Mumati Jesus

Josefa naMariya kwa tungire moNasareta naJesus ntani novana vawo vamwe wovamati nava wovakadona. Josefa nga rere epata lyendi pokuhonga yipirangi, ntani nokuvaronga kuhamena Jehova noVeta zendi. Epata lyawo nkenye mvhura ngali zi kosinagoge moJerusarema va ka karere Jehova nokukadana sipito soPaska.

Apa Jesus ga kere nonomvhura 12, epata lyawo kwa zire hena koJerusarema. Mositata kwa zulire mo vantu ava ngava wiza va ya dane sipito soPaska. Apa sa pwire, Josefa naMariya tava tengura, nokugazara asi Jesus nage mweli mokatji kawo. Nye apa va mu paparere mokatji kekoro, kapi va mu gwene.

Makura tava tengura koJerusarema, va ka papara Jesus mazuva gatatu. Moruhura, tava ka mu gwana montembeli. Age ana hingire mokatji kovarongi, oku ta va purakene nokuvapuragera mapuro. Varongi kwa tetukire komapuro aga ga va pulire Jesus. Ntani malimbururo gendi kwa va tetwire. Awo va yi dimbwilire asi Jesus ga kwete egano Veta zaJehova.

Josefa naMariya kwa kere nosinka. Mariya ta tanta asi: ‘Munwange, nyove tuna papara nakunye! Kupi oku ko kara?’ Jesus ta limburura asi: ‘Kapi mwa diva asi nyame tupu kukara monzugo zaTate ndi?’

Jesus makura ta zi koNasareta novakondi vendi. Josefa nga rongo Jesus omu ava hongo yikungu. Omu ono kugazara, Jesus muntu musinke ga kere apa ga kere mumati? Ngomu ga kulire, Jesus ga kere noukonentu nomokuwapera Karunga novantu.