Jehova ga lididimikilire Jona

MoNinivhe kwa kere mo vantu ava ngava rugana udona. Jehova kwa tanterere muporofete Jona a ze koNinivhe a ka rondore vantu owo va hageke kurugana udona. Nye Jona ta dukire kwapeke. Ta ka ronda mosikepa a ze koSipaniya.

Jehova ta tumu ekundungu, makura vanasikepa tava tukuka. Awo kwa kanderere kovakarunga vawo nokupura asi: ‘Morwasinke yina kuhorokera eyi?’ Jona ta va tantere asi: ‘Unzoni wange. Ame kuna duka eyi ana tantere nge Jehova ni rugane. Zugumineni nge mefuta, makura ekundungu tali litura.’ Vanasikepa kapi va here kuzuguma Jona, nye age ta va sininike. Apa va mu zuguminine mefuta, ekundungu tali litura.

Jona kwa gazarere asi ta fu. Apa ga deme mefuta, ta kanderere kwaJehova. Jehova ta tumu emumfi. Tali mini Jona, nye kapi lya mu dipagere. Mezimo lyemumfi, Jona ta kanderere asi: ‘Tani ku tumbwidire asi ngani ku limburukwa.’ Jona kwa kere mezimo mazuva gatatu makura Jehova ta pangere emumfi li mu fizire konontere.

Nampili ngomu Jehova ga parwire Jona, eyi kwa likidire asi kapi ga hepere kuza hena koNinivhe ndi? Hawe. Jehova kwa mu tanterere hena a ze koNinivhe. Ano sikando esi, Jona ga limburukwire. Makura ta zi nokukatantera vantu asi: ‘Mazuva 40 gana hupu ko, Ninivhe va zi zonagure po.’ Vaninivhe kwa purakenene, makura tava litezurura. Hompa gwaNinivhe kwa tanterere vantu asi: ‘Kanderereni kwaKarunga, mu sige udona. A dire kutuzonagura po.’ Apa Jehova ga mwene asi vantu vana sigi udona, kapi hena ga zonagwire Ninivhe.

Makura Jona ta handuka kweyi Jehova ga dilire kuzonagura po sitata. Gazara: Jehova ga lididimikilire nokufira nkenda Jona, nye Jona kapi ga fililire nkenda Vaninivhe. Age kwa hingilire momundwire gosimeno ponze zositata. Apa sa fire simeno, Jona ta handuka unene. Jehova ta mu tantere asi: ‘Ove kuna kufira nkenda simeno kupitakana Vaninivhe. Ame kuna va fire nkenda yiyo vana parukire.’ Yisinke yina kutanta eyi? Vaninivhe kwa kere nomulyo kupitakana simeno.