Jesus ta kara Mesiyasa

Johanesa kwa zuvhisire asi: ‘Ogu nga wiza ga pitakana nge.’ Apa Jesus ga kere nonomvhura 30, yipo ga tundire koGalireya a ze komukuro gwaJorodana oku Johanesa nga kuhwire vantu. Jesus kwa here a mu kuhwe Johanesa, nye Johanesa ta tanta asi: ‘Kapisi nyame nani kukuhwa. Nyove wa fira kukuhwa nge.’ Jesus ta limburura asi: ‘Jehova kuna hara asi o kuhwe nge.’ Makura tava zi momukuro gwaJorodana, Johanesa ta divida Jesus momema.

Apa Jesus ga zaukire momema, ta kanderere. Makura eguru tali zeguruka, tamu tundu mpepo zaKarunga tazi mu hegumukire ngwendi nkutji. Jehova ta uyunga kutundilira meguru asi: “Ove nyove Munwange ogu na hara, wa za nge komutjima.”

Apa mpepo zokupongoka za hegumukilire Jesus, ta kara Kristusa ndi Mesiyasa. Kutunda opo, ta tameke sirugana esi ga mu tuminine Jehova a wize pevhu.

Tupu va mene kumukuhwa, Jesus ta zi momburundu nokukakara mo mazuva 40. Apa ga ka tengwire, ta zi a ka tare Johanesa. Apa Jesus ga wizire kwendi, Johanesa ta tanta asi: ‘Tareni, Nzwigona zaKarunga ezi ngazi gusa po nonzo douzuni.’ Johanesa kwa here vantu va dive asi Jesus yige Mesiyasa. Ono diva eyi ya horokerere Jesus apa ga kere momburundu ndi? Natu ka yi zogera mosirongwa sokukwama ko.