SIRONGWA 51

Ngapi natu hafesa Jehova kupitira mononkango detu?

Printed Edition

Jehova kwa tu pa uhwi wouwa wokuuyunga apa ga tu sitire. Monkedi ezi atu ruganesa uhwi owo mulyo kwendi ndi? Nhi! (Resa Jakopo 1:26.) Ngapi natu ruganesa uhwi wokuuyunga monkedi ezi nazi hafesa Jehova?

1. Ngapi natu ruganesa uhwi wokuuyunga?

Bibeli kututantera asi: “Yipo nye nomu tundira kulikorangeda-korangeda oku tomu likwafa-kwafa.” (1 Vatesaronika 5:11) Kuvhura o gazare ko vamwe ava vana hepa ekorangedo ndi? Yisinke no rugana yipo o va korangede? Va tantera asi awo mulyo koge. Nampo kuvhura o va tantere eyi wa va harera. Kuvhura o gazare ko etjangwa eli nali korangeda gumwe ogu wa diva ndi? Matjangwa manzi aga no vhura kuruganesa. Ntani diworoka asi monkedi ezi o uyunga yininke kuvhura yi korangede unene muntu. Yipo nye, hetekera ko kuuyunga nkenye apa nombili.—Yisewe 15:1.

2. Nonkango musinke twa hepa kunyokera po?

Bibeli kutanta asi: “Walye omu uyunga nonkango dononkukutu.” (Resa Vaefeso 4:29.) Eyi kutanta asi twa hepa kunyokera po nonkango donondona edi nadi koresa wopeke. Twa hepa hena kunyokera po kugamba wopeke momudona.—Resa Yisewe 16:28.

3. Yisinke nayi tu vatera tu uyunge monkedi ezi nazi korangeda wopeke?

Yikando yoyinzi, eyi atu uyunga kulikida eyi ya kara monomutjima detu ndi eyi tuna kugazara. (Rukasa 6:45) Yipo nye, twa hepa kulideura yipo tu gazadare yininke yokuhungama, yokukuhuka, eyi va hara vantu ntani neyi va fumadeka. (Vafilipi 4:8) Mokuninka asi tu gazare yininke oyo, twa hepa kuhorowora nawa yilihafeso yetu novakaume vetu. (Yisewe 13:20) Ntani hena, ya wapa tu gazadare ko komeho zokuuyunga. Gazadara ko omu nonkango doge nadi kundama wopeke komeho zokuuyunga. Bibeli kutanta asi: “Nonkango da hana mutwe nondungu kuwurura ngwendi rufuro, nye nonkango dounandunge kuverura.”—Yisewe 12:18.

LIRONGA KO YOYINZI

Lironga kuuyunga monkedi ezi azi hafesa Jehova nokukorangeda wopeke.

4. Takamesa eyi o uyunga

Poyiruwo yimwe, ose kuuyunga eyi atu ya livere konyima. (Jakopo 3:2) Resa Vagarata 5:22, 23, makura zogereni mapuro aga:

Yikara musinke no hundira yipo yi kuvatere o uyunge monkedi zongwa? Ngapi nayi kuvatera yikara oyo?

Resa 1 Vakolinte 15:33, makura zogereni epuro eli:

Ngapi vakaume woge noyilihafeso ayi kundama eyi o uyunga?

Mafano: Yirugana eyi yina ninkisa mugara a uyungise mukadendi nonyanya. 1. Age kuna kupurakena komusika gonyanya. 2. Age kuna kutarera udano wokurwana kumwe namukwawo. — Yisinke nayi vhura kukundama monkedi ezi o uyunga?

Mafano: Yirugana eyi yina ninkisa mugara a uyungise mukadendi nombili. 1. Age kuna kuresa Bibeli. 2. Nage namukadendi kuna kuzogera nakaume gwawo koSinyanga soUhompa. — Yisinke nayi vhura kukundama monkedi ezi o uyunga?

Resa Muudisi 3:1, 7, makura zogereni epuro eli:

Siruwo musinke nampo natu vhura kumwena nokundindira siruwo sosiwa yipo tu uyunge yuma?

5. Uyunga yininke yoyiwa kuhamena wopeke

Ngapi natu nyokera po kuuyungisa vantu monkedi zondona? Likida VIDIYO, makura zogereni mapuro aga naga kwama ko.

VIDIYO: ‘Omu uyunge nonkango donongwa dokuwapeka muntu’ (4:07)

Kuliza novidiyo, morwasinke munazinyetu ga harerere kurundurura monkedi omu nga uyunga kuhamena wopeke?
Yisinke ga rugene yipo a ture po marunduruko?

Resa Muudisi 7:16, makura zogereni epuro eli:

Yisinke twa hepa kudiworoka nsene tuna hara kuuyunga wopeke momudona?

Resa Muudisi 7:21, 22, makura zogereni epuro eli:

Ngapi novelise edi nadi kuvatera o dire kuhanduka nsene gumwe kuna kukuuyunga momudona?

6. Uyunga nepata lyoge monkedi zombili

Jehova kuna hara tu uyunge nava vemepata lyetu monkedi zombili ntani zeharo. Likida VIDIYO, makura zogereni epuro eli nali kwama ko.

VIDIYO: Efumadeko neharo kureta uumwe mepata (3:08)

Yisinke nayi kuvatera o uyunge nepata lyoge monkedi zombili?

Resa Vaefeso 4:31, 32, makura zogereni epuro eli:

Ngapi natu uyungisa vemepata lyetu monkedi zekorangedo?

Jehova kwa uyungire omu ga lizuvhire kuhamena Munendi, Jesus. Resa Mateusa 17:5, makura zogereni epuro eli:

Ngapi no honena Jehova monkedi ezi o uyungisa vemepata lyoge?

Zinya kuna kupandadeka munendi konyima zokufaneka yuma. — Papara nompito yipo o pandadeke wopeke

VAMWE KUTANTA ASI: “Ame kuuyunga yeeyi nina kugazara. Nsene kapi yina kuvahafesa eyi nina kuuyunga, awo kapisi udigu wange.”

Nove yimo o lizuvhu ngoso? Morwasinke ono kuuyungira ngoso?

YINKE ONO LIRONGO?

Eyi atu uyunga kuvhura kuvatera ndi kukoresa wopeke. Twa hepa kugazara kuhamena eyi natu uyunga, posiruwo esi natu yi uyunga ntani monkedi ezi natu yi uyunga.

Erugururomo

Ngapi no ruganesa uhwi wokuuyunga mokuvatera wopeke?
Nonkango musinke twa hepa kunyokera po?
Yisinke nayi tu vatera tu uyunge monkedi zombili ntani ezi nazi korangeda wopeke?

Sirongwa kwa si mene:

Heteka eyi

Sivike esi, tantera vemepata lyoge ndi gumwe gomombungakriste yikara yawo eyi wa hara.

Heteka hena eyi:

Your other goal

MAUZERA GAMWE

Yisinke nayi tu vatera tu uyunge monkedi ezi nazi korangeda wopeke?

Lironga kuruganesa nonkango dounandunge (8:04)

Lironga eyi nayi kuvatera o nyokere po kuruganesa nonkango donondona.

“Kutuka kudona ndi?” (Sirongwa sokoIntaneta)

Lironga omu no nyokera po kuuyunga wopeke momudona.

Ngapi nani hageka rugambo? (2:36)

Tara omu Jehova ga vaterere mugara ogu ngayi digopere kuhageka kutuka.

“Tani tameke kugazadara ko unene kuhamena eparu lyange” (Ruhungu, 1 Sitarara-Sikukutu 2013)