Uumwe wovanavazinyetu uzuni mudima

NOMVHURA 1 500 da ka pita, Jehova Karunga kwa ruganenene kumwe nomuhoko gwaIsraeli ngovantu vedina lyendi. Yipo Jehova Karunga ‘ga tameka kupaparera edina lyendi mbunga movapagani.’ (Yirug. 15:14) Vantu ava va simba edina lyendi ngano va hepa kukara nombangi dendi nokukara mouumwe yi kare asi kupi va tunga. Eyi ayi ninkisa vantu ava ava zigidisa kedina lyaKarunga va kare mouumwe kuna kara sirugana esi ga geve Jesus kovasikuli vendi asi: ‘Yipo nye nomu zira konomuhoko nadinye, mu ka di ninke di kare varongwa vange, mu ka di kuhwire medina lyaGuhwe neli lyoMuna neli lyompepo zokupongoka. Ka di rongeni, di ka limburukwire nayinye eyi na mu rekera. Tareni, ame neni ngani kara dogoro nokouhura wouzuni.’—Mat. 28:19, 20.

² Nsene o ligava kwaJehova nokugwana ekuho, ove ngoso to kara murongwa gwaJesus Kristusa. Ove kuyakara mouumwe novanavazinyetu uzuni mudima, ava ava dili kupulisira rudi ndi mpo ndi yikweparu yi va gaunune. (Epis. 133:1) Ngoyitundwamo, ove ngo hara Vakriste vakweni mombungakriste nokuvafumadeka. Nampo vamwe woVakriste owo mwa lisiga korudi ndi konompo ndi kelirongo ntani nampo kapi mwa likwatakanene morwa malisigo ogo. Ngesi eharo lyeni lyosiumbya lya nkondopara unene kupitakana tupu kukara kumwe moukarelikarunga ndi kulikwatakana kumwe ndi kukara epata limwe.—Mar. 10:29, 30; Koros. 3:14; 1 Pet. 1:22.

KURUNDURURA MAGAZARO

³ Nsene vamwe kuna kuvadigopera kufunda po malitondororo gorudi ndi goupolitika ndi gonompo nagamwe hena ngoso, va hepa kuteda ko koVakriste wokuhova woVajuda ava va fundire po malitondororo gonomuhoko. Apa Peturusa va mu pangerere a ze kembo lyaKoroneliusa, mupitisili govakwayita woVaroma, Jehova kwa wapaikilire Peturusa kosirugana oso sosipe.—Yirugana, egau. 10.

⁴ Memoneko, Peturusa kwa mu tanterere a dipage yikorama yongandi a lye, eyi ngava tara Vajuda asi ya nyata. Apa Peturusa ga nyokere, ezwi tali tundu meguru li mu tantere asi: “Eyi ga kuhura Karunga, ove nokuyininka si asi kapi ya pongoka.” (Yirug. 10:15) Mokutambura epukururo eli lyaKarunga, Peturusa ga hepere kurundurura magazaro gendi kositumbukira esi ga mu pere Karunga, kutanta asi sokukadingura mugara gomupagani. Mokulimburukwa mavyukiso gaJehova, Peturusa kwa divisire pepongo olyo asi: “None mwa yi diva tupu asi, kapi va yi pulisira asi Mujuda a ligendere nomupagani ndi asi a ze kwendi. Nye Karunga ana yi likida nge asi na ha tumbura muntu asi kapi ga pongoka ndi asi ga nyata. Ano eyi vana ka hara nge, makura yiyo nina wiza, kapi na nyoka.” (Yirug. 10:28, 29) Konyima zoyo, Peturusa ga mwene omu Jehova ga tambwire Koroneliusa nava vembo lyendi.

⁵ Sauru gomoTaruso, Mufalisayi ogu ga lirongere, ga hepere kulinunupika nokulipakerera novantu ava nga hepeke nare. Ntani ga hepere kutambura mavyukiso gawo. (Yirug. 4:13; Gar. 1:13-20; Fil. 3:4-11) Gazara tupu marunduruko aga va tulire po vantu ava apa va tambwire mbudi zongwa nokuyakara varongwa vaJesus Kristusa: Seregiusi Paurusa, naDiyonisiusi, naDamalisi, naFiremoni, naOnesimusa ntani navamwe hena.—Yirug. 13:6-12; 17:22, 33, 34; Fir. 8-20.

KUKWATERERA KOUUMWE WETU UZUNI MUDIMA

⁶ Yosili, eharo lyovanavazinyetu womombungakriste lya ku vatera o hedere Jehova pepi ntani nombunga zendi. Ove wa limonena eharo eli ali dimbwilisa varongwa vaJesus Kristusa wousili, ngomu ga yi tente asi: “Sipango sosipe nina kumupa asi, omu lihara-hare moomu na mu hara ame, yimo nomu lihara-hara none. Nsene mu lihara-hara, yipo ngava divira vantu asi one sili varongwa vange.” (Joh. 13:34, 35) Ntani ove ngo pandura unene Jehova nombunga zendi apa no dimburura asi eharo lyovanavazinyetu womombungakriste kuna kara tupu sidimbwiliso seharo eli ava likida vanavazinyetu uzuni mudima. Ove kuna kulimonena esikiliromo lyouporofete womoBibeli kuhamena mazuva gopouhura omu vantu vana kulipongaika mokukarera Jehova mombili ntani mouumwe.—Mika 4:1-5.

⁷ Mokumona omu vantu vana kuligaunuka naina, kwato ogu ga yi gazara rumwe asi vantu wokutundilira “momarudi nagenye nomomakoro nagenye nomonomuhoko nadinye nomomaraka nagenye” kuvhura va kare mouumwe. (Ehor. 7:9) Gazara tupu malisigo ga kara povantu ava va lironga ntani nava va kwaterera konompo dawo. Gazara tupu omu maukarelikarunga aga gaununa vantu worudi rumwe nomuhoko gumwe. Ngomu malitondororo gana vhuka unene, upolitika kuna kugaununa vantu kupitakana pwanare. Ntani nsene o gazara malisigo goyikweparu nomalisigo gamwe hena, no yi dimburura asi Karunga Munankondo gelike gokuretesa po uumwe neharo nombili ezi va kara nazo vantu wokutundilira momarudi nagenye nomonomuhoko nadinye nomomaraka nagenye.—Sak. 4:6.

⁸ Ntani apa o ligava nokugwana ekuho ngagumwe goNombangi daJehova, ove kuyakara ruha rouumwe wangoso. Mokugwanena mo uwa, wa hepa kurugana ko yuma yipo o kwaterere kouumwe owo. Mokuyisikisa mo eyi twa hepa kukwama nonkango domupositoli Paurusa domoVagarata 6:10 edi asi: “Ano paapa tuna kareni nosiruwo, atu ruganeneni navenye uwa, unene po vapuli vakwetetu.” Ose hena kukwama epukururo eli: “Walye omu rugana yuma mokulitara pwaamweni ndi mokupapara efumano lyomawoko-woko. Nye omu linunupike, tomu tara vakweneni asi va mu pita mekuto. Walye omu lipakere mbili nyamweni nyonelike, nye omu pakere hena novakweneni mbili.” (Fil. 2:3, 4) Moomu tuna kulironga kutara vanavazinyetu ngamoomu a va tara Jehova nye kapisi tu va tare pasintu, yimo ngatu twikira kukara noruhafo ntani nelikwatakano lyewa nawo.—Efe. 4:23, 24.

KULIFIRA-FIRA SINKA

⁹ Ngamoomu ga yi faturura mupositoli Paurusa, mombungakriste ga pire mo malitondororo, nye navenye va lifire sinka. (1 Kol. 12:14-26) Sinano kuvhura kutugaununa novanavazinyetu ava va kara koyirongo yokoure, nye kapi yina kutanta asi kapi atu fire sinka yihepwa yawo. Natuvenye kuguva apa atu zuvhu asi vanavazinyetu vamwe kuna kuvahepeka. Nsene vamwe kuna kuhepa ndi kuna ligwanekere nosimpagwa ndi noyita ndi noudigu, ava wokuhupa ko kupapara nompito omu nava vhura kuvavatera panyama nopampepo.—2 Kol. 1:8-11.

¹⁰ Natuvenye twa hepa kukanderera po vanavazinyetu nkenye ezuva. Vamwe kuna kuligwanekera neheteko lyokurugana yoyidona. Ano vamwe kuna kuligwanekera noudigu ou nampo una divikwa kwanavenye. Simpe vamwe kuna kuvarwanesa vekoro lyawo ava va hana asi Nombangi ndi varugani vakwawo. (Mat. 10:35, 36; 1 Tes. 2:14) Eyi kuturetera sinka, morwa awo vanavazinyetu. (1 Pet. 5:9) Mokatji ketu kwa kara mo ava ava rugana unene mosirugana saJehova nokupitisira mokuzuvhisa ntani mombungakriste. Ntani hena, mwa kara ava ava pitisire sirugana setu mouzuni mudima. Mokuvalikida eharo nelituromo lyetu, navenye twa hepa kuvakanderera po, nampili yi kare asi kwato eyi natu vhura kuvaruganena mokuvavatera.—Efe. 1:16; 1 Tes. 1:2, 3; 5:25.

¹¹ Vantu vaJehova va hepa kuliwapaikira mokuvatera vakwawo momazuva aga gomadona gopouhura. Poyiruwo yoyimpagwa, ngwendi makankamo gevhu noruhanzo, awo kulitura mo unene nokuwapaika yihepwa yoyinzi yopanyama. Vakriste womosiruwo sovapositoli kwa tu tulira po sihonena sosiwa koyihorokwa ngeyi. Pokudiworoka epukururo lyaJesus, varongwa wokoyirongo yapeke kwa tumine mauhwi kovapuli vakwawo womoJudeya posiruwo serumbu lyenene. (Yirug. 11:27-30; 20:35) Mupositoli Paurusa kwa korangedere Vakolinte va wapaike yigava, ano nayinye kwa gendere po nawa. (2 Kol. 9:1-15) Momazuva getu, apa vanavazinyetu ava kara moukaro woudigu nokuhepa ekwafo, mbunga zaJehova noVakriste vakwawo kugenderera kugava ekwafo olyo.

RUGANA MPANGO ZAJEHOVA

¹² Vanavazinyetu mouzuni mudima kwa va wapaika va rugane mpango zaJehova. Posiruwo esi, mpango zendi kuna kara pokuzuvhisa mbudi zongwa zoUhompa evhu nalinye zi kare umbangi wonomuhoko nadinye. (Mat. 24:14) Posiruwo esi tuna kurugana sirugana esi, Jehova kuna tu harere tu kare tuna pongoka moukaro wetu naunye. (1 Pet. 1:14-16) Twa hepa kulizuvha novakwetetu nokuliruganena-ruganena uwa morwa mbudi zongwa. (Efe. 5:21) Esi kapisi siruwo sokupapara uwa wanyamwetu, nye sokutura muhowo Uhompa waKarunga meparu lyetu kupitakana pwanare. (Mat. 6:33) Pokudiworoka eyi ngomu tuna kuruganena kumwe mokonda zombudi zongwa, ayo kureta ruhafo ngesi ano komeho ngatu ka gwana mauwa ganarunye.

¹³ NgoNombangi daJehova, ose twa lisiga novantu wopeke ngovantu wokukuhuka, ava ava litura mo mokuruganena Karunga. (Tit. 2:14) Kukarera Jehova kutuninkisa tu lisige nava wopeke. Kapisi morwa kuruganena kumwe novanavazinyetu uzuni mudima nye hena ose kuuyunga eraka lyokukuhuka ntani kurugana kuliza nousili ou atu rongo. Eyi kwa yi pumbire Jehova kupitira momuporofete gwendi Sefaniya asi: “Makura ngani rundwilire vantu keraka lyokukuhuka, yipo ngava kuge navenye edina Jehova, ngava mu karere mouumwe.”—Sef. 3:9, NW.

¹⁴ Jehova kwa gendesere Sefaniya a singonone uumwe wovanavazinyetu uzuni mudima ou una kusika mo ngesi asi: “Vaisraeli ava ngava hupa po kapi ngava ruganena hena muntu udona, kapi ngava tanta yimpempa, ndi asi va heteke kukumbagera. Ngava ragopa tava wapa, va hana kutjira muntu.” (Sef. 3:13) Morwa kukwata egano usili womoNonkango daJehova nokurundurura magazaro getu ntani nokuparuka kuliza nonompango daJehova, eyi yiyo ayi tu tompokere kuruganena kumwe. Ose kusikisa mo eyi ayi moneka pasintu asi kapi tatu yi vhuru kuyisikisa mo. Yosili, ose vantu ava twa lisiga, vantu vaKarunga ava ava mu yererepeke uzuni mudima.—Mika 2:12.