Jesus ta kutike vantu mayovi

Komeho tupu zoPaska momvhura 32, yipo vapositoli va ka tengwire mokuzuvhisa. Awo kwa rorokere, Jesus makura ta va twara nowato koBetesaida, va ka pwizumuke. Nye tupu va ka hegekere, Jesus ta mono mbunga zonene ezi za va kweme. Nampili ngomu Jesus ga here kupwizumuka po novapositoli vendi, age ga tambwire vantu. Makura ta verura vaveli vawo nokutameka kuvaronga. Ezuva nalinye, Jesus kwa va rongere kuhamena Uhompa waKarunga. Apa lya gombokere, vapositoli vendi tava mu wizire nokumutantera asi: ‘Vantu nzara vana kuzuvha. Tuma vantu va ze va ka lye nondya.’

Jesus ta va tantere asi: ‘Yinke eyi nava zira, va peni ko yokulya.’ Vapositoli tava mu pura asi: ‘Tu ze nye tu ka va randere mboroto ndi?’ Mupositoli Filipusa ta tanta asi: ‘Amesi nomboroto donoranda mafere gavali nokugwaneka si mbunga zokuhura apa.’

Jesus ta va pura asi: ‘Nomboroto dingapi muna kara nado?’ Andiliyasa ta mu limburura asi: ‘Ose apa kuna kara po nonomboroto ntano nonomfi mbali tupu. Kapi tava di gwaneke.’ Jesus ta va tantere asi: ‘Di retereni nge oku.’ Age ta tantere vantu va hingire powayi motumbunga, tomafere-mafere nonomurongo ntano-ntano. Jesus ta gusa nomboroto odo ntano nonomfi odo mbali, ta kanderere. Makura ta di tetagura, ta di pe varongwa vendi va di gavere kovantu. Ava va lire kwa kere mayovi 5 000 govagara, nsene o dira kuvarura ko vakadi novanona. Konyima zoyo, vapositoli tava pongaike eyi ya hupire ko, neisi nayi hepa. Tava zwida yikumba 12. Ee, sitetu musi kounene!

Vantu kwa tetukire dogoro tava harere mo kutura Jesus a kare hompa gwawo. Nye Jesus ga yi divire asi kapisi siruwo saJehova sokumutura a kare hompa. Yipo ga rekerere vantu va ze, makura ta tantere vapositoli vendi va ze mesinya mwina lyEfuta lyaGalireya. Awo tava perama mowato, ano age ta zi gelike kondundu. Morwasinke? Morwa kwa here a ka kanderere koGuhwe. Nampili ngomu nga rugana unene, Jesus nga litulire po siruwo sokukanderera.