Egaununo 9

Mepata omu ga kulilire Jesus

APA ga kulilire Jesus moNasareta, aso kwa kere sitatagona sokudira kudivikwa. Aso kwa kara mosirongo sonondundu momukunda ogu ngava tumbura asi Galireya, kapisi ure nomuramba gomuwa gwaJesireli.

Jesus nampo kwa kere nonomvhura mbali apa va ka tengwire ko koEgipite oJosefa naMariya, ano age gelike ga kere munwaMariya. Nye konyima zosiruwo, oJosefa naMariya tava ya reta ko vana wovagara, oJakopo naJosefa naSimoni naJudasa ntani nava wovakadi. Kutanta asi Jesus kwa ya kere novamumbya vendi ntazimwe ndi kupitakana.

Jesus kwa kere hena nekoro lyendi. Twa diva nare mukurwendi gokomazimo Johanesa, ogu ga tungire sinano sosire moJudeya. Nye pepi nawo moGalireya kwa kere Sarome, mumbya gozina Mariya, ogu ga kwere Sebede. Yipo nye, vana vawo wovagara vavali oJakopo naJohanesa kwa kere vamumbyagona vaJesus. Kapi twa yi divilisa nsene asi apa ga kere munona Jesus nga kara kumwe novamati ava, nye konyima va ya kere vakaume wovanene.

Josefa ga hepere kurugana unene a rere epata lyendi lyenene. Age kwa kere muhongi goyikungu. Josefa kwa rerere Jesus ngamunwa gwamwene, yiyo Jesus ngava mu tumbura asi “munwamuhongi goyikungu.” Josefa kwa rongere Jesus mokukara muhongi goyikungu. Konyima yiyo vantu ngava tumbura Jesus asi “muhongi goyikungu.”

Epata lyaJosefa kwa kere epata eli ngali kerere Jehova Karunga. Mokuliza noVeta zaKarunga, Josefa naMariya ngava gava mapukururo gopampepo kovana vawo ‘nsene membo vana kara ndi morugendo ndi kuna kupwizumuka ndi kuna kurugana.’ Mwa kere hena sinagoge moNasareta, twa si huguvara asi Josefa nga twara nkenye apa epata lyendi mokukakanderera. Awo ngava hafa hena unene apa ngava zi nkenye apa koJerusarema kontembeli zaJehova. Mateusa 13:55, 56; 27:56; Marukusa 15:40; 6:3; Deuteronomium 6:6-9.

▪ Vamumbya vangapi ga kere nawo Jesus, ntani wolye madina gavamwe?

▪ Yilye mukurwaJesus gokomazimo, ntani wolye vamumbyagona vendi vavali ava va divikwa?

▪ Sirugana musinke nga rugana Jesus, ntani morwasinke?

▪ Mapukururo musinke gomulyo nga gava Josefa kepata lyendi?