Kara pepi nombunga zaJehova

MURONGWA Jakopo kwa tjenge asi: “Hedeni Karunga pepi, nage a mu hede pepi.” (Jak. 4:8) Yosili, Jehova kapi ga kara ure nose asi a dire kuzuvha nkugo zetu, nampili ngomu twa dira kusikilira mo. (Yirug. 17:27) Ngapi natu hedera pepi naJehova? Pokutulisa po elikwatakano lyewa naJehova, eyi kwa hamena mo kukanderera nkenye apa. (Epis. 39:12) Ntani hena kutulisa po ukaume naKarunga kupitira mokulironga Nonkango dendi, Bibeli nkenye ezuva. Monkedi ezi, ose ngatu diva Jehova Karunga nositambo sendi ntani neyi ana tu harere tu rugane. (2 Tim. 3:16, 17) Twa hepa nye kulironga kumuhara nokukara netjiroKarunga pokudira kumuguvisa.—Epis. 25:14.

² Kupitira mwaMunwendi, Jesus, yimo mwelike natu vhura kuhedera Jehova pepi. (Joh. 17:3; Rom. 5:10) Jesus gelike yige ga diva unene Jehova kupitakana nkenye muntu. Age kwa kere nelikwatakano lyenene noGuhwe yipo ga vhulire kuuyunga asi: “Nagumwe si ga diva Muna, ntudi Guhwe no. Hena nagumwe si ga diva Guhwe, ntudi Muna no, nogu ga yi harera kuyihorwera Muna.” (Ruk. 10:22) Apa atu lirongo moMavangeli kuhamena omu Jesus a gazara nomu a lizuvhu, ose kudiva omu Jehova a gazara nomu a lizuvhu. Ediwo lyangoso kutuvatera tu hedere Karunga pepi.

³ Kupitira mepitisiro lyaMunwaKarunga nokukara pepi nombunga zaJehova, ayo kutuvatera tu tulise po ukaume nage nokulironga omu natu rugana eyi ana tu harere Karunga. Ngomu va yi pumba mwaMateusa 24:45-47, Hekuru ndi Jesus Kristusa, kwa tura po “mukareli gokulimburukwa gonondunge,” a paape vantu vendi “nondya posiruwo sado.” Naina, mukareli gokulimburukwa kutupa nondya dononzi dopampepo. Kupitira mongendeseso ezi, Jehova kutupukurura tu rese Nonkango dendi nkenye ezuva nokuza komapongo ntani nokuzuvhisa “mbudi zongwa” zoUhompa. (Mat. 24:14; 28:19, 20; Jos. 1:8; Epis. 1:1-3) Kapi tuna hara kutara mukareli gokulimburukwa nomutaro gosintu. Twa hepa kukondja mokukara pepi nombunga zaJehova ntani nokutambura mavyukiso gazo. Eyi ngayi tu vatera tu hedere Jehova Karunga pepi ntani age nga tu nkondopeka nokutupopera nampili momaudigu.

EYI GANA VHUKIRE MAUDIGU

⁴ Nampo ove kwa kara mousili nomvhura dononzi. Nsene yimo, ove wa yi diva eyi ayi tanta kulididimikira maheteko aga aga heteke ulimburukwi wetu. Yi kare asi ntani tupu ko divire Jehova nokulipakerera novantu vendi, ove wa yi diva asi Satana Muzonaguli kurwanesa nkenye ogu a limburukwa koupangeli waJehova. (2 Tim. 3:12) Yi kare asi kuna kulididimikira maudigu gomanene ndi gomanunu, kapisi o kare nowoma ndi o dompe mutjima. Jehova ga tumbwidira asi nga ku kwafa nokukuzowora ntani nga ku pa nkata zomwenyo gwanarunye.—Heb. 13:5, 6; Ehor. 2:10.

⁵ Natuvenye nampo ngatu pita momaudigu momazuva aga gana hupu ko gouzuni waSatana. Kutunda tupu apa va tulisa po Uhompa waKarunga momvhura 1914, Satana kapi va mu pulisira mo meguru omu ga kara Jehova. Age kwa mu zugumina pevhu, apa ana kara novaengeli vendi wovadona. Eyi gana vhukire maudigu pevhu, morwa Satana ana handuka ntani kuna kulikida asi ose kuna kuparuka pomazuva gopouhura gomupangeli gomudona ogu ana kupangera vantu.—Ehor. 12:1-12.

⁶ Satana ga yi diva asi siruwo sendi sina hupu ko sisupi, yiyo ana handukire unene. Kumwe novaengeli vendi, age ana litura mo unene mokuhagekesa po sirugana sokuzuvhisa Uhompa ntani nokuzonagura po uumwe wovakareli vaJehova. Eyi kutuninkisa tu rwe yita yopampepo eyi va singonona asi “kapisi vantu atu rwanesa, nani nye mapangero gonompepo atu rwanesa novanankondo novapangeli wouzuni ou womundema, nonompepo donondona dekeguru-guru.” Nsene tuna hara kuhama koruha rwaJehova, kapisi tu hageke kurwa nye twa hepa kudwara yirwiso yopampepo. Twa hepa kufunda ndi ‘kukondjesa makoto goumbudi’ goMuzonaguli. (Efe. 6:10-17) Eyi kuhepa edidimiko.

TUNGA PO EDIDIMIKO

⁷ Edidimiko kutanta asi “evhuliko lyokudira kulisigilira ga tu dininine po maudigu ndi kudira kuligava.” MoBibeli, edidimiko kwa tamba kosikara sokurugana eyi ya hungama nampili momaudigu nomomarwaneso nomomahepeko ndi mwankenye eyi nayi tu ninkisa tu dire kulimburukwa Karunga. Makura twa hepa kutunga po sikara sedidimiko. Eyi kuhepa siruwo. Moomu tuna kupameka epuro lyetu, yimo evhuliko lyetu lyokulididimikira ngali nkondopara. Moomu tuna kulididimikira maheteko gomanunu gokuheteka epuro lyetu apa atu ya kara Vakriste, yimo ngatu nkondopara nokulididimikira maudigu gomanene aga gana kara komeho. (Ruk. 16:10) Kapi tatu vhuru kundindira maudigu gomanene ntani ngatu pameka epuro lyetu. Nye twa hepa kupameka epuro lyetu komeho tu ka ligwanekere neheteko. Pokulikida asi edidimiko kulitunga po kumwe noyikara yimwe hena, mupositoli Peturusa kwa tjenge asi: “Eyi yiyo po nye unene nayi mu kondjesesa, mu gwederere ko kepuro lyeni uwa, ano kouwa mu gwederere ko ediwo, kediwo gwederereni ko malipangero, komalipangero gwederereni ko edidimiko, kedidimiko lyeni gwederereni ko etjirokarunga, ketjirokarunga lyeni gwederereni ko eharo lyosiumumbya, keharo lyosiumumbya gwederereni ko eharo lyanavenye.”—2 Pet. 1:5-7; 1 Tim. 6:11.

⁸ Mulyo gokutunga po edidimiko kugugwana mombilive ezi ga tjenge Jakopo asi: “Vakwetu, omu hafe tupu unene, nsene taga mu gwana maheteko gomanzi, yeeyi mwa diva asi epuro lyeni nsene va li heteka, kureta edidimiko. Ano edidimiko li kare nosirugana sina sikilire mo, mu sikilire mo mwa hana kavadi, one mwa ha puka hena.” (Jak. 1:2-4) Jakopo kwa uyungire asi Vakriste va hepa kutambura mahepeko nokugahafera morwa ago kureta edidimiko. Nove yimo o yi tara ngoso ndi? Jakopo kwa yi likida asi edidimiko li kare nosirugana sokusikisa mo yikara yoSikriste ntani yipo Karunga a tu tambure. Nye edidimiko lyetu kulitunga po nkenye ezuva ngomu tuna kuligwanekera nomaudigu. Edidimiko kureta yikara yimwe yoyiwa eyi twa hepa.

⁹ Nsene edidimiko lyetu li hafesa Jehova, ngayi mu tumangeda a tu pe mwenyo gwanarunye. Jakopo kwa twikilire ko pokutanta asi: “Muntu gerago googu a didimike momaudigu, yeeyi nsene ana piti mekona-kono, nga gwana nkata zomwenyo ezi ga tumbwidira HOMPA ava va mu hara.” (Jak. 1:12) Yimo, mwenyo gwanarunye kutunda mokulididimika. Pwa hana edidimiko, kapi tatu vhuru kukara mousili. Nsene tu gwira momakondjeso gouzuni ou, ngayi tu ninkisa tu tengure keparu lyetu lyanare. Pwa hana edidimiko, kapi ngatu twikira kukara nompepo zaJehova ntani kapi ngatu yima yiyimwa yopampepo meparu.

¹⁰ Nsene tuna hara kutwikira kudidimika momaudigu, twa hepa kutunga po nkareso zouhunga komahepeko aga ava ligwanekere nago Vakriste. Diworoka eyi ga tjenge Jakopo asi: ‘Omu hafe unene.’ Ayo kapisi ureru, morwa pamwe kuvhura va tu toone ndi va tu korese pamagazaro. Nye diworoka asi kwa hamena mo eparu lyetu lyokomeho. Eyi va ligwanekere nayo vapositoli kutuvatera tu mone omu natu hafa mosiruwo somahepeko. Sihorokwa esi kusigwana mobuke zoYirugana, aso kutanta asi: “Vapositoli makura tava va zigida va hwilire, tava va silike asi nokuudisa si hena medina lyaJesus, makura tava va sigi va ze. Awo makura tava tundu po posigongi nehafo lyeyi asi Karunga kwa va tere asi va fira kuvahepekera edina lyaJesus.” (Yirug. 5:40, 41) Vapositoli kwa kwete egano asi mahepeko gawo kwa kere umbangi asi kuna kulimburukwa mpangera zaJesus ntani asi Jehova ana va hafere. Konyima zonomvhura dongandi, apa ga tjenge mbilive zendi zokuhova, Peturusa kwa tumbwire mulyo gwehepeko lyangoso mokonda zouhungami.—1 Pet. 4:12-16.

¹¹ Sihorokwa simwe kwa hamenene mo Paurusa naSirasa. Apa va zuvhisilire moFilipi, awo kwa va kwete nokuvapangura asi kuna kureta ndjorongani mositata ntani asi kuna kuronga nompo edi da dira kuliza noVajuda. Ngoyitundwamo, awo kwa va toonene nokuvatura modorongo. Bibeli kutanta asi apa va kere modorongo, “pokatji komasiku oPaurusa naSirasa tava tameke kukanderera oku tava dimbi nonsumo dehamberero, vanadorongo tava va purakene.” (Yirug. 16:16-25) Paurusa naSirasa kwa tere mahepeko aga va pitire medina lyaKristusa asi kuna kugava umbangi kwava ngava purakena kombudi zongwa, nye kapisi morwa kulimburukwa tupu kwaKarunga nokovantu. Kwa hamenene mo eparu lyava wopeke. Masiku googo, munomeni godorongo nepata lyendi kwa purakenene nokukara varongwa. (Yirug. 16:26-34) Paurusa naSirasa kwa huguvarere mwaJehova nomononkondo dendi ntani eharo lyendi lyokuvavatera va lididimikire momahepeko. Age kapi ga va sigililire.

¹² Naina, Jehova kwa tu pa nayinye eyi twa hepa mokutuvatera moyiruwo eyi yomaudigu. Age kwa hara asi tu lididimikire. Age ga tu pa Nonkango dendi yipo tu dive kuhamena sitambo sendi. Eyi kunkondopeka epuro lyetu. Ose twa gwana mpito zokulipakerera novapuli vakwetu ntani nokurugana sirugana sokupongoka. Ose hena twa kara nositumbukira sokunkondopeka elikwatakano lyetu naJehova kupitira mekanderero. Age kupurakena komakanderero getu gehamberero nokomalikwambero getu yipo tu kare tuna kuhuka kosipara sendi. (Fil. 4:13) Ntani tu dire kudivara nonkondo edi atu gwana mokugazadara ko kehuguvaro lyoyininke eyi ya tu kara komeho.—Mat. 24:13; Heb. 6:18; Ehor. 21:1-4.

KULIDIDIMIKIRA MAUDIGU GOKULISIGA-SIGA

¹³ Maudigu aga tuna kuligwanekera nago ga lifana naga ngava ligwanekere nago varongwa vaJesus Kristusa wokuhova. Momazuva getu, Nombangi daJehova kudiswaura nokuditoona nonkore dado. Ngwendi momazuva govapositoli, sinzi somahepeko kuna kutundilira kovampitisili womaukarelikarunga ava ava rongo marongo goyimpempa, ano Nonkango daKarunga kuna kutura marongo gawo poruzera. (Yirug. 17:5-9, 13) Poyiruwo yimwe, vantu vaJehova kugwana epopero apa ava zi konompanguro edi ava pitisire vanapolitika vemepangero. (Yirug. 22:25; 25:11) Nye hena, vapangeli pamwe kutulisa po veta zokusilika sirugana setu, mokuhetekera ko kuhagekesa po sirugana sokuzuvhisa. (Epis. 2:1-3) Moukaro wangoso, ose kukwama sihonena sovapositoli wovalimburukwi, ava va tente asi: “Ose twa hepa po kulimburukwa unene Karunga, kupitakana vantu.”—Yirug. 5:29.

¹⁴ Moomu mpepo zelitondororo zina vhuka apa pevhu, yimo vana kukondjesa vazuvhisi wombudi zongwa va hageke sirugana sawo esi ga va pa Karunga. Vakareli navenye vaKarunga kukwata egano mulyo gwerondoro eli lya kara mEhororo 14:9-12 kuhamena ‘kutongamena sikasama ndi efano lyaso.’ Ose twa dimburura mulyo gononkango daJohanesa edi asi: “Moyininke yangesi vapongoki kuhepa nye awo kudidimika, vantu ava va kwata mawoko gavali yipango yaKarunga nepuro lyokupura Jesus.”

¹⁵ Maheteko aga ga wiza po morwa yita nomarwaneso nomahepeko ntani nokusilika sirugana setu kuvhura yi ku ninkise o dire kuzuvhisa moyitarameho yovantu. Kuvhura ngo dire kuponga kumwe nombungakriste. Kuvhura va hagekese po kuruganena kumwe noBeteli. Kuvhura va donganese madinguro govatareli wonombunga. Kuvhura o dire kugwana yimbapiratjangwa. Nsene yi horoka oyo, yisinke wa hepa kurugana?

¹⁶ Wa hepa kurugana nkenye eyi nayi vhura kukutompoka moukaro owo. Kuvhura yi ku tompoke kurugana elirongo lyanyamoge lyoBibeli. Nombungagona kuvhura kuruganena mapongo momambo. Momapongo gangoso kuvhura kuruganesa yimbapiratjangwa yanare ntani Bibeli. Wa ha kara nosinka ndi yi ku tukukise. Mbungagendesi ngazi vhura kutulisa po nkedi zimwe omu ngava gwanekera kumwe novanavazinyetu ava va kara noyitumbukira.

¹⁷ Nampili ngayi horoke asi nyovelike ono ka kara, diworoka asi Jehova naJesus Kristusa kumwe nove vana kara. Ehuguvaro lyoge kuvhura ngali nkondopare. Jehova nga zuvha makanderero goge ntani nga ku nkondopeka nompepo zendi zokupongoka. Papara mavyukiso kwendi. Diworoka asi ove mukareli gwaJehova ntani murongwa gwaJesus Kristusa. Nampili ngoso, ruganesa nawa mpito zokuzuvhisa. Jehova nga ku tungika, ano wopeke nawo ngava lipakerera nove moukareli wousili.—Yirug. 4:13-31; 5:27-42; Fil. 1:27-30; 4:6, 7; 2 Tim. 4:16-18.

¹⁸ Ngwendi vapositoli ntani navamwe, nsene ove kuna kuligwanekera nomatjiliso gokukutokwera konomfa, huguvara “Karunga ogu a pindura novafe vaava.” (2 Kol. 1:8-10) Epuro lyoge metumbwidiro lyokuhamena evhumbuko ngali ku vatera o lididimikire nampili kuna kupita momarwaneso gomanene. (Ruk. 21:19) Jesus Kristusa kwa tura po sihonena sosiwa, age ga yi divire asi kulimburukwa kwendi momaheteko ngayi nkondopeka wopeke va lididimikire. Mokulifana, nsene o limburukwa nove ngo nkondopeka vapuli vakweni.—Joh. 16:33; Heb. 12:2, 3; 1 Pet. 2:21.

¹⁹ Kugusa ko mahepeko nomarwaneso, ove kuvhura kulididimikira maukaro gamwe goudigu. Pasihonena, vamwe kwa dompa mutjima morwa malitondororo gomomukunda gwawo. Vamwe kuhepa kulididimikira uvera woparutu ndi wopamalizuvho ndi maupirankondo morwa kudira kusikilira mo. Mokulifana, mupositoli Paurusa ga hepere kulididimikira udigu umwe ou wa ninkisire sirugana sendi si mu digopere. (2 Kol. 12:7) Ntani hena, Epafuraditusa gomoFilipi, kwa ‘guvire apa va mu zuvhire asi ta vere.’ (Fil. 2:25-27) Kudira kusikilira mo kwetu ntani nomaudigu aga ava retesa po wopeke pamwe kutuninkisa yi tu digopere kulididimikira. Kuvhura yi kare asi nampo kudira kulizuvha novapuli vakweni ndi nagumwe gemepata. Nye ava ava kwama epukururo lyomoNonkango daJehova kuvhura va lididimikire yilimbikiso yangoso ndi va yi funde po.—Hes. 2:3-5; 1 Kol. 9:27; 13:8; Koros. 3:12-14; 1 Pet. 4:8.

TOKOMENA KUKARA NGOROORO MULIMBURUKWI

²⁰ Twa hepa kulimburukwa kogu ga hororowora Jehova a kare Mutwe gombungakriste, Jesus Kristusa. (Koros. 2:18, 19) Twa hepa kuruganena kumwe ‘nomukareli gokulimburukwa gonondunge’ ntani nava va horowora va kare vapitisili. (Heb. 13:7, 17) Nsene tu kwama mawapaiko gombunga zaJehova ntani nokuruganena kumwe nava ava pitisire, ose ngoso kuna kurugana mpango zaJehova. Twa hepa kuruganesa mpito zokukanderera. Diworoka asi dorongo ndi kusilika sirugana setu kapi tayi tu ninkisa tu dire kuuyunga naGuhyetu gemeguru ndi yi donganese uumwe ou twa kara nawo novapuli vakwetetu.

²¹ Kumwe netokomeno nedidimiko, tu ruganeni unene mokusikisa mo sirugana sokuzuvhisa nokutwikira sirugana esi Jesus Kristusa ga pa vasikuli vendi esi asi: “Yipo nye nomu zira konomuhoko nadinye, mu ka di ninke di kare varongwa vange, mu ka di kuhwire medina lyaGuhwe neli lyoMuna neli lyoMpepo zoKupongoka. Ka di rongeni, di ka limburukwire nayinye eyi na mu rekera.” (Mat. 28:19, 20) Ngwendi Jesus, tu twikireni kulididimikira. Ngano tu diworoke nkenye apa ehuguvaro lyoUhompa neli lyomwenyo gwanarunye ogu tuna kundindira. (Heb. 12:2) Ngovarongwa vaKristusa ava va gwana ekuho, ose twa kara sositumbukira sokulihameka mesikiliromo lyouporofete waJesus kuhamena ‘uhura wouzuni.’ Age kwa tente asi: “Nye Mbudi zoNgwa ezi zoUntungi waKarunga tanko ngava zi divisa mwa za uzuni mudima, zi kare umbangi wonomuhoko nadinye, ntani nye ngaku kwama uhura.” (Mat. 24:3, 14) Nsene tu rugana sirugana oso nomutjima nagunye, ose ngatu kara noruhafo mokukagwana mwenyo gwanarunye mouzuni woupe waJehova.