire sikando sokuhova apa ga ka lihamekere mosikora mo-1943. Age kwa tente asi: “Ayo kwa digoperere nge kugava yiuyungwa, kwa kere ngwendi eraka lyange kuna li manga, mokana kange mwanywe ntani ezwi lyange kapi ngali zuvhika nawa.” Konyima Clayton ga ya kere muuyungi gomuwa ntani ngava mu pe yiuyungwa yoyinzi. Sikora kapi tupu za mu rongere udivi nye hena elinunupiko nokuhuguvara mwaJehova. Age kwa tente hena asi: “Ame na dimbwilire asi muuyungi kapisi mulyo nye nsene a liwapaikira nawa siuyungwa nokuhuguvara mwaJehova, vapurakeni ngava hafera siuyungwa sendi.”

¹⁷ Mo-1959, vanavazinyetukadi nawo kwa va pulire va ka litjangese koSikora zoUkareli. Munazinyetukadi Edna Bauer nage yipo ga kere posigongi apa va geve madiviso ogo, age kwa tente asi: “Vanavazinyetukadi kwa hefe unene, morwa nawo kwa va pere mpito zokulihameka mo.” O kare asi mugara ndi mukadi, nove kulihameka mo moSikora zoUkareli yipo a ku ronge Jehova ndi?—Resa Jesaya 54:13.

18, 19. (a) Ngapi ava li rugana Epongo lyoYirugana? (b) Morwasinke atu dimbire komapongo getu? (Tara kakende “Kudimba kuhamena usili.”)

¹⁸ Epongo lyoYirugana. Kutamekera mo-1919, ngava rugana mapongo goyirugana yokuzuvhisa. Posiruwo sina kapisi navenye womombungakriste ngava zi komapongo ogo, nye vaava tupu ngava hanesa yimbapiratjangwa. Mo-1923, Epongo lyoYirugana ngava li rugana rumwe mokwedi, omu navenye womombungakriste ngava hamene mo. Apa za sikire 1928, nombungakriste kwa di korangedere di rugane Epongo lyoYirugana nkenye sivike. Ano mo-1935, sirongwa soRuhungu kwa korangedere nombungakriste di ruganese mEpongo lyoYirugana nombudi domosimbapira ngava tumbura asi Director (konyima asi Informant ano ngesi Yirugana yetu yoUhompa). Epongo eli kwa ya kara ruha rwelikwamo lyomonombungakriste.

¹⁹ Epongo lyoYirugana kuna kulirugana ngwendi sihonena esi ga tulire po Kristusa, sokutupa mavyukiso omu natu zuvhisa. (Mat. 10:5-13) Nsene ove kugwana simbapira soYirugana yetu yoUhompa, ove kuresa nokutura pasirugana magano gamo moyirugana yokuzuvhisa ndi?

Epongo lyomulyo po momvhura

20-22. (a) Morwasinke atu diworokere nomfa daJesus? (b) Mauwa musinke o gwanene mo apa o kara poMurarero nkenye mvhura?

²⁰ Jesus kwa tanterere vasikuli vendi va diworoke nomfa dendi dogoro ewizo lyendi. Ngwendi sipito soPaska, Murarero gwaHompa kugurugana rumwe momvhura. (1 Kol. 11:23-26) Mamiliyona govantu kuwiza kepongo olyo nkenye mvhura. Alyo kudiworokesa vagwavekwa situmbukira esi va kara naso sokukapinga Uhompa. (Rom. 8:17) Ano nonzwi dapeke kuditumangeda di likide efumadeko lyenene noulimburukwi kwaHompa goUhompa waKarunga.—Joh. 10:16.

²¹ Munazinyetu Russell novakwaawo va dimbwilire mulyo gokurugana Murarero gwaHompa ntani va divire asi va hepa kugurugana rumwe momvhura. Ruhungu rwaKudumogona 1880 kwa tente asi: “Nomvhura dononzi sinzi setu moPittsburgh . . . kwa diworoka Paska [Murarero] ntani ose kulya komboroto nokunwa vhinyu eyi ya fanekesa rutu nohonde zaHompa gwetu.” Posiruwo sina, yigongi ngava yi rugana kumwe noMurarero. Mo-1889 kwa kere sikando sokuhova kudidilika sivaro sovakalimo ava va ka sikire ko-225 ano vagwani ekuho 22.

²² Naina, kapi atu rugana Murarero gwaHompa kumwe nosigongi, nye ose kuzigida womomukunda gwetu va ya ponge nose moSinyanga soUhompa ndi kevango lyapeke. Mo-2013, vantu wokupitakana pomamiliyona 19 kwa ya pongere poMurarero gwaHompa. Kapi tupu twa kara nositumbukira sokukara poMurarero gwaHompa nye hena sokukorangeda wopeke va ya ponge nose posilika esi sokupongoka. Ove kulitura mo nkenye mvhura mokuzigida wovanzi va wize koMurarero ndi?

Eyi azi horora nkareso zetu

23. Ngapi o lizuvhu kuhamena mapongo getu?

²³ Vantu vaJehova wovalimburukwi kapi ava tara evyukiso lyokuponga kumwe asi mudigo. (Heb. 10:24, 25; 1 Joh. 5:3) Pasihonena, hompa Ndafita, kwa here kuza konzugo zaJehova zoukareli. (Epis. 27:4) Age kwa haferere kuponga kumwe nava va hara Karunga. (Epis. 35:18) Apa Jesus ga kere munona, ga kere neharo lyenene lyokuza konzugo zoGuhwe zoukareli.—Ruk. 2:41-49.

24. Apa atu zi komapongo, nompito musinke atu gwana?

²⁴ Apa atu zi komapongo, ose kulikida eharo lyetu kwaJehova nokukorangeda vapuli vakwetetu. Komapongo getu nokoyigongi yiko ava tu rongo omu natu vhura kuwapera kukara moUhompa waKarunga. Ako hena kutupa udivi nononkondo edi twa hepa tu lididimikire yipo tu sikise mo sirugana soUhompa sokutulisa po varongwa vaHompa Jesus Kristusa. (Resa Mateusa 28:19, 20.) Eharo lyetu lyenene lyokuponga kumwe kulikida omu atu tara Uhompa waKarunga. Ngano tu twikire kutara mapongo getu asi mulyo.