Ehororo lyaJohanesa

Apa mupositoli Johanesa ga kere modorongo posirudi saPatimosa, Jesus kwa mu likidire mamoneko 16 ndi mafano geyi yokomeho. Mamoneko ogo kwa likidire omu edina lyaKarunga ngava ka lipongora nomu Uhompa wendi ngau wiza ntani nomu ngazi ka sika mo mpango zendi pevhu ngwendi meguru.

Memoneko limwe, Johanesa kwa mwene Jehova posipundi sendi souhompa meguru, aso kuna si kundurukida masimbi 24 gana dwara yikoverero yoyizera nononkata dongorodo konomutwe dago. Mosipundi souhompa kwa tundire mo maruvadi nosindundumo. Makura masimbi 24 taga tongamene Jehova nokumukarera. Memoneko limwe hena, ta mono emukurumbunga lyokutunda momarudi nomomakoro nomomaraka nagenye kuna kukarera Jehova. Nzwigona Jesus, kuna kuvatakamesa nokuvatwara komarunone gomema gomwenyo. Ano memoneko hena limwe, ta mono Jesus kuna kupangera ngahompa meguru kumwe nomasimbi 24. Memoneko lya kweme ko, Johanesa ta mono Jesus kuna kurwa nemukongoro ndi Satana novaengeli vendi. Jesus ta va zugumine pevhu.

Johanesa ta mono efano lyewa lyoNzwigona novantu 144 000 kuna sikama poNdundu zaSiyoni. Age kwa mwene hena muengeli kuna kutuka meguru oku ta tantere vantu asi va tjire Karunga nokumuhamberera.

Memoneko lya kweme ko, ta mono yita yaHarumangedoni. Moyita oyo, Jesus novakwayita vendi tava fundu uzuni waSatana. Memoneko lyokuhulilira, ta mono yininke yepevhu nemeguru kuna kulipakerera. Satana noruvharo rwendi kwa va zonagwire po. Navenye vemeguru nava vepevhu kwa pongwere edina Jehova nokumukarera.