Wovasesu tupu ngava pangera, nye vanzi ngava gwanena mo uwa
KUTUNDILIRA momazuva govapositoli, Karunga kwa horowora movantu mbungagona zoVakriste wovalimburukwi, va kare vanamvharerwa meguru. Erunduruko eli ava ligwanekere nalyo vantu ava lya likarera, yiyo Nonkango daKarunga adi li singwenene asi ehampurukururo. Sitambo sehampurukururo, sokuwapaikira vakereli vaKarunga ava va hampurukurura mokukakara vapangeli meguru. (2 Timoteusa 2:12) Mokukara vapangeli, va hepa kuvavhumbwira keparu lyemeguru. (Varoma 6:3-5) Meguru, ‘awo ngava ka pangera ngovahompa evhu nalinye,’ kumwe naKristusa.—Ehororo 5:10; 11:15.
Nampili ngoso, Nonkango daKarunga kwa tanta asi kugusa ko ava va hampurukurura, koveli hena vapeke ava ngava ka gwana eparu lyanarunye. MoBibeli (Matjangwa goRuhebeli goSikriste ntani naga goRugereka), kwa tanta hena asi Karunga nga parura nombunga mbali dovantu, mbungagona zovapangeli ava ngava parukira meguru ntani emukurumbunga lyovapangerwa ava ngava parukira pevhu. Pasihonena, koneka eyi ga tjangerere mupositoli Johanesa vapuli vakwawo ava va hampurukurura. Age kwa uyungire kuhamena Jesus asi: “Kristusa yige nzambo zokugusisa po nonzo detu, nye detu sa delike, hawe, nedi dovantu navenye [emukurumbunga].”—1 Johanesa 2:2.
Mokulifana, mupositoli Paurusa kwa tjenge asi: “Unsitwe mudima [emukurumbunga] kuna kundindira nehuguvaro lyenene ehoroko lyovana vaKarunga [mbungagona].” (Varoma 8:19-21) Ngapi omu natu vhura kukwata egano nonkango odo dovapositoli oJohanesa naPaurusa? Monkedi ezi: Owo va hampurukurura ngava ka kara ruha rwepangero lyemeguru. Yisinke ngava ka rugana mo meguru? Mokukaretera mauwa ganarunye kemukurumbunga, awo vapangerwa vepangero lyaKarunga ava ngava ka parukira pevhu. Yipo nye Jesus ga rongere varongwa vendi mokukanderera asi: ‘Uhompa woge au wize. Mpango zoge ava zi sikise mo pevhu ngwendi meguru.’—Mateusa 6:10.
Ntani hena Matjangwa goRuhebeli kwa tumbura nombunga mbali edi ngava parura. Pasihonena, koneka eyi ga tanterere Jehova zinyakurwaJesus Abirahamu: “Moruvharo roge [mbungagona] yimo ngava tungikira nombunga nadinye domouzuni [emukurumbunga].” (Genesis 22:18) Nombunga nadinye domouzuni ngano ngava di tungikira “moruvharo” rwaAbirahamu.
Yilye ‘ruvharo’ oro? Jesus Kristusa navamwe ava ava hampurukurura, va kare vana vaKarunga. Mupositoli Paurusa kwa fatwilire asi: ‘Nsene asi kwaKristusa mwa hama, nyone nye honde ndi ruvharo rwaAbirahamu.’ (Vagarata 3:16, 29) Ntani matungiko musinke ava gwana vantu navenye kupitira “moruvharo”? Mfumwa zokuvatambura Karunga ntani nokukahafera eparu lyanarunye pevhu moparadisa. Muepisarome Ndafita kwa porofetere asi: “Muhungami nga gusa sirongo nga tunge mo narunye-narunye.”—Episarome 37:29; Jesaya 45:18; Ehororo 21:1-5.
Yosili, wovasesu tupu ngava pangera meguru, nye vanzi ngava ka gwanena mo mauwa geparu lyanarunye pevhu ntani nomatungiko gamwe hena. Ngano nove nepata lyoge mu kare ruha rowo ngava ka gwana mauwa ganarunye aga ngau reta Untungi waKarunga!
[Efano pepenuno 12]
Emukurumbunga ngava ka li tungika neparu lyanarunye pevhu. Nove ngo kara gumwe gwalyo ndi?