Kwato eyi ya vhulire kuvahagekesa

Mugara gosirema somondambo nga hingire pevero lyontembeli a hundagere. Ezuva limwe, ta mono Peturusa naJohanesa kuna kuhwilira montembeli. Ta va hundire asi: ‘Peni nge ko yuma.’ Peturusa ta mu tantere asi: ‘Nina kara nayimwe eyi nani kupa yokupitakana yimaliwa. Medina lyaJesus, katuka o gende!’ Peturusa ta mu katura, mugara ta tameke kugenda! Vantu kwa hefe morwa sitetu oso, ano wovanzi tava kara vapuli.

Vapristeli noVasadukayi kwa handukire. Tava kwata vapositoli nokuvatura modorongo nokuvapura asi: ‘Kwalye muna gwana nonkondo dokuverura ogu mugara?’ Peturusa ta limburura asi: ‘Ose kuna gwana nonkondo kwaJesus Kristusa ogu mwa dipaga.’ Vampitisili tava tantere vapositoli asi: ‘Hagekeni kuuyunga kuhamena Jesus.’ Nye vapositoli tava tanta asi: ‘Kapi tatu hageke.’

Tupu va va sigire va ze, Peturusa naJohanesa tava zi kovakwawo nokukavatantera eyi ya horokere. Tava kanderere kwaJehova asi: ‘Tu vatera tu kare nouradi yipo tu twikire kurugana sirugana soge.’ Jehova ta va pe mpepo zokupongoka, makura tava twikire kuudisa nokuverura. Vantu wovanzi tava kara vapuli. Nye Vasadukayi kwa kere nomfudu tava kwata vapositoli nokuvatura modorongo. Masiku, Jehova ta tumu muengeli a ya zegurure mavero godorongo nokutantera vapositoli asi: ‘Zendeni kontembeli mu ka ronge.’

Ngurangura zonene, masimbi novampitisili womaukarelikarunga tava va tantere asi: ‘Dorongo tuna ka zi gwana hava zi zedilira, nye vagara ava komu kwete mwato! Moveli montembeli kuna kuronga vantu!’ Vapositoli tava va kwata hena nokuvareta komeho zosigongi somasimbi. Ano mupristeli gomunene ta tanta asi: ‘Twa yi mu nyokera asi nokuuyunga si kuhamena Jesus!’ Nye Peturusa ta limburura asi: “Ose twa hepa po kulimburukwa unene Karunga, kupitakana vantu.”

Vampitisili tava handuka unene nokuhara kudipaga vapositoli. Nye Mufalisayi gumwe gedina Gamaliyeli, ta sikama nokutanta asi: ‘Takameseni! Nampo Karunga nawo ana kara ava vagara. One kuna hara kurwanesa Karunga ndi?’ Makura tava tambura epukururo lyendi. Apa vapositoli va mene kuvasopora, tava va zigida nokuvatantera hena asi va hageke kuzuvhisa, tava va sigi va ze. Awo kapi va hagekere. Nkenye ezuva ngava rongo oku tava udisa noupampi mbudi zongwa montembeli nomomambo.