Yisinke sitambo sehampurukururo?

WOVANZI kwa pura asi muntu va hepa kumuhampurukurura ntani na gwana eparu lyanarunye. Nampili ngoso, koneka eyi ga uyungire Jesus mwene kuhamena sitambo sehampurukururo. Age kwa tente asi: “Muntu nokuvhura si kumona Untungi waKarunga, ntudi kuna mu hampurukurura ntani.” (Johanesa 3:3) Yipo nye, muntu va hepa kumuhampurukurura mokukahwilira moUntungi waKarunga, nye kapisi mokukagwana eparu. Vamwe kuvhura va uyunge asi ‘nontanto edi mbali, kuhwilira moUntungi ntani kugwana eparu, nani kapi da tamba kosininke simwe tupu?’ Hawe, kapisi yimo. Mokukwata egano malisigo gado, tu zeni tu konakone pomuhowo eyi azi tanta ntanto “Untungi waKarunga.”

Untungi ndi Uhompa kuna kara epangero. Yipo nye, ntanto “Untungi waKarunga” kutanta asi “epangero lyaKarunga.” Bibeli kuronga asi Jesus Kristusa, “MunwaMuntu,” kuna kara Hompa goUntungi waKarunga ntani koveli vamwe ava ngava ka pangera kumwe nendi. (Ndaniyera 7:1, 13, 14; Mateusa 26:63, 64) Mokugwederera ko, emoneko eli ga mwene mupositoli Johanesa kwa horora asi ava ngava ka pangera kumwe naKristusa kwava gusa ‘momazimo nomomaraka nomonomuhoko nomomarudi nagenye’ ntani awo ‘ngava ka pangera ngovahompa evhu nalinye.’ (Ehororo 5:9, 10; 20:6) Nonkango daKarunga kwa horora hena asi owo ngava ka pangera ngovahompa kuna kara “mbungagona” zovantu 144 000 “ava va zowora pevhu.”—Rukasa 12:32; Ehororo 14:1, 3.

Kupi wa kara Untungi waKarunga? “Untungi waKarunga” kuutumbura hena asi ‘Untungi weguru,’ eyi kulikida asi Jesus novahompa vakwawo ngava pangera kutundilira meguru. (Rukasa 8:10; Mateusa 13:11) Yimo, Untungi waKarunga kwa u tulisa po Jesus Kristusa nombungagona zava va gusa mo movantu.

Yisinke ga tembe Jesus apa ga uyungire asi muntu va mu hampurukurure ntani nga ‘hwilira moUntungi waKarunga’? Jesus kwa tembe asi muntu va hepa kumuhampurukurura yipo a ka pangere kumwe nendi meguru. Yipo nye asi sitambo sehampurukururo kuna kara sokuwapaikira mbungagona zovantu mokukapangera meguru.

Ngesi tuna yi mono asi ehampurukururo mulyo unene, alyo Karunga a li retesa po, ntani kuwapaikira mbungagona zovantu ava ngava ka pangera meguru. Nye ngapi omu ali horoka sili ehampurukururo?

[Nonkango pepenuno 7]

Sitambo sehampurukururo kuna kara sokuwapaikira mbungagona zovantu mokukapangera meguru

[Efano pepenuno 7]

Jesus Kristusa nombungagona zava va gusa mo movantu yiwo va tulisa po Untungi waKarunga