Sara ta reta munona!

Abirahamu naSara kwa likwere siruwo sosire. Awo kwa sigire embo lyawo lyewa moUru nokukatunga monotenta. Nye Sara kapi ga sivanene, morwa ga huguvarere mwaJehova.

Sara kwa here kukara nomuna yipo ga tanterere Abirahamu asi: ‘Gusa mukareli gwange Hagara o kare nage nga retere nge ko muna.’ Mwaza siruwo, Hagara ta hampuruka munona gomugara ta mu ruku Isimayeli.

Apa ga kere Abirahamu nonomvhura 99, age Sara 89, yipo va ya va dingwire vagenda vatatu. Abirahamu yipo ga va pere nondya mositji. Ono diva asi wolye va kere vagenda vena? Awo kwa kere vaengeli! Awo kwa tanterere Abirahamu asi: ‘Mvhura zokukwama ko, Sara nga kara nomunona gomugara.’ Sara age kuna kupurakena motenta. Ta lizoro mwene nokutanta asi: ‘Muntu ame na kurupa ngesi kuvhura ni rete muna ndi?’

Mvhura za kweme ko, Sara yipo ga retere munona gomugara, ngwendi moomu ga yi tente muengeli. Abirahamu ta mu ruku Isaka, kutanta asi: “Ta zoro.”

Apa Isaka ga kere nonomvhura ntano, Sara ta mono Isimayeli omu ana kumurugana momudona. Sara kwa here kupopera munwendi, yipo ga tanterere Abirahamu asi a tjide Hagara naIsimayeli. Pomuhowo Abirahamu kapi ga here kuyirugana. Nye Jehova ta mu tantere asi: ‘Purakena kwaSara. Isimayeli ngani mu pakera mbili. Nye mwaIsaka yimo ngani sikisira matumbwidiro gange.’